ང་ཚོའི་འཛིན་གྲྭའི་ནང་དུ་མིང་ལ་ལིན་ལིན་ཟེར་བའི་སློབ་མ་ཞིག་ཡོད།ད་ལོར་ལོ་ན་དགུ་ལ་སོན་མ་ཐག་ཡིན།ཁོ་མོའི་ཨ་ཕ་ནི་རི་མོ་མཁན་ཞིག་ཡིན་པས།ཨ་ཕའི་ཤུགས་རྐྱེན་འོག་ལིན་ལིན་ཡང་ཆུང་དུས་ནས་རི་མོ་འབྲི་བར་ཧ་ཅང་དགའ།

ཟླ་སྔོན་མར།ཞིང་ཆེན་ནང་དུ་ན་ཆུང་རི་མོའི་འགྲན་སྡུར་ཞིག་རྩ་འཛུགས་བྱེད་ཀྱི་འདུག་པས།ངས་ལིན་ལིན་ལ་སྐུལ་སློང་བྱས་ཏེ་འགྲན་སྡུར་དེའི་གྲས་སུ་མིང་ཐོ་འགོད་བཅུག་པ་ཡིན།

ཉིན་ཤས་འདས་རྗེས།ལིན་ལིན་གྱིས་རི་མོ་ཞིག་བྲིས་ཏེ་ཁྱེར་འོང་།རི་མོའི་ཁ་བྱང་ལ«རེ་ལྟོས»ཞེས་བཏགས་འདུགཁོ་མོས་བྲིས་པའི་རི་མོ་ནི་འདི་ལྟར་ཏེ།སྔོ་ལྡེམ་ལྡེམ་གྱི་རྩྭ་ཐང་སྟེང་།བུ་མོ་ཆུང་ཆུང་ཞིག་ཐང་དཀྱིལ་དུ་ཅུང་བསྒུར་ནས་བསྡད་དེ།འགྲམ་པ་སྐྱོར་བཞིན་མཁའ་དབྱིངས་ཀྱི་ཉི་འོད་འཆར་བར་བལྟས་འདུག

རི་མོ་འདིའི་བློ་བཀོད་དང་ཚོན་མདངས་ཐམས་ཅད་ཀྱང་ཤིན་ཏུ་ལེགས་པས།ངའི་ཚོར་བ་ཞིག་ལ་རི་མོ་འདིར་དགའ་རྟགས་འཐོབ་པ་ཁག་ཐེག་བྱ་ཆོག་སྙམ།དེ་ལྟར།ལིན་ལིན་གྱི་རི་མོ་རྒྱལ་ཁའི་ངང་རྫོང་རིམ་པའི་དཔྱད་འདེམ་གྱི་གྲས་སུ་ཚུད་ཅིང་།མི་རིང་བར་ཞིང་ཆེན་དུ་བསྐྱལ།

ལིན་ལིན་གྱིས་རེ་ལྟོས་ཆེན་པོ་བྱེད་ཀྱི་འདུག་ལ།མཛེས་རྩལ་དགེ་རྒན་ངས་ཀྱང་རེ་ལྟོས་ཆེན་པོ་བྱེད་ཀྱི་ཡོད།འོན་ཀྱང་།སེམས་སུ་མ་འཁོར་བ་ནི།ཉིན་ཞིག་སློབ་གྲོགས་རྙིང་བ་ཞིག་གི་ཁ་པར་ཐོན་ལ།ཁོ་ནི་ཞིང་ཆེན་དུ་ཡོད་པའི་ན་ཆུང་རི་མོའི་འགྲན་སྡུར་གྱི་ཞིབ་དཔྱད་རྒྱུན་ལས་ཁང་གི་རྒྱུན་ལས་མི་སྣ་ཞིག་ཡིན།ཁོས་ཁ་པར་ལས་བཤད་པ་ལྟར་ན།ལིན་ལིན་གྱི་རི་མོ་བདམས་ཐོན་བྱུང་མ་སོང་།དེ་ནི་རི་མོ་བྲིས་པ་མ་ཡག་པས་མིན་པར།ཁོ་མོས་རྒྱུན་ཤེས་རང་བཞིན་ལ་ནོར་འཕྱུག་བྱུང་འདུག་སྟེ།སྤྱིར་བཏང་ཉི་མ་ཤར་ཕྱོགས་ནས་འཆར་གྱི་ཡོད་ཀྱང་།ལིན་ལིན་གྱི་རི་མོའི་ནང་ཉི་མ་ནུབ་ཕྱོགས་ནས་ཤར་བ་ཞིག་བྲིས་འདུག་ཟེར།

ལོ་ན་དགུར་སོན་པའི་བྱིས་པ་ཆུང་ཆུང་ཞིག་གིས།སྣང་མེད་ཀྱིས་ཉི་མའི་ཁ་ཕྱོགས་ཀྱང་བྲིས་ནོར་ཤོར་འདུགདངོས་གནས་བྱས་ན།དེ་ནི་གུ་ཡངས་གཏང་ཆོག་པ་ཞིག་རེད་མོད།ཆེས་གུ་ཡངས་གཏང་མི་ཆོག་པ་ནི་ང་རང་ཉིད་དེ།དགེ་རྒན་ཞིག་གིས་འདི་ཙམ་ལའང་གཟབ་ནན་བྱས་མི་འདུགད་ནི་ནོར་འཕྱུག་ཚབས་ཆེན་བཟོས་ཚར།

སློབ་ཁྲིད་གྲོལ་བའི་དྲིལ་བརྡ་གྲག་མ་ཐག ངས་ལིན་ལིན་རང་གི་གཞུང་ལས་ཁང་དུ་བོས་པ་ཡིན།ལིན་ལིན་གྱིས་མགོ་བོ་སྨད་བཞིན་ནང་ལ་འཛུལ་འོང་།བྱིས་པ་འདི་ཉིད་དུས་རྒྱུན་དང་མི་འདྲ་བར་ཉིན་འདི་གར་ཉབ་བེ་ཉོབ་བེ་ཞིག་ཏུ་གྱུར་ཅིང་།དེའི་ཁར་ངོ་མདངས་ཀྱང་བཟང་རྒྱུ་མི་འདུག

ངས་ཁོ་མོ་རང་གི་འགྲམ་དུ་བསྡད་བཅུག་རྗེས།

ལིན་ལིན།ཁྱོད་ཀྱིས་བྲིས་པའི་རི་མོའི་སྟེང་གི་ཉི་མ་དེ།ཤར་ཕྱོགས་སུ་ཡོད་དམ་ནུབ་ཕྱོགས་སུ་ཡོད་ཅེས་དྲིས།

ལིན་ལིན་གྱིས་ཚིག་ཐག་ཆོད་པོའི་སྒོ་ནས་ནུབ་ཕྱོགས་སུ་ཡོད་ཅེས་ལན་བཏབ།

ག་རེ།དངོས་འབྲེལ་ནུབ་ཕྱོགས་སུ་ཡོད་དམ།ཁྱོད་ཀྱིས་ད་དུང་འདང་ཞིག་ཐོངས་དང་།དྲན་ནོར་བྱས་པ་མིན་ནམ།

དགེ་རྒན།དངོས་འབྲེལ་ནུབ་ཕྱོགས་སུ་ཡོད།དྲན་ནོར་བྱ་མི་སྲིད།ཡང་གཅིག་བཤད་ན།ངས་ཆེད་དུ་ཁ་ཕྱོགས་དེར་གཏད་པ་ཡིན།

ང་རང་ཁོང་ཁྲོ་ཆེན་པོ་ལངས་ནས། ཁྱོད་ཀྱིས་དུས་ནམ་ཞིག་ལ་ཉི་མ་ནུབ་ཕྱོགས་ནས་ཤར་བ་མཐོང་མྱོང་།ངོ་མ་ཅི་ཡིན་འདི་ཡིན་མི་འདུགཁྱོད་ཀྱིས་རི་མོ་དེ་བྲིས་རྗེས།ཨ་ཕར་བསྟན་ན་མི་ཆོག་གམ་ཞེས་བསྡིགས།

ལིན་ལིན་གློ་བུར་དུ་ངུས་བྱུང་།ཁོ་མོའི་ངུ་སྐད་ནི་ཤིན་ཏུ་ཡིད་སྐྱོ་བ་ཞིག་རེད།

ཁོ་མོས་མིག་ཆུ་འབྱིད་ཞོར་སེམས་སྡུག་ཆེན་པོའི་ངང་བརྗོད་དོན། ཨ་ཕ་དང་ཕ་མ་གཉིས་ཀྱིས་ཕན་ཚུན་ཁ་འཛིང་བྱས་པས།ཨ་ཕ་ང་ཚོ་དང་ཁ་བྲལ་ནས་ཞིང་ཆེན་ནང་བུད་སོང་།ཨ་ཕ་འགྲོ་ཁར་ཨ་མར་བཤད་དོན།  ‘དུས་ནམ་ཞིག་ཉི་མ་ནུབ་ཕྱོགས་ནས་ཤར་ཚེ།ད་གཟོད་ང་རང་ཕྱིར་ཁྱིམ་ལ་ལོག་ཡོང’ཟེར།དེ་བས།ངས་ཉི་མ་ནུབ་ཕྱོགས་ནས་འཆར་ན་ཧ་ཅང་འདོད།དེ་དུས་ཨ་ཕ་ཕྱིར་ཁྱིམ་ལ་ལོག་ཆོག་གི་རེད།དུས་དེར།ངའི་སེམས་ལ་བཤད་མི་ཐུབ་པའི་སྐྱོ་གདུང་དྲག་པོ་སྐྱེས་ཤིང་།དབང་མེད་དུ་མིག་ནས་མཆི་མ་འགའ་ས་ལ་འཐོར།ངས་ལིན་ལིན་པང་དུ་ལེན་བཞིན།  གཅེས་ཕྲུག དགེ་རྒན་གྱིས་ཐབས་བཀོད་ཅིག་འཐེན་ནས་རི་མོ་དེ་ཁྱོད་ཀྱི་ཨ་ཕར་བལྟ་རུ་འཇུག་ཁོ་ཐག་ཡིན།ཁོ་ཐག་ཡིན་ཞེས་བཤད།

ངས་དེ་འཕྲལ་ཁ་པར་བཏང་སྟེ།ལིན་ལིན་གྱི་གནས་ཚུལ་འདི་ཉིད་ཞིང་ཆེན་ནང་ཡར་ཞུ་བྱས་པ་ཡིན།དེ་ནས་ཉིན་འགའ་ལས་མ་འགོར་བར།ངའི་སློབ་གྲོགས་རྙིང་བས་ཡང་བསྐྱར་ཁ་པར་བཏང་བྱུང་།ཁོས་བཤད་ན།དཔྱད་འདེམ་རྒྱུན་ལས་ཁང་གིས་གནས་ཚུལ་གསལ་བོར་རྟོགས་རྗེས།གཟབ་ནན་གྱི་ངང་ནས་ཞིབ་དཔྱད་བརྒྱུད་དེ།མཐར་བློ་རྩེ་གཅིག་མཐུན་གྱིས་ལིན་ལིན་ལ་ཁྱད་འཕགས་བྱ་དགའ་སྤྲད་རྒྱུར་འཐད་པ་བྱུང་སོང་ཟེར།

ང་རང་དགའ་སྤྲོ་དཔག་མེད་སྐྱེས་སོང་།ངའི་རེ་བ་ནི་རི་མོ་དེ་ཉིད་ལིན་ལིན་གྱི་ཨ་ཕས་མཐོང་བ་མ་ཟད།བུ་མོའི་དཀའ་ལས་བརྒྱབ་པའི་སེམས་ཁམས་ཀྱང་རྟོགས་ཏེ།སྔ་མོ་ནས་ཕྱིར་ཁྱིམ་ལ་འབྱོར་ཞིང་།ཁྱིམ་ཚང་ལྷན་འཛོམ་འབྱུང་ཐུབ་པའོ།།