རྒྱང་རིང་བྲག་དཀར་ཡུལ་ན་གནས་པ་ཡི།།

འོ་ཞོ་ཇི་བཞིན་སེམས་ན་ཆགས་པ་སྟེ།།

གསར་སྐྱེས་མེ་ཏོག་འདྲ་བའི་སྙིང་སྡུག་མ།།

ཁོ་བོའི་སེམས་ཀྱི་དཀྱིལ་ན་གཉོམ་དུང་ངེར།།

མི་ཆེ་མི་ཆུང་སློབ་གྲྭའི་དགའ་ཚལ་ནས།།

མི་ཡག་མི་བཙོག་ཁྱེད་དང་ང་ཡིས་ནི།།

ལག་པས་ལག་པ་བཟུང་དེ་འགྲོ་མྱོང་ལ།།

ཁྱིམ་གཞི་གཅིག་ཏུ་འདུག་པར་སྨོན་ཡང་མྱོང་།།

ང་ཡིས་བཙན་གྱིས་འཐེན་པ་མ་ཡིན་ལ།།

ཁྱེད་ཀྱིས་གཉོམ་གྱིས་ཁུར་བ་མ་ཡིན་པས།།

དགའ་བ་མདའ་མོ་རྒོད་སྒྲོ་དགུ་བསྒྲིགས་དེ།།

བརྩེ་བའི་གཞུ་ལས་ཐོལ་གྱིས་ཤོར་བ་ཡིན།།

འུ་གཉིས་འགྲོགས་པའི་ལོ་ཟླ་དེ་དག་ལ།།

སྙིང་གཏམ་ཙན་དན་ཕྲེང་བ་ཆད་མ་མྱོང་།།

མི་འདོད་གཏམ་གྱི་མི་ཁ་འཁོར་མ་མྱོང་།།

བྱུར་དམར་འདྲ་བའི་བརྩེ་བ་འགྱུར་མ་མྱོང་།།

དམར་པོ་མེ་ལ་མཆོངས་པར་ཁོ་བོ་སྐྲག།

རྨ་ཆུ་སྔོན་མོར་བརྒལ་བར་ཁྱེད་ཀྱང་འཇིགས།།

ཡིན་ཡང་བརྩེ་དུང་ཟེར་བའི་འགྲོ་རོགས་འདིའི།།

ང་ཡི་སེམས་ལ་ཞུམ་མེད་སྤོབས་པ་བསྩལ།།

རི་ཆེན་རི་ཆུང་ཤོག་བུ་ལྟེབས་པ་ལྟར།།

སྙིང་སྡུག་ཁྱེད་རང་ཡོད་སར་ཐེངས་འགར་བསྙེགས།།

སྟབས་ཁ་མ་འགྲིག་གོ་སྐབས་མ་བྱུང་པས།།

ཁོ་བོའི་སེམས་ཀྱི་རེ་སྣང་སྐྱོ་བས་ཁེངས།།

ལས་དབང་ཟེར་བ་བསམ་ནག་ཁོག་བཙོག་འདིས།།

ཁྱེད་དང་ངེད་གཉིས་ཁ་ཁ་སོ་སོར་བཏང་།།

ལྷད་མེད་བརྩེ་བའི་རྨུ་ཐག་དུམ་སེ་བཅད།།

འགྱུར་མེད་དམ་བཅའ་དེ་ཡང་ཐར་སེ་བཅད།།

ཉིན་དང་མཚན་གྱི་བར་ནས་ཁྱེད་དྲན་པས།།

མིག་ཟུང་མཆི་མ་འཐོར་ཐལ་ངོ་མ་རེད།།

སྙིང་ཆུང་ནད་པས་ལོག་པ་བདེན་པ་རེད།།

དྲན་གྱིན་དྲན་གྱིན་བུ་ང་སྨྱོ་ལ་ཁད།།

མདུན་གྱི་ལམ་བུ་ཉན་ཕྲན་མདའ་བཞིན་དྲང་།།

ཁྱེད་ཉིན་དྲན་ན་རྐང་པ་འཁྱར་འཁྱོར་སྤོ།།

མིག་གིས་མདུན་དུ་ལྟོས་དེ་སོང་ཀྱང་རུང་།།

ལམ་ལོག་གང་མང་བརྒྱུད་པ་བགྲང་ལས་འདས།།

ཁྱེད་རང་གནས་ཡུལ་འགྲིམ་པ་དེ་རིང་ཐོས།།

གནས་མ་བུ་འཁྲིད་ཡིན་པ་དེ་རིང་ཤེས།།

ཁ་བཏགས་འདྲ་བའི་ང་ཡི་སེམས་པ་འདི།།

གླེན་པའི་གླེན་རྟགས་ཡིན་པ་ད་རེ་ཚོར།།

མགོ་བོ་རུམ་ཏེ་གཉིད་ན་དེ་མ་རེད།།

མིག་ཟུང་བཙུམ་དེ་བསྡད་ན་དེ་མ་རེད།།

སེམས་པ་དར་དཀར་འདྲ་བོའི་ནང་ལུང་ནས།།

ཁྱེད་ཉིད་བརྗེད་པའི་ཐབས་ཤིག་མ་རྙེད་དོ།།

ལུས་པོ་འདི་ལ་གཤོག་པ་ཐོགས་གྱུར་དེ།།

ཁྱེད་རང་ཡོད་སར་རྩལ་གྱིས་འཕུར་ན་འདོད།།

འཁྲུལ་སྣང་འདི་འདྲ་ཡིད་དུ་འཁོར་བ་ཡིས།།

དྲན་པ་ཇེ་མང་ཡིད་སེམས་ཇེ་སྡུག་རེད།།

ཉི་འོད་དྲོན་མོ་སྤྲིན་པས་སྒྲིབ་ན་ཆོག།

མཛེས་སྡུག་མེ་ཏོག་སད་ཀྱིས་བཅོམ་ཡང་སྲིད།།

ཁྱེད་དང་ང་ཡི་ལྷད་མེད་བརྩེ་དུང་དེ།།

བརྗེད་དུ་འཇུག་པའི་སྨན་ཤིག་གང་དུ་འཚོལ།།

རང་རང་ས་ནས་བཟའ་བའི་དབང་དུ་གྱུར།།

ཆུང་ཆུང་བྱིས་པ་ཞིག་གི་ཕ་མར་གྱུར།།

ཡིན་ཡང་ལས་དབང་ཟེར་བའི་རལ་གྲི་འདིས།།

ང་ཡི་སེམས་ལ་སོས་མེད་རྨ་ཁ་བཟོས།།

མང་པོ་མང་པོ་མི་བཤད་སྡུག་བསྔལ་རེད།།

རིང་པོ་རིང་པོ་མི་འབྲི་གཏམ་རྒྱུད་རེད།།

ཁྱེད་དང་ང་ཡི་བརྩེ་བ་དམར་དམར་དེ།།

བྲིས་ན་མི་ཚར་བཤད་ཀྱང་མི་རྫོགས་སོ།།

ཁྱེད་ལ་བྲིས་པའི་བརྩེ་བའི་སྙན་ངག་འདི།།

ཁྱེད་ཀྱིས་མཐོང་ན་ང་རང་དྲན་ཡང་སྲིད།།

རང་རང་ས་ནས་དྲན་རྒྱུ་མ་གཏོགས་པའི།།

འཛུམ་མདངས་གྱི་ལེར་འཕྲད་རྒྱུ་རི་བོང་རྭ།།

མིག་ཟུང་སྐར་ཆེན་འདྲ་བའི་བུ་མོ་ཁྱོད།།

མ་འོངས་འཚོ་བར་བདེ་སྐྱིད་ལྡན་པར་ཤོག།

ཁྱིམ་ཚང་བཟའ་ཟླར་འགྲིག་མཐུན་ཡོངས་པར་ཤོག།

ནད་མེད་སྐྱོན་མེད་བྱ་བ་ལེགས་འགྲུབ་ཤོག།