འགྲོ་བའི་དོན་ལ་བརྩོན་པའི་ཁུར་འཁྱེར་བའི།།

མར་ལེ་གཅིག་ཏུ་བཀུར་བའི་གཟི་བརྗིད་ཅན།།

ཕྱི་ནང་དགྲ་ཚོགས་བཅོམ་པའི་རླབས་པོ་ཆེ།།

གནམ་ས་བླ་འོག་བསྒྱུར་བའི་ཏང་འདི་མཆོག།

ཆུ་ཕག་སྟོན་ཟླ་ར་བའི་ཚེས་གཅིག་ནས།།

ད་བར་ལོ་ཡི་བགྲང་བྱ་བརྒྱ་འདས་པའི།།

བརྩེ་ཆེན་མ་ཡུམ་ཏང་གི་རྒྱལ་མཚན་དེ།།

སྲིད་རྩེར་བསྒྲེངས་ཤིང་སྐྱོད་པ་རྣམ་པར་མཛེས།།

ཟླ་མེད་ཏང་གི་ཡང་དག་འགོ་ཁྲིད་འོག།

དཀའ་ངལ་མཐའ་དག་ཁྱད་དུ་བསད་ནས་ནི།།

སྤྱི་ཚོགས་རིང་ལུགས་འཛུགས་སྐྲུན་བྱེད་པའི་ལས།།

བརྩོན་པའི་ངར་སྒྲ་གླིང་ལྔ་ཀུན་ལ་གཡོས།།

ཏང་གི་མི་རིགས་སྲིད་ཇུས་ཉིན་བྱེད་ཀྱིས།།

བོད་ཡུལ་མཛེས་ལྗོངས་པད་ཚལ་རབ་བསྐྱངས་ནས།།

བགྲང་ཡས་འབངས་རྣམས་ར་ཡིག་གཉིས་པ་ཡིས།།

ཚན་རིག་འཕྲུལ་གྱི་སྦྲང་རྩིའི་བཅུད་ལ་བརྩོན།།

དབུ་འདྲེན་ཏང་གིས་སྤྱི་ཚོགས་རིང་ལུགས་ཀྱི།།

མ་ནོར་ལམ་བཟང་བསྟན་ནས་བདེ་སྐྱིད་ཀྱི།།

མ་འོངས་རྫོགས་ལྡན་གསར་བའི་ཇུས་བཀོད་དེར།།

སུམ་རྩེན་གནས་ཀྱིས་འགྲན་ཟླ་ཡོད་རེ་སྐན།།

གྲངས་མེད་རྒྱུ་སྐར་ཚོགས་ཀྱིས་ཟླ་བ་ལ།།

བསྐོར་བ་ཇི་བཞིན་རླབས་ཆེན་ཏང་རྗེས་ལ།།

འབྲངས་ཏེ་མཐུན་སྒྲིལ་རྡོ་རྗེ་ལྟ་བུ་མཁྲེགས།།

ཕྱི་གླིང་དགྲ་ཚོགས་སྙིང་རྩ་འདར་བཞིན་མཆིས།།

སྲིད་གསུམ་རིན་ཆེན་བྱེ་བའི་སྙིང་བོ་ཀུན།།

གཅིག་ཏུ་སྤུངས་འདྲའི་བོད་ཡུལ་བསིལ་མོ་ལྗོངས།།

ཨེ་མ་རང་རེའི་རླབས་ཆེན་མེས་རྒྱལ་གྱི།།

ངོ་མཚར་འདོད་དགུའི་འབྱུང་གནས་གཙོ་བོར་གྲུབ།།

མཚུངས་མེད་ཏང་གི་ཡང་དག་དབུ་ཁྲིད་འོག།

འབྱོར་འབྲིང་ལམ་དུ་འཕུར་བཞིན་རབ་སྐྱོད་དེ།།

མེས་པོའི་ཁབ་ཀྱི་སྟོབས་འབྱོར་མངའ་ཐང་དེ།།

ཡར་ངོའི་ཟླ་ལྟར་འཕེལ་བ་ཀུན་གྱིས་བསྔགས།།

ཕུན་སུམ་ཚོགས་པའི་དཔལ་ཀུན་འབྱོར་གྱུར་པའི།།

རང་རྒྱལ་མི་རིགས་ལྔ་བཅུ་ལྔ་དྲུག་རྣམས།།

མཁས་མཛངས་ཡང་དག་ཏང་གི་དབུ་ཁྲིད་འོག།

ཀུན་ཞལ་འཛུམ་པའི་བདེ་སྐྱིད་མེ་ཏོག་བཞད།།

ད་ལྟ་ཀྲུང་གོ་ཞེས་པའི་རྒྱལ་ཁབ་འདི།།

གླིང་བཞིའི་དབུས་སུ་ལྷུན་པོ་ལྟར་བརྗིད་ཅིང་།།

སྟོབས་འབྱོར་ནམ་མཁའི་ལྷ་དང་འགྲན་གྱུར་པས།།

འཛམ་གླིང་འགྲོ་ཀུན་བསྔགས་པའི་མེ་ཏོག་འཐོར།།