གཙོད་གྲོང་གི་གནམ་གཤིས་ནི་བུ་མོ་གཅེས་ལངས་ཤིག་གིས་དགའ་སྡུག་བྱེད་པ་བཞིན་དྭངས་འཐིབ་ལ་ངེས་པ་འཛིན་རྒྱུ་མེད་ལ། སྤྱིར་ན་སྤྲིན་བྱེའུ་མགོ་ཙམ་ཡང་མེད་ས་ནས། ཐོག་སྟ་རེ་འདྲ་ཞིག་འཕེན་དོན་མེད། ཞེས་པའི་གཏམ་དཔེ་ཡོད་མོད། འོན་ཀྱང་གཙོད་གྲོང་གི་གནམ་གཤིས་ནི་སུས་ཀྱང་ཆ་འཇོག་དཀའ་བའི་སྒྱུ་མའི་བྲོ་གར་ཞིག་དང་མཚུངས་ཏེ། སྔོ་བསང་བསང་གི་གནམ་མཁར་སྤྲིན་བྱེའུ་མགོ་ཙམ་ཡང་མཐོང་རྒྱུ་མེད་པར་གློ་བུར་ཨ་སྔོན་ཧྲིལ་བོར་སླ་ངའི་ཞབས་ལྟར་ནག་འཐིབ་བེར་གྱུར་ཏེ་ཆར་རྒྱུན་ཟོ་ཞབས་བརྡོལ་བ་ལྟར་བྱོ་འོང་། དེ་བས་སྔོ་སང་སང་གི་ནམ་མཁར་བལྟས་ནས་དེ་རིང་གནམ་ངོ་ཐང་སྲིད་ཅེས་ཐག་ཆོད་དང་གདེང་ཚོད་མངའ་བའི་སྐད་ཆ་ཤོད་ཕོད་མཁན་ཤིན་ཏུ་དཀོན།
དེ་རིང་ཞོགས་པར་ལས་ཚོགས་སུ་ཞུགས་དུས་གནམ་མཁའ་གཡའ་དག་ཅིང་སྤྲིན་པ་སེན་མགོ་ཙམ་ཡང་མཐོང་ལམ་དུ་མངོན་རྒྱུ་མེད་ནའང་། གཞུང་ལས་ཁང་ནས་ཞོགས་ཇ་སྟབས་བདེ་རེ་དང་ཆུ་རྒོད་ཕོར་བ་གང་འཐུང་མ་ཚར་ཙམ་ལ། གནམ་ངོ་ནི་སུ་ཞིག་གིས་ཁ་ཀློང་བ་བཞིན་ནག་འཐིབ་འཐིབ་ཏུ་གྱུར་ཏེ་བལྟས་བལྟས་རིག་རིག་ལ་ཟོ་ཞབས་བརྡོལ་བ་ལྟར་ཁངས་ཆར་འདྲེས་མ་ཞིག་ཤག་ཤག་ངང་བྱོ་འོང་། དབྱར་ཉིན་གཅིག་ལ་དྲོ་འཁྱག་གསུམ། མི་ཚེ་གཅིག་ལ་སྐྱིད་སྡུག་གསུམ་ཞེས་པ་ཅི་མ་བདེན། གནམ་ཐང་ངོ་སྙམ་པའི་དགའ་མགུས་མ་ཚིམ་གོང་ལ་གནམ་ངོ་ཧྲིལ་བོ་སྤྲིན་ནག་གི་ཡོལ་བས་སྒྲིབ་ཏེ་ནག་འཐིབས་སེ་སོང་བས། ད་ལྟ་སེམས་ངལ་དང་མནོངས་འགྱོད་ཡོད་ཚད་ཁུར་བོ་བཞིན་ཕོབས་ཏེ་ཉི་འོད་ཀྱི་བདེ་བའི་ཀློང་ནས་ཞེ་ལྷོད་མོས་ངལ་ཞིག་གསོ་འདོད་པའི་རེ་བ་དེ་དོན་ཐོག་ཏུ་འཁྱོལ་དཀའ་བར་གྱུར། སྨུག་སྤྲིན་སྐྱ་རིས་བཞིན་གང་སར་ཡན་པའི་སེམས་པ་དེ་ཅི་ཡིན་འདི་ཡིན་མེད་པར་འཁྱག་སིབ་བེ་གྱུར་ཅིང་། དེ་མུར་ཚགས་པར་སྟེང་གི་ཚོན་ཁྲའི་པར་རིས་རེ་རེར་མིག་མྱུལ་བྱེད་བཞིན་ཉི་མ་འཁྱོལ་ཐབས་བྱེད་པའི་མོད་ལ། ཆུང་མས་བཏང་བའི་ཁ་པར་གྱི་དྲིལ་བརྡ་དེ་རྣ་ལམ་དུ་སངས་སེ་གྲགས་བྱུང་། མོས་ཅུང་མ་རངས་པའི་སྐད་གདངས་ཀྱིས་ཁ་པར་ལས་ལེ་གདའི་ཚུལ་དུ། དེ་རིང་ནི་ཅི་ཞིག་གི་ཉིན་མོ་ཡིན་པ་ཨེ་ཤེས་ཟེར། གབ་ཚིག་ལྟ་བུའི་དྲི་བ་དེས་ང་རང་སླར་ཡང་ལན་རྙེད་དཀའ་བའི་མུན་དོང་ཞིག་ཏུ་བསྐྱལ། ངས་དེ་མ་ཐག་བློ་རིག་ཐ་གུ་བཞིན་སྒྲིམ་ནས་ཞིབ་འདང་ཇི་ལྟར་བརྒྱབ་ཀྱང་མོས་གླེང་བའི་དམིགས་བསལ་གྱི་ཉིན་མོ་དེ་ཅི་བྱས་ཀྱང་ཁེད་མ་ཐུབ་པས། རེ་ཞིག་ལ་ཅི་ཞིག་ཤོད་དགོས་པ་མི་ཤེས་པར་གྱུར། ཡུད་ཙམ་འགོར་རྗེས་མོས་ཁ་པར་ལས་ཅུང་མ་རངས་པའི་ཚུལ་གྱིས། ཉེ་བའི་ལོ་འདི་དག་ལ་ཁྱོད་ཀྱིས་ངའི་དོན་ལ་སེམས་ཁུར་བྱས་མྱོང་བ་ཞིག་ཡིད་ངོར་འཆར་རྒྱུ་མེད་ཟེར་བཞིན་ཁ་པར་གྱི་སྒོ་ཁྲོགས་སེ་གཏན་བྱུང་།
དེ་མུར་ང་ལ་ཟད་མི་ཤེས་པའི་གནོང་འགྱོད་སྐྱེས་བཞིན་ཡིད་སེམས་བློང་བློང་ངང་ཁ་པར་བླངས་ནས་སྐད་འཕྲིན་གྱི་བར་སྟོང་མྱུལ་བ་ན། ཚང་མས་གཅིག་གིས་གཅིག་ལ་ཁ་གཡང་དང་སྨོན་ཚིག་འབུལ་རེས་བྱེད་བཞིན་ཤ་མགྲོན་ཆང་མགྲོན་གྱི་དུས་སྟོན་རོལ་བའི་པར་རིས་སྣ་ཚོགས་གྲོགས་ཚོམ་དུ་སྤེལ་འདུག །གསུམ་བརྒྱད་བུད་མེད་དུས་ཆེན་བསུ་ཞེས་ཡེ་གེ་རྟ་མགོ་འདྲ་བ་རེའི་འོག་ན་བུད་མེད་གནམ་གྱི་ཕྱེད་ཀ་ཡིན་ཚུལ་དང་བུད་མེད་རླབས་ཆེ་ཚུལ་གྱི་དཔྱད་བརྗོད་མང་བོ་སྤེལ་ནས་ཕན་ཚུན་བརྒྱུད་བསྐུར་བྱེད་བཞིན་པ་མཐོང་བྱུང་བས། ད་གཟོད་ང་ནི་གཉིད་ལས་སད་པ་བཞིན་ད་ཅིའི་ཆུང་མས་ཟེར་བཞིན་པའི་གབ་ཚིག་ལྟ་བུའི་ཉིན་མོ་དམིགས་བསལ་བ་དེ་ནི་བུད་མེད་དུས་ཆེན་ཡིན་པ་གཞི་ནས་ཁེད་སོང་། ནམ་རྒྱུན་འཚོ་བའི་ཁྲོད་དུ་འདི་དང་འདི་ལྟ་བུའི་དུས་ཆེན་ག་འདྲ་མང་བོ་ཞིག་ཆུ་མོའི་འགྲོས་བཞིན་གང་ཞིག་ཏུ་བཞུར་ནས་ཚར་ནའང་། ངས་དེ་དག་ལ་སྣང་དོགས་ཙམ་ཡང་མེད་པར་རང་གི་དགའ་ཕྱོགས་ཤིག་གི་དོན་དུ་གཉེར་བཞིན་ཉེ་འཁོར་གྱི་ཤ་ཚ་ཞིང་སྙིང་ཉེ་བའི་མི་དག་ལ་མཐའ་ན་དུས་ཆེན་གྱི་འཚམས་འདྲི་ཞིག་ཀྱང་བྱེད་མ་ཐུབ་པ་ནི་ཅི་འདྲའི་ངོ་གནོངས་དགོས་པའི་དོན་ཞིག་རེད་ཨང་སྙམ་བྱུང་།
ངས་དེ་མུར་མནོངས་འགྱོད་ཀྱི་མགོ་བོ་འཕྲུག་ཙམ་བྱེད་བཞིན་ཁ་པར་གྱི་སྒོར་ཁུག་ཡང་ཡང་སྔོག་ནས་སྒོར་རྡོག་ཁ་ཤས་ཁུག་དམར་ཏུ་བཏུམས་རྗེས་རང་གི་སེམས་མཚོན་བྱེད་ཙམ་ཞིག་ཆུང་མར་དུས་ཆེན་བསུ་བའི་ལེགས་སྐྱེས་སུ་ཕུལ་བ་ཡིན། གཅིག་བྱས་ན་ཞིང་གྲོང་ནས་ནར་སོང་ཞིང་གྲོང་གི་འཚོ་བའི་བག་ཆགས་བསྒོས་པའི་རང་ཉིད་ལ་མཚོན་ན། ལས་ཀའི་བྲེལ་གསེང་དང་ཉིན་གཅིག་གི་བཟའ་བཏུང་གི་རྩོལ་སྒྲུབ་ལས་གཞན་རྒྱས་སྤྲོས་ཀྱི་དུས་ཆེན་འདི་རིགས་ལ་ཁ་ཡ་བྱེད་པའི་མཐུན་རྐྱེན་མི་འཛོམས་ལ། དུས་ཆེན་གྱི་དགའ་སྟོན་ལ་རོལ་བའི་གོམས་གཤིས་ཆགས་མེད་ནའང་། ས་ཡར་ཀླུང་ཁོག་ནས་བསྡད་ན། ལྷ་ཡར་ལྷ་ཤན་པོ་ཉན་དགོས་ཞེས་པའི་དཔེ་ལྟར་རང་ཉིད་འཚོ་སྡོད་ཀྱི་ཁོར་ཡུག་དང་བསྟུན་པའི་མི་ཆོས་འགྲོ་ལུགས་སྐྱོང་རྒྱུ་ནི་མི་ཞིག་ལ་མཚོན་ན་སྤྱོད་པ་མི་དང་བསྟུན་ཐབས་བྱེད་པའི་གནས་ལུགས་གལ་ཆེན་ཞིག་ཅི་ལ་མིན་ཨང་། དེ་བས་ཚང་མས་སྤྲོ་སྤྲོ་སྐྱིད་སྐྱིད་བྱེད་པའི་དུས་ཆེན་འདི་ལ་ཁ་ཡ་མེད་པར་རྣར་ལག་པས་བཀབ་ནས་འདུག་རྐྱང་བྱེད་ཐབས་མེད་པས། རང་གི་ཚོད་ཀྱིས་གསོལ་སྟོན་ཆུང་ཆུང་རེ་མི་བཤམས་ཀ་མེད་དུ་གྱུར། ཆུང་མས་རེ་ཞིང་སྒུག་པའི་དུས་ཆེན་གྱི་གསོལ་སྟོན་ཆུང་ཆུང་འདིར་འཆར་ཡན་གྱི་མཁའ་དབུགས་གསར་པ་རེ་སྣོན་ཆེད། ཁ་གཡང་དང་བསྟོད་ཚིག་སྟབས་བདེ་རེས་སྣེ་དྲངས་ཏེ་རྟེན་འབྲེལ་གྱི་ལེགས་སྐྱེས་ཆུང་ཆུང་ཞིག་གྲ་སྒྲིག་བྱས་ནས་ཁོ་མོར་ཕུལ་བ་ན། མོའི་གཉེར་རིས་ཤ་ཤུར་བབ་པའི་གདོང་ལ་བཅོས་མིན་གྱི་འཛུམ་མདངས་མཐོང་དཀོན་པ་རེ་མངོན་བཞིན། ངས་ཁྱེད་ལ་བུ་ཕྲུག་གཉིས་ཀ་གཉོར་སྐྱོང་བྱས་པའི་དྲིན་བརྗེད་མི་འདུག་ཟེར་བཞིན་ཡིད་ཚིམ་ཚིམ་བྱེད། ཁོ་མོའི་དགའ་མགུས་ཚིམ་པའི་མིག་ཟུང་གི་འོད་མདངས་དེས་ངའི་སེམས་ལ་ཡུན་རིང་མ་མྱོང་བའི་དྲོད་ཁོལ་ཞིག་འཁྱིལ་དུ་བཅུག །ཞིབ་ཏུ་བསམ་ན་ངེད་གཉིས་ཁྱིམ་གཞི་གཅིག་ལ་འཛོམས་ནས་སྐྱིད་སྡུག་གི་ཁུར་བོ་མཉམ་ཁུར་གྱིས་ཁྱིམ་ཚང་ཆུང་ཆུང་ཞིག་གི་མགོ་རྔ་བསྐྱངས་ནས་མི་ལོ་ཉི་ཤུ་ལྷག་འགོར་ལ་ཉེ་མོད། ངས་ཐ་ན་ལེགས་སྐྱེས་ཤིག་ཕར་ཞོག་ཁ་ཚིག་སྙན་མོས་ངོ་བསྟོད་ཙམ་ཡང་བྱས་མ་མྱོང་བ་འདྲ་བས། ལོ་ཚོད་ཀྱིས་དེད་པའི་སེམས་པ་གཉོམ་པོ་འདི་གནོངས་འགྱོད་ཀྱི་ཁུར་བོ་ལྕི་མོ་ཞིག་གིས་མནན་ནས་དབུགས་ཀྱང་ལེན་དཀའ་བའི་སྣང་བ་ཞིག་སྟེར་འོང་།
དྲ་ཚོམས་སུ་རྟེན་འབྲེལ་ཞུ་མཁན་སྔར་བས་ཇེ་མང་དུ་སོང་ཞིང་། ཚིག་བརྗིད་པོ་དང་གཏམ་སྙན་མོའི་མགོ་རྐང་སྒྲིག་མཁན་ཚོས་ཕན་ཚུན་ལ་དོན་དངོས་ལས་འདས་པའི་བསྟོད་ར་སྣ་ཚོགས་འཐེན་བཞིན་ཁ་གཡང་འབོད་རེས་བྱེད་བཞིན་འདུག །ཕོ་ལོ་བཞི་བཅུའི་ཉག་ཁིས་སུ་སླེབས་པའི་ལོ་ཚོད་འདིར། སེམས་རྣལ་མས་ཞིབ་འདང་ཇི་ལྟར་བརྒྱབ་ཀྱང་། ད་ལྟའི་བར་ངས་རང་གིས་རང་ལ་རྟེན་འབྲེལ་ཞུ་འོས་པའི་དོན་དག་ཅི་ཡང་བྱུང་མ་མྱོང་བ་འདྲ་ཏེ། ཕལ་བའི་མི་ཚེ་ཡི་གོམ་སྟབས་རེ་རེར་ཕར་ལ་བསྒྱུར་དུས། འགྲོ་ཤེས་ཀྱི་ཝ་མོ་ཀུམ་ཀུམ་དང་འདུ་ཤེས་ཀྱི་རི་བོང་ཙོག་ཙོག་བྱས་ནས་འོང་བས། གཡུ་འབྲུག་མཁའ་ནས་ལྡིར་བའམ་མཚོ་རླབས་དགུང་ལ་འཕྱོ་བ་ལྟ་བུའི་མིང་དང་གྲགས་པའི་ཟིན་ཐོ་སྐྲུན་མྱོང་མེད་ལ། གཏམ་ངན་གླིང་ལ་ཁྱབ་ཅིང་མི་གཞི་ཐང་ལ་འདེབས་པའི་སྦྱོར་ངན་ནི་དེ་བས་ཀྱང་བརྩམས་མྱོང་མེད་པས། ངས་ནམ་ཡང་འགྲོགས་བདེ་གཤིབ་བདེ་ཡི་ཕལ་བའི་མི་ཚེ་སྐྱེལ་སྟངས་འདི་ནི་རང་ལ་མཚོན་ན་རྐང་ལ་རན་པའི་ལྷམ་ཞིག་ཅིས་མ་ཡིན་འདོད་ཡོད། དེ་རིང་ཡང་གྲོགས་པོ་ཡིན་ཟེར་མཁན་ཞིག་གིས་ཕྱི་རུ་ཤོག་དང་མཉམ་དུ་ཆང་འཐུང་ཟེར། ཁ་བརྡའི་འགྲོས་མི་མཐུན་པའི་ཁར་མི་ཞིག་ལ་ནམ་རྒྱུན་ཡ་ཡ་ཡིན་ཡིན་ཟེར་ནས་བདེན་ཁ་སྟེར་རྐྱང་བྱ་རྒྱུ་ནི་རང་ལ་མཚོན་ན་གཡག་རྒན་གྱི་གཉའ་ནས་གནོན་བཞིན་ཆུ་འཐུང་དུ་བཅུག་པའི་ལོ་རྒྱུས་ལས་མ་འདས་མོད། ཁོའི་ཨུ་ཚུགས་ཀྱི་ཁ་པར་དེ་ལྕགས་ཀྱི་དྲིལ་བུ་ཆེན་པོ་ཞིག་དང་འདྲ་བར་རྣ་ལམ་དུ་ཡང་ཡང་དཀྲོལ་འོང་བས། གཞན་གྱིས་མི་སར་བཞག་ནས་མགྲོན་འབོད་བྱ་དུས་ཁ་གཡར་ས་སྣ་ཚོགས་བཙལ་ནས་མི་ཁོམ་མི་ནུས་ཚུལ་ལུང་བ་གང་བརྗོད་ན་བློ་དམན་རང་རྩིས་ཆེ་སོང་བ་ལྟ་བུར་གྱུར་འགྲོ་བས། ཁོ་བོའི་མགྲོན་འབོད་དེ་དང་ལེན་བྱེད་བཞིན་རང་དང་འབྲེལ་མེད་ཀྱི་སྒྲུང་གླུ་ལྟ་བུའི་ཉོག་གཏམ་རིང་མོ་དེ་ཅིས་ཀྱང་མི་ཉན་ཀ་མེད་བྱུང་།
ལོ་ན་ཚོད་ཇེ་ཆེར་འགྲོ་བའི་འགྲོས་དང་བསྟུན་ནས་གྲོགས་པོའང་ཇེ་ཉུང་དུ་འགྱུར་སྲིད་ཟེར་བ་ངོ་མ་བདེན་པ་འདུག །སྤྱིར་ན་གྲོགས་པོ་བརྒྱ་ཡོད་ན་མང་སྟངས་དང་དགྲ་བོ་གཅིག་ཡོད་ན་ཉུང་སྟངས་ཞེས་པའི་གཏམ་དཔེ་དེ་བདེན་པར་འཁུམས་མོད། འོན་ཀྱང་ང་རང་གྲོགས་པོ་མང་བོ་མེད་མཁན་གྱི་རིགས་དེ་ཡིན་ལ། ངོ་འཕྲད་མ་ཐག་འུ་གཉིས་གྲོགས་པོ་རྣམ་དག་ཡིན་ཟེར་མཁན་གྱི་མི་དེ་དག་ལ་གྲོགས་པོ་སྒྲིག་རྒྱུར་དེ་བས་ཀྱང་དགའ་བོ་མེད། དེ་ནི་ང་རང་རང་བརྩི་ཆེ་བས་མིན་པར། ཁོ་ཚོ་ནི་དུས་ཀྱིས་ཚོད་བགམ་ཐེག་ཐུབ་པའི་གྲོགས་པོ་རྣམ་དག་དུ་འགྱུར་མི་སྲིད་པའི་གསང་བ་དེ་རྟོགས་པས་ཡིན། དགའ་སྐྱོ་འདུ་འབྲལ་གྱི་འཚོ་བའི་མྱོང་བརྒྱུད་རེ་རེར་དཔྱིད་ཀྱི་ནམ་ཟླ་ལྟར་མགོ་ལ་སྨིན་དུས། ད་གཟོད་བློ་སྙིང་བྲང་གསུམ་གཏད་ཆོག་པའི་བློས་ཐུབ་ཀྱི་གྲོགས་པོ་ནི་མཛུབ་ཀིས་བགྲངས་ཏུ་རུང་བ་ལས་མེད་ལ། དཀའ་སྡུག་དང་དར་རྒུད། འཕེལ་རྒྱས་དང་ཉམས་ཉེས་ཀྱི་འགག་འཕྲང་རེ་རེ་མི་ཚེ་ལ་ཚོད་བགམ་བྱེད་པའི་རྒྱུག་གཞི་བཞིན་མདུན་སར་བཀྲམ་འོང་དུས། ཇ་ཆང་གི་འདུ་འཛིའི་ཀློང་ནས་གྲོགས་པོ་རྣམ་དག་ཡིན་ཟེར་མཁན་དག་ཀྱང་ག་ལ་ཐུག་དུས་བོས་ན་ཨ་ལན་ཡོད་པ་ཞིག་མིན་པར་མི་རྟག་ཆོས་ཉིད་ཀྱི་བདེན་པ་རང་ངོ་སྤྲད་པ་བཞིན་རྒྱང་དུ་བཀྱེད་དེ་རྒྱུས་མེད་ཀྱི་ངོ་གདོང་གཞན་ཞིག་ཏུ་གྱུར་འགྲོ །དེ་བས་བློ་རྣལ་མས་བསམ་གཞིག་རེ་བྱས་ཚེ་རང་ཉིད་ལ་ངེས་དོན་གྱི་གྲོགས་པོ་ཟེར་བ་ག་ཙམ་ཡོད་པ་ཡིད་ཚོད་མི་ཐུབ་ཅིང་། བརྩེ་འདང་འགྱུར་མེད་ཡིན་ཟེར་བའི་རྩེད་གྲོགས་དགོད་གྲོགས་དེ་དག་ཀྱང་ངེས་དོན་གྱི་ཁེ་ཕན་མེད་ན་ཁྱེད་ཀྱི་རྩིབ་ལ་བུང་བ་བཞིན་འཁོར་མི་སྲིད་ལ། དཀའ་སྡུག་དང་ཁེ་ཕན་གྱི་མདུན་ནས་ཚོད་བགམ་མི་ཐུབ་པའི་གྲོགས་པོ་ཉིལ་ཚེ་བ་དེ་ཚོ་དགའ་སྐྱོའི་འཚོ་བའི་ཀློང་ནས་ཤིང་ལོ་རླུང་འཁུར་བཞིན་རིང་དུ་གྱེས་སྲིད་པ་དུས་ཀྱི་ཆོས་ཉིད་ཀློང་ནས་ར་སྤྲོད་ཐོབ་འོང་བས། སུ་ཡིན་ཡིན་ལ་གྲོགས་པོ་བློས་ཐུབ་ཡིན་རབས་ཀྱི་ཁ་ཡག་ངོ་གཏམ་ལུང་བ་གང་རེ་ཤོད་པའི་ཟོབ་རྫུ་ཡི་ཟློས་གར་དེ་ལ་ཞེ་གཏིང་ནས་སུན་སྣང་རེ་སྐྱེས་འོང་། ཡིན་ནའང་དེ་དག་ནི་ཁོ་ཚོའི་འཚོ་བའི་གནས་ལུགས་ཤིག་དང་མི་ཚེའི་འགྲོགས་འདྲིས་བྱ་སྟངས་ཤིག་ཡིན་རྐྱེན། ངས་དཀྱེལ་ཡངས་ཀྱི་འཛུམ་དཀར་ཕྱུང་དགོས་པ་ལས་མི་འདོད་པའི་འཁང་ར་ཡོད་ག་ལ་འོས་ཏེ། མཐར་གཏུགས་ན་རང་སྐྱོན་རི་བོ་འདྲ་བ་ཟུར་དུ་བསྐྱུར་ནས་གཞན་སྐྱོན་ཁབ་རྩེ་ཙམ་ཡང་བློ་ངོར་མི་ཤོང་བའི་མི་དེ་རིགས་ཀྱིས་ནམ་ཡང་གཞན་གྱི་ཡོན་ཏན་མཐོང་དཀའ་ལ། ནང་སེམས་གྱི་དག་སྣང་སྦྱོང་མ་ཐུབ་པའི་སྐྱོན་དུ་འགྲོ་བ་ལས་གཞན་ཅི་ཡང་མིན་ལ། སྐྱོན་འཛུགས་དང་འཁང་ར། ལེ་གདའ་དང་ངན་དམོད་ཀྱིས་དུས་གདའ་བའི་མི་ཞིག་ལ་མཚོན་ན། ནང་སེམས་ལ་མཐར་ཐུག་གི་ལྷིང་འཇགས་ཤིག་རྙེད་དུས་མེད་ལ། གཉུལ་གཤིས་ཀྱི་ངོ་བོས་མ་སྦགས་པའི་རང་ཉིད་ངོ་མ་དེའང་རྙེད་ཐབས་ག་ལ་ཡོད་སྲིད་ཨང་།
དེ་བས་ངས་སྣང་ཚུལ་འདི་རྒྱུན་ལྡན་དུ་བཟུང་ནས་ནམ་རྒྱུན་གྲོགས་པོ་ཞེས་ཁ་ཡག་ངོ་འཛུམ་བྱེད་བཞིན་ག་ལ་ཐུག་དུས་མིག་ཟུར་ཙམ་ཡང་མི་བསྐོར་བའི་གྲོགས་པོ་ཉི་ཚེ་བ་རེ་གཉིས་ལ་དཀྱེལ་ཡངས་སྒོས་བཀའ་དྲིན་ཞུས་ཤིང་། ཁྱེད་ཚོའི་རྒྱབ་འགལ་དང་གཡོ་བསླུ་དེས་ང་ལ་ན་ཟུག་ཅིག་སྦྱིན་པའི་ཞོར་དུ་སྤོབས་པའི་བློ་སྒོ་ཅིག་ཐོལ་གྱིས་ཕྱེ་འོང་བས། མཐར་གཏུགས་ན་ཁྱེད་ཚོ་ནི་ང་རང་ཆོས་དངོས་ཀྱི་བདེན་པ་མཇུག་པའི་བློ་འབྱེད་ལྡེ་མིག་ངོ་མ་དེ་ཡིན་ལ། ངའི་སྐྱིད་སྡུག་འཚོ་བའི་ཀློང་གི་སྒྱུ་མའི་སློབ་དཔོན་དེ་ཅིས་མ་ཡིན་ཨང་སྙམ་འོང་། །
