མིག་སྔར་རིམས་ནད་ལ་ཚོད་འཛིན་ངེས་ཅན་ཐོབ་པས།དེ་རིང་ནས་བཟུང་སྟེ་ཞིང་ཆེན་ཡོངས་ཀྱི་སློབ་གྲྭ་ཁག་གིས་མཐར་ཕྱིན་སློབ་མ་དག་གཙོ་བོ་བྱས་ཏེ་སློབ་འགོ་འཛུགས་བཞིན་ཡོད་པས། སི་ཁྲོན་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱིས་སློབ་འགོ་འཛུགས་རན་ཡོད་པའི་སློབ་མ་རྣམས་ལ་རིམས་འགོག་ཐད་དུ་དྲན་སྐུལ་འདི་འདྲ་བྱས་འདུག

        གཅིག རང་ཉིད་ཀྱི་བདེ་ཐང་གནས་ཚུལ་དྲང་མོར་ཡར་ཞུ་བྱེད་པ་ལས་སློབ་གྲྭར་སྦ་གསང་བྱེད་མི་རུང་ལ། ཚ་བ་རྒྱས་པ་དང་སྐམ་ལུ་བྱེད་པ།དབུགས་འཚང་བ། དབུགས་ལམ་གྱི་ནད་རྟགས་སོགས་ཡོད་ཚེ། དེ་མ་ཐག་ཏུ་ཁྱིམ་མིའམ་དགེ་རྒན་ལ་བཤད་དགོས་ལ། བརྟག་དཔྱད་བྱེད་པར་མཉམ་འབྲེལ་དང་ལེན་བྱེད་དགོས།

         གཉིས། སློབ་གྲྭ་ཚོགས་སྐབས་དང་སློབ་གྲྭ་གྲོལ་སྐབས་གང་ཐུབ་ཀྱིས་རྐང་ཐང་དུ་འགྲོ་བ་དང་ཕ་མ་ཚོར་སྐྱེལ་དུ་འཇུག་པ། སྤྱི་སྤྱོད་རླངས་འཁོར་ལ་འདུག་དགོས་ན།ལམ་བར་ཧྲིལ་བོར་ཁ་ཤུབས་གྱོན་དགོས་ལ། སློབ་གྲྭར་འབྱོར་བའམ་ཕྱིར་ཁྱིམ་དུ་ཐོན་རྗེས་ལག་པ་གཙང་མ་བཀྲུ་བ་དང་དུག་སེལ་བྱ་དགོས།

        གསུམ། སློབ་གྲོགས་ཚོ་སློབ་ཁང་ནང་དུ་ཡོད་སྐབས་གང་ཐུབ་ཀྱིས་བར་ཐག་འཇོག་པ་དང་སྒོ་དང་སྒེའུ་ཁུང་ཕྱེ་ནས་རླུང་རྒྱུ་རུ་འཇུག་དགོས། འདུག་ས་ཡར་རྗེ་མར་རྗེ་མི་བྱེད་པ་དང་ཟ་ཁང་ནང་དུ་ཟ་མ་ཟ་བའི་དུས་ཡོལ་རེས་བྱེད་པ་དང་། ཟ་མ་ལེན་དུས་དང་ཟ་དུས་ཀུན་ལ་བར་ཐག་འཇོག་དགོས། དགེ་སློབ་བར་དང་སློབ་གྲོགས་ཕན་ཚུན་བར་ཁ་བརྡ་བྱེད་དུས་བར་ཐག་ངེས་ཅན་འཇོག་དགོས།

        བཞི། འཕྲོད་བསྟེན་གྱི་གོམས་གཤིས་ལེགས་པོ་ཆགས་སུ་བཅུག་སྟེ། ལག་པའི་ཐད་ཀར་དུ་མིག་དང་སྣ།ཁ་སོགས་ལ་མི་རེག་པ། ཁ་ལུད་གང་སར་མི་འཕེན་པ། གློ་ལུ་རྒྱག་དུས་དང་ཧབ་སྦྲིད་རྒྱག་དུས་གཙང་ཤོག་གམ་ལག་པའི་ཁ་སྣ་གཅོད་པ། ཁ་ལུད་སོགས་གཙང་ཤོག་གིས་བཏུམས་ནས་ཁ་ལེབ་ཡོད་སའི་གད་སྙིགས་སྒམ་དུ་འཕེན་དགོས།

        ལྔ། ལག་པ་བཀྲུ་བའི་གོམས་གཤིས་ཆགས་སུ་བཅུག་ནས། ཟ་མ་ཟ་དུས་དང་འགུལ་སྤྱོད་བྱས་པའི་རྗེས། ཕྱི་རོལ་ནས་ཕྱིར་ནང་དུ་ལོག་རྗེས་དང་སྒོ་སོགས་དངོས་པོར་ལག་པས་ཐུག་རེག་བྱས་རྗེས་བཅས་སུ་ལག་པ་བཀྲུ་བའི་གོ་རིམ་བདུན་ལྟར་འདག་རྫས་བཀོལ་ནས་ཆུ་བཞུར་རྒྱུ་ཡོད་སར་ལག་པ་བཀྲུ་བ་དང་། ལག་པ་བཀྲུ་བའི་དུས་ཡུན་དེ་སྐར་ཆ་30ལས་ཉུང་མི་རུང་ལ།ལག་པ་ཕན་ཚུན་འཕུར་དེ་བཀྲུ་བའི་དུས་ཡུན་སྐར་ཆ་20ལས་ཉུང་མི་རུང་།

        དྲུག  བཅའ་སྡོད་བྱས་པའི་སློབ་གྲོགས་དག་གིས་སྡོད་ཁང་བརྗེ་རེས་དང་མི་མང་པོ་ལྷན་དུ་འདུ་འཛོམས་བྱེད་མི་རུང་། སྡོད་ཁང་གི་སྒེའུ་ཁུང་ཉིན་རྒྱུན་ཕྱེ་ནས་རླུང་རྒྱུ་རུ་གཞུག་དགོས་ལ། དེ་དང་དུས་མཚུངས་སུ་སྡོད་ཁང་གི་གཙང་སྦྲ་ཡག་པོ་བྱས་ནས།ལག་རས་དང་སོ་འཁྲུད་དམ་བེ།སོ་འཁྲུད་བྱེད་སོགས་བཀོལ་རེས་བྱེད་མི་རུང་།

        བདུན།   ལུགས་དང་མཐུན་པའི་སྒོ་ནས་ཟ་མ་ཟ་དགོས་ལ་འཚོ་བཅུད་དོ་མཉམ་ཡོང་བར་བྱས་ཏེ་འགོག་སྲུང་ནུས་པ་ཇེ་དྲག་ཏུ་གཏོང་དགོས། ལུས་པོ་བདེ་ཐང་ཡིན་པ་ནི་སློབ་སྦྱོང་གི་མཐུན་རྐྱེན་ལེགས་ཤོས་ཤིག་ཡིན་པས། སློབ་གྲོགས་ཚོས་རང་གི་ལུས་པོར་བདག་སྐྱོང་ཡག་པོ་བྱ་རྒྱུར་དོ་སྣང་བྱ་རོགས།