ལྷོད་ཀྱིས་ལྡིང་བའི་སྤྲིན་པའི་གཤོག་རླབས།
སྐར་ཚོམ་ལ་དགོད་ཁ་མེད་དུས།
བྱ་ཁུ་བྱུག་གང་གི་སྨྲེང་འཁུར་ནས།
རྒྱང་རིང་གི་ནམ་མཁའ་གང་ལ་འཕུར་སོང་།
ཁ་བ་ཡིད་ཚིམ་པ་ཞིག་ས་ལ་འཐོར་ཚེ།
རྒྱ་སེ་མེ་ཏོག་གི་རྐང་གཉོམ་པོ།
ཁུ་བྱུག་ལ་བརྩེ་བ་མེད་ཀི་མ་ཟེར།
བར་ཐག་དེ།
དཔྱིད་འགོ་མའི་དགུ་ཚིགས་ཁོ་ནར་སྲིད་པས།
སུན་སྣང་གི་རེ་ལ།
ངས་ཁུ་བྱུག་གི་དོད་ཀྱིས་ཁྱོད་ལ་གླུ་ཆུང་རེ་ལེན།
རྩྭ་ཐང་གི་རྨི་ལམ། ད་ལོའ་ིདབྱར་དྲུག་པ།
སྐྱེས་ཚུལ་ཐེངས་ཤིག་གི་མངལ་སྒོ་ཕྱེས་ཡོད་ན།

ཁུ་བྱུག་གི་སྙིང་ཆུང་དམར་པོ།

ཁྱོད་ཀྱི་ཕྱིར་དུ་ནམ་ཡང་ཁེར་རྐྱང་མིན།
དུངས་པ་མཚོ་མོ་ཡིན་པའི་ལོ་ཟླ་རུ།
ལྷོད་འཇམ་གྱི་ཟླ་འོད་ལྷ་མོ།
དཀར་སོབ་སོབ་ཀྱི་མཚན་མོ་རེར།
ངའང་མེ་ཏོག་དམར་ཆུང་ཞིག་གི་ཉམས་ཀྱིས།
ཁྱོད་ཀྱི་འཛུམ་བག་ལ་སེམས་པ་ཁེན་ནས།
ཁུ་བྱུག་གི་བརྩེ་བའི་གཏམ་རྒྱུད་ཁྱོད་ཀྱི་སྙིང་ལ་ལྷུག་པར་བཤད་ཆོག
ཟླ་འོད་ལྷ་མོ།
དབྱར་གཞུང་གི་ནམ་མཁའ་ཞིག་ལ།
ཐོལ་གྱིས་འབབ་པའི་རྫ་ཆུའི་དྭངས་ཤ་འདིའང་།
རི་དཔུང་བརྒྱ་ཚོགས་ཀྱི་བརྩེ་བ་ཟོལ་མེད་དེ་ཡིན་ན།
ང་དང་ཁྱོད་ཀྱི་བར་ཐག་ཀྱང་གནམ་དང་ས་ཡིན་པར་སྐྲག་མི་དགོས།
རླུང་བུ་འཇམ་པོ་ཞིག་གི་བང་རིམ་ནས།
ངའང་། ཁ་ཁུ་སིམ་མེར་ནམ་མཁའི་དབྱིངས་སུ།
དགའ་ལྷང་ལྷང་། དགའ་བས་ཡོང་ཆོག །