སྤྱི་ཟླ་༤ཚེས་༢༥ཉིན། ལྗོངས་དཔེ་མཛོད་ཁང་གིས་སྤྲིན་ཚོམས་མཉམ་སྤྱོད་ཅེས་པའི་ནང་། ཉར་ཚགས་བྱས་པའི་དཔེ་རྙིང་ཁག་དང་པོ་དེ་དག་དྲ་ཐོག་ནས་དངོས་སུ་ཚོད་ལྟའི་འགྲེམ་སྟོན་བྱེད་འགོ་བཙུགས་པ་དེས། བོད་ལྗོངས་འདི་ཉིད་དཔེ་རྙིང་སྤྲིན་ཚོམས་ལྟ་ཀློག་གི་དུས་རབས་སུ་སླེབས་པ་མཚོན་ཡོད།
ད་ཐེངས་དྲ་ཐོག་ནས་ཁག་དང་པོར་ལྟ་ཀློག་ཚོད་ལྟ་ཐུབ་པའི་ཁྲོད། དཔེ་རྙིང་པོད་༥༠དང་ཤོག་གྲངས ༦༥༨༡ཡོད་པ་དང༌། དེ་དག་གི་གྲས་སུ་བོད་ཀྱི་མཁས་དབང་རིམ་བྱོན་གྱི་རྣམ་ཐར་དང་། བོད་ཀྱི་ལོ་རྒྱུས། དེ་བཞིན་ས་ཁོངས་མི་འདྲ་བའི་ཆོས་ལུགས་ལོ་རྒྱུས་སོགས་ཚུད་ཡོད། དེའི་ཁྲོད་དཔལ་ལྡན་ཨ་ཏི་ཤའི་རྣམ་ཐར་རྒྱས་པ་ཡོངས་གྲགས་ལག་བྲིས་མ་དང་། མར་པ་ལོ་ཙཱའི་རྣམ་ཐར་གསོལ་འདེབས། ས་སྐྱ་པཎ་ཆེན་ཀུན་དགའ་རྒྱལ་མཚན་གྱི་རྣམ་ཐར་དུས་རབས་བཅུ་བདུན་པའི་ནང་བརྐོས་པའི་པར་བརྐོས། ཞྭ་ལུ་ལོ་ཙཱ་བའི་རྣམ་ཐར་ཙག་དམར་པར་བརྐོས། ས་སྐྱའི་གདུང་རབས་ངོ་མཚར་རིན་ཆེན་བང་མཛོད། བདེ་མཆོག་ཆོས་འབྱུང་། རྒྱ་ནག་ཆོས་འབྱུང་པར་བརྐོས་མ། པཎ་གྲུབ་གསུམ་གྱི་རྣམ་ཐར་དཔག་བསམ་འཁྲི་ཤིང་དུས་རབས་བཅུ་བདུན་པའི་ནང་བརྐོས་པའི་པར་རྐོས། ཤངས་པ་བཀའ་བརྒྱུད་ཀྱི་བླ་བརྒྱུད་རྣམ་ཐར། རྗེ་བཙུན་མི་ཏྲའི་རྣམ་ཐར་སོགས་ཚུད་ཡོད།
བོད་རང་སྐྱོང་ལྗོངས་དཔེ་མཛོད་ཁང་གིས་ད་དུང་གངས་ལྗོངས་གནའ་དཔེའི་གཏེར་མཛོད་ཅེས་པ་སོགས་རྒྱལ་ཁབ་ཀྱི་རྩ་ཆེའི་གནའ་དཔེའི་མིང་མཛོད་དང་། པར་རིས་ཀྱི་གྲས་སུ་ཚུད་པའི་རང་སྐྱོང་ལྗོངས་ཀྱི་ཁག་དང་པོ་དང་གཉིས་པ། གསུམ་པ་བཅས་ཀྱི་གནའ་དཔེ་ཁག ༣༤ དྲ་ཐོག་ཏུ་བཏོན་ཡོད།ཤེས་རྟོགས་བྱུང་བར་གཞིགས་ན། བྱ་ཐབས་དེ་བརྒྱུད་སྤྱི་ཚོགས་ཡོངས་དཔེ་རྙིང་སྲུང་སྐྱོབ་ཀྱི་བྱ་གཞག་ནང་ཞུགས་པའི་རྣམ་པ་བཟང་པོ་ཞིག་ཆགས་ཏེ། བོད་ཀྱི་དཔེ་རྙིང་སྲུང་སྐྱོབ་དང་། བེད་སྤྱོད་ཀྱི་བྱ་གཞག་སྐྱོན་བྲལ་ངང་གོང་འཕེལ་ཡོང་རྒྱུར་སྐུལ་འདེད་ཐེབས་ཡོད་ལ། སྤྱི་ཚོགས་ལ་ཞབས་ཞུ་སྒྲུབ་པའི་ཁྲོད་དཔེ་རྙིང་གི་ནུས་པ་དེ་བས་མང་པོ་འདོན་རྒྱུ་རེད།
ཉེ་བའི་ལོའི་ནང་། རང་ལྗོངས་ཀྱིས་དཔེ་རྙིང་སྲུང་སྐྱོབ་ཉམས་གསོ་དང་ལེགས་སྒྲིག་པར་སྐྲུན་བྱེད་ཤུགས་ཟམ་མི་ཆད་པར་ཆེ་རུ་དང་། དཔེ་རྙིང་གྲངས་གཞི་ཅན་དུ་བསྒྱུར་རྒྱུར་སྐུལ་འདེད་བཏང་ཡོད། དེང་སྐབས་རང་ལྗོངས་ཀྱིས་དཔེ་རྙིང་པོད་༡༨༠༠༠ལྷག་ཙམ་ལ་ཡོངས་བཤེར་ཐོ་འགོད་བྱས་པ་དང་། རིམ་རྩིས་བྱས་པ་ལྟར་ན་ཉམས་རྒུད་ཤུགས་ཆེན་ཕྱིན་པའི་དཔེ་རྙིང་ཤོག་གྲངས་༣༠༠༠ལྷག་ཙམ་ཉམས་གསོ་བྱས་ཤིང་། དཔེ་རྙིང་པོད་༢༩༡རྒྱལ་ཁབ་ཀྱི་རྩ་ཆེའི་དཔེ་རྙིང་མིང་གཞུང་ནང་ཚུད་ཡོད་ལ། གངས་ལྗོངས་ནོར་མཛོད་སོགས་བོད་ཡིག་དཔེ་རྙིང་རབ་དང་རིམ་པའི་ཡོངས་བཤེར་སྲུང་སྐྱོབ་བྱས་པའི་གྲུབ་འབྲས་ལ། དཔེ་ཚོགས་བཅུ་གྲངས་རྩོམ་སྒྲིག་པར་སྐྲུན་བྱས་པར་མ་ཟད། གཞི་རིམ་གྱི་དཔེ་རྙིང་ཉར་ཚགས་ཚན་པ་༡༤ཡི་ཆ་རྐྱེན་ལེགས་གཏོང་རྣམ་གྲངས་སོགས་ཀྱང་ལེགས་པར་སྒྲུབ་ཡོད།
