འགྲོ་བ་མིའི་ལུས་ཀྱི་ཆ་ཤས་སུ་རང་ཆས་ཀྱིས་གྲུབ་པའི་ལུས་ཟུངས་དྲི་མ་ཉེས་པ་དང་བཅས་པ་རྣམས་རྐྱེན་དུས་གདོན་ཟས་སྤྱོད་བཞི་པོ་གང་རུང་གིས་རང་གི་ལྡང་ཚད་ལས་འཕེལ་ཟད་འཁྲུགས་པའི་རྣམ་པར་གྱུར་པ་ལ་ནད་ཅེས་བྱ་བ་ཡིན་ཞིང་། ནད་དེ་ཉིད་ཞི་ཐབས་སུ་གཉེན་པོ་ཤིན་ཏུ་མང་པོ་ཡོད་ན་ཡང་། མདོ་རུ་བསྡུས་ན་སྨན་དཔྱད་ཟས་སྤྱོད་དེ་གཉེན་པོ་བཞི་རུ་འདུས་པར་བོད་ཀྱི་གསོ་བ་རིག་པ་ལས་གསུངས། དེ་ཡང་ནད་ཤིན་ཏུ་ཆུང་ངུའི་རིགས་ལ་ཟས་དང་སྤྱོད་ལམ་གཟབ་པ་ཙམ་གྱིས་རང་ཞིར་འགྲོ་བ་ཡིན། དེ་ལས་ཅུང་ཙམ་ཆེ་ན་ཞི་སྦྱངས་སྨན་གྱིས་ནད་གང་དེ་འཇོམས་པར་བྱ་དགོས། དེས་ཀྱང་མ་ཞི་ན་གཉེན་པོ་ཕྱི་མ་དཔྱད་ཀྱིས་ནད་ཡུལ་དབྱུང་དགོས་པར་བཤད་པ་བཞིན། བོད་ཀྱི་ཡུལ་འདིར་གནའ་སྔ་མོ་ནས་དུགས་ལུམས་བྱུག་པ་སོགས་འཇམ་དཔྱད་དང་། གཏར་བསྲེག་འབིག་པ་སོགས་རྩུབ་དཔྱད། འདྲལ་གཅོད་འདྲུད་འབྱིན་སོགས་དྲག་དཔྱད་དེ་དཔྱད་ཀྱི་རིགས་ཕུན་སུམ་ཚོགས་པོ་དར་ཡོད། དེའི་གྲས་ཀྱི་གཏར་ག་བྱ་བ་འདི་ཡང་གནའ་ནས་དར་སྲོལ་ཤིན་ཏུ་ཆེ་སྟེ། ཏུན་ཧོང་གཏེར་ཡིག་ཁྲོད་དུ་ཞང་ཞུང་གི་དཔྱད་ཕུགས་པ་ཞེས་འབྱུང་བ་སོགས་ཀྱིས་མཚོན་པ་ཡིན་ཞིང་། དེང་གི་ཉམས་ཞིབ་པ་མང་པོའི་ཁྲག་གཏར་བའི་རིགས་པ་འདི་གནའ་བོའི་སྟག་གཟིག་གམ་ནུབ་ཕྱོགས་གྷི་རི་སི་སོགས་ལས་རིམ་པར་འཛམ་གླིང་ཤར་ཕྱོགས་སུ་མཆེད་པ་ཡིན་པར་བཤད། བོད་བཙན་པོའི་སྐབས་སུ་ཡང་སྟག་གཟིག་གི་སྨན་པ་ག་ལེ་ནོས་ཞེས་པས་སྨན་དཔྱད་ཀྱི་རིགས་མང་པོ་བོད་དུ་སྤེལ་བར་ལོ་རྒྱུས་ཡིག་ཚངས་ཁག་ལས་འབྱུང་བ་སོགས་ལ་བསམ་གཞིག་བྱ་རྒྱུ་ཡོད།
དེ་ཡང་མཚོ་བོད་མཐོ་སྒང་གི་ཡུལ་ལུང་ཕལ་ཆེ་བ་ནི་མཚོ་འཕགས་སྨི་4000ཡས་མས་སུ་འཚོ་བ་རོལ་བཞིན་ཡོད་པས་ས་བབ་མཐོ་བ་དང་། གསོ་རླུང་ཉུང་བ་སོགས་རང་བྱུང་ཁམས་ཀྱི་ཆ་རྐྱེན་དང་། ནོར་ལུག་གི་ཤ་ཚོན་པོ་དང་། འབྲི་མར་སོགས་བཅུད་ཆེན་བཟའ་བཅའ་ཁ་ཟས་སུ་རྒྱུན་པར་བསྟེན་བཞིན་ཡོད་པ་སོགས་འཚོ་བའི་གོམས་གཤིས་ཀྱི་ཁྱད་ཆོས་ལས་ཡུལ་འདིར་གནས་པའི་མི་རྣམས་ལ་ཁྲག་ངན་འཕེལ་བ་དང་། ཁྲག་ཞག་རྒྱས་པ། སྙིང་གི་འཕར་གྲངས་མགྱོགས་པ་སོགས་ཀྱི་བདེ་ཐང་མིན་པའི་གནད་དོན་འབྱུང་བ་ནི་རྒྱུན་མཐོང་དུ་གྱུར་ཡོད། ཁྲག་ནད་ཁྲག་གིས་བཅོས་ཞེས་པ་བཞིན་ཁྲག་ངན་འཕེལ་བ་དང་། ཁྲག་གྲིབ་སོགས་ཁྲག་དང་འབྲེལ་ཡོད་ཀྱི་ནད་མང་པོ་ཞིག་ལ་ཁྲག་གཏར་ནས་ངན་ཁྲག་ཕྱི་ལ་བཏོན་ཏེ་གསོ་བཅོས་བྱས་ན་ཕན་འབྲས་མངོན་གསལ་གྱིས་ཡོད་པ་དང་། ཡུལ་ཁམས་ཀྱི་ཆོས་ཉིད་དང་། མིའི་སེམས་ཁམས་སོགས་ལ་གསོ་བཅོས་དེ་ཉིད་ཤིན་ཏུ་མཐུན་པོ་ཡོད་པས་དེང་སྐབས་ཀྱང་ལག་ལེན་དེ་ཉིད་ནད་ཐོག་དངོས་ལ་བེད་སྤྱོད་གཏོང་གི་ཡོད།
དེ་ལྟ་ན་ཡང་ཁྲག་གཏར་བ་ལ་ལོ་ཟླ་ཞགས་དུས་ཀྱི་རྩིས་དང་བླ་གནས་བརྩི་བ་སོགས་རིང་བའི་སྔོན་འགྲོ་དང་། བསྙལ་གདན་བསྙལ་ཐག་གྲ་སྒྲིག་བྱ་བ་སོགས་ཉེ་བའི་སྔོན་འགྲོ་སྟེ་ཁྲག་མ་གཏར་བའི་སྔོན་དུ་བསྒྲུབ་དགོས་པའི་གྲ་སྒྲིག་གི་བྱ་གཞག་མང་པོ་ཞིག་ཡོད་པ་ལས་མང་ཆེ་བ་སྨན་པའི་ངོས་ནས་བསྒྲུབ་དགོས་པ་ཤ་སྟག་ཡིན་ལ། སྐབས་འདིར་བཤད་པ་ནི་ནད་པའི་ངོས་ནས་བསྒྲུབ་དགོས་པའི་སྔོན་འགྲོའི་ཆོ་ག་ཡིན།
དེ་ཡང་ནད་ཁྲག་དང་ཟུངས་ཁྲག་གཉིས་མིའི་ལུས་ཀྱི་རྩ་སྦུབས་སུ་དབྱེར་མེད་དུ་འདྲེས་ཡོད་པས། ཁྲག་མ་གཏར་བའི་སྔོན་ཞག་མ་གསུམ་ཙམ་གྱི་གོང་ནས་ནད་ཁྲག་དང་ཟུངས་ཁྲག་སོ་སོར་དབྱེ་བའི་སྨན་ལ་འབྲས་བུ་གསུམ་ཐང་སོགས་ཐང་གི་རིགས་གདུས་ནས་ནད་པ་སུ་ཡིན་པ་དེ་ཉིད་ཀྱིས་སྨན་པའི་མངག་བྱ་ལྟར་བསྟེན་དགོས། དེ་ཡང་དེའུ་དམར་དགེ་བཤེས་བསྟན་འཛིན་ཕུན་ཚོགས་ཀྱི་གཏར་གདམས་ལས། ནད་ཁྲག་ཟུངས་ཁྲག་འོ་མ་ཆུ་འདྲེས་འདྲ། །འབྲས་བུ་གསུམ་ཐང་ངང་བ་ཆུ་འབྱེད་འདྲ། །ཞེས་སོགས་གསུངས་ཡོད་པ་དང་། ནད་ཐོག་ལག་ལེན་དངོས་ཀྱི་ཁྲོད་ཀྱང་དེ་ལྟར་ཡིན་ནོ། །
ལུས་ཀྱི་ནད་རླུང་མཁྲིས་བད་ཀན་སོགས་མི་འདྲ་བ་སོ་སོར་ཐང་གི་སྦྱོར་བ་ཡང་མི་འདྲ་བ་སོ་སོ་ཡོད་ཅིང་། གཙོ་བོ་སྨན་པ་གང་ཉིད་ཀྱིས་མངག་བྱ་ལྟར་ཁྲག་གཏར་དགོས་པའི་ནད་པས་ཐང་བསྟེན་པ་གལ་ཆེ། འདིར་ནད་ཟུངས་ཁྲག་སོ་སོར་དབྱེ་བའི་ཐང་གི་རིགས་མི་འདྲ་བ་ཁག་གསལ་བཤད་ཅིག་ཞུས་ན། གཏར་གདམས་ལས། རླུང་དང་ཚ་བ་འབྱེད་ལ་སླེ་ཏྲེས་ཐང་། །བད་རླུང་ཁྲག་འབྱེད་མ་ནུ་སླེ་ཏྲེས་སྐྱུར། །འཐབ་དང་འདུས་པ་འབྱེད་ལ་སྐྱུ་རུའི་ཐང་། །ཁྲག་མཁྲིས་འབྱེད་ལ་སླེ་ཏྲེས་བ་ལེ་ཀ །སྨིན་བྱེད་མྱུར་དུ་དགོས་ཚེ་སླེ་ཏྲེས་ཐང་། །མ་སྨིན་ཁྲག་སྙིགས་འབྱེད་ལ་མ་ནུ་དང་། །ཀཎྚ་སླེ་ཏྲེས་སྐྱུ་རུའི་བསྡུས་ཐང་གཏོང་། །དེ་ལྟར་ནད་ཁྲག་ཟུངས་ཁྲག་འབྱེད་བྱས་ནས། །ཞེས་སོགས་རྒྱས་པར་བསྟན་པ་བཞིན། ཁྲག་གཏར་བའི་ཉིན་གསུམ་ཙམ་གྱི་སྔོན་ནས་ནད་པའི་རླུང་མཁྲིས་བད་ཀན་སོགས་ནད་ཀྱི་ཁམས་དང་བསྟུན་ནས་ཐང་གི་རིགས་གང་ཡང་རུང་བ་རེ་ངེས་པར་དུ་བསྟེན་དགོས། དེ་ལྟར་མི་བསྟེན་པར་ཐད་ཀར་སྨན་པའི་སར་སོང་ནས་ཁྲག་གཏར་བའམ། སྨན་པའི་མངག་བྱ་ལྟར་ནད་པས་ཐང་མ་བཏུང་བར་ཁྲག་གཏར་ན། ནད་ལ་ཕན་ཐོགས་མེད་པའི་སྟེང་དུ་གནོད་སྐྱོན་ཡང་མང་པོ་ཡོད། དེ་ཡང་ཕྱི་མ་རྒྱུད་ལས། ཐང་མ་བཏང་བར་གཏར་ན་ཟུངས་ཁྲག་འཆོར། །ནད་ཁྲག་མི་ཐོན་ཟུངས་ཟད་ནད་རོ་ལུས། །ཞེས་དང་། མཚལ་ཁུ་ཚོ་ཁུ་འདྲ་བ་ཟུངས་ཁྲག་ཡིན། །དེ་རྣམས་ཅུང་ཟད་ཙམ་ཡང་གཏར་མི་རུང་། །ཞེས་པ་སོགས་ཤིན་ཏུ་རྒྱས་པར་བསྟན་ཡོད་པས་འདི་ལ་གཟབ་ཤེས་པ་གལ་ཆེ་ཞིང་། ཐང་མ་བཏང་བར་གཏར་རུང་བར་བཤད་མཁན་གྱི་སྨན་པ་ཡོད་ན་དེ་ནི་བོད་ཀྱི་གསོ་བ་རིག་པའི་གཞུང་ལུགས་དང་རྒྱབ་འགལ་དུ་སོང་ཡོད་པ་ཤེས་དགོས་སོ། །
