ཨ་མ་ལགས།
དེ་རིང་བུ་མོ་ངས་ཁྱེད་རང་དྲན་བཞིན་ཡོད།
དྲན་པའི་མིག་ཆུ་ཆུ་འཛིན་དཀར་པོའི་ཀློང་ལ་འཐིམས།
དེ་རིང་ཁྱེད་ཀྱི་ཕྱོགས་སུ་རྒྱུ་བའི་ཆུ་འཛིན་གྱི་ཕུང་པོ་རེ་རེ།
ཁྱེད་ཀྱི་ཕྱོགས་ནས་འབབ་པའི་ཆར་འཇམ་གྱི་ཟེགས་མ་རེ་རེ།
བུ་མོ་ངས་ཁྱེད་རང་དྲན་པའི་དྭངས་གསལ་གྱི་མིག་ཆུའི་རྡོག་པ་རེ་རེ་ཡིན།
ཨ་མ་ལགས།
དེ་རིང་ནི་མ་ཡུམ་གྱི་དུས་ཆེན་ཡིན་ལ།
བུ་མོ་ངས་ཁྱེད་རང་ལྷག་ཏུ་དྲན།
དེ་རིང་བུ་མོ་ང་ཨ་མ་ཁྱེད་དང་མཉམ་དུ་ཡོད་ན་ཅི་མ་རུང་།
བུ་མོ་ངས་རྒྱང་རིང་ནས་ཁྱེད་ཀྱི་ཕྱོགས་ལ་མིག་ཟུང་གྱེར་བཞིན།
མ་ཁྱེད་རང་ཚེ་ཐག་ཆུ་ལས་རིང་ཞིང་།
མྱུར་དུ་ནད་ལས་གྲོལ་བའི་སྨོན་ལམ་ཡང་ཡང་འདེབས་བཞིན་ཡོད།
