སྟོད་ཨ་མྱེས་སྟག་ལུང་འདབས་རོལ་ན༎

གཙང་གྱོ་ཆུ་བཞུར་བའི་གཡས་ཟུར་ན༎

སྡེ་སྨན་ཚང་མཚོ་མོའི་ནང་དཀྱིལ་ན༎

ལག་ལས་ཀ་ཅན་གྱི་སྲིང་ཆུང་མ༎

ལ་ལུང་བའི་ཨ་མ་གྱོ་མ་ན༎

སྲས་གྲུ་གུ་ཁྲ་ལོག་གཡོན་ཟུར་ན༎

སྤང་མེ་ཏོག་བཀྲ་བའི་ཐང་ཁུག་ན༎

མགོ་ལག་རས་དཀྲིས་པའི་སྲིང་ཆུང་མ༎

སྒོ་འབྲི་མོ་ངུར་བའི་ལྷས་ར་ན༎

གོས་ཕུ་ཐུང་ཡར་ལ་བརྫེས་པ་ན༎

དགོ་བཞོ་གླུ་འགུགས་པའི་གདང་བར་ན༎

ལག་བཞོ་ཟེའུ་ཐོགས་པའི་སྲིང་ཆུང་མ༎

སྦྲ་རོག་རོག་ཅན་གྱི་གུར་ཁྱིམ་ན༎

མར་ཕྱུར་བའི་མཚོ་མོ་ལྟེམས་ས་ན༎

ཞོ་འོ་མའི་རྒྱ་མཚོ་འཁྱིལ་ས་ན༎

ངོ་འཛུམ་མདངས་འཕྱུར་བའི་སྲིང་ཆུང་མ༎

སྒང་བུད་ནས་སྡེ་གྲོང་རིག་ས་ན༎

ལག་ཁ་པར་བརྡ་འཕྲིན་ཡོད་ས་ན༎

ལུས་ཁམས་བདེ་གཤིས་འཇམ་ལྡན་ས་ན༎

ཞེ་མ་ལ་འཁོར་བའི་སྲིང་ཆུང་མ༎

དྲིན་ཕ་མའི་ལས་དབང་དྲན་ས་ན༎

སེམས་ཡ་ཆུང་གྲང་བས་འདར་ས་ན༎

མགོ་སྐྲ་ལོ་ཁ་བས་གཡོགས་ས་ན༎

སྡེ་མི་ཁས་མནར་བའི་སྲིང་ཆུང་མ༎

རུ་ཁྱིམ་མཚེས་མཐེ་བོང་སྒྲེང་ས་ན༎

གྲོང་རྒན་གཞོན་ཀུན་གྱིས་བསྟོད་ས་ན༎

ལས་རོང་འབྲོག་འཚོ་བ་གཉེར་ས་ན༎

ལུས་འཚུབ་མ་འདྲ་བའི་སྲིང་ཆུང་མ༎

ལོ་བཅུ་ཁ་ཞིག་གི་ཡར་སྔོན་ན༎

གཡུ་བྱུ་རུའི་རྫོངས་པ་བྱས་དང་ན༎

སེམས་སྐྱོ་གྱིན་གཞན་ཡུལ་འགྲིམས་དགོས་ན༎

ལུས་རང་དབང་མེད་པའི་སྲིང་ཆུང་མ༎

ངོ་མི་ཤེས་ཁྱིམ་ཚང་གཡར་མ་ན༎

ལུས་ལང་ཚོ་འདམ་ལ་ཟུག་ས་ན༎

རང་མི་བསམ་གཞན་དོན་སྒྲུབ་ས་ན༎

ལྷ་སེམས་དཔའ་འདྲ་བའི་སྲིང་ཆུང་མ༎

རི་སྨུག་པས་དཀྲིས་པ་ཡལ་སོང་ན༎

ཆུ་འཁྱགས་པས་བསྡམས་པ་དྲོས་སོང་ན༎

ལག་ཐོད་ལ་ཀེར་བའི་སྲིང་ཆུང་མ༎

མ་ཁྱེད་ཀྱི་བསམ་དོན་འགྲུབ་པར་ཤོག།