ལྷ་ས་ན།

ས་ལ་ཐིམ་མི་ཐུབ་པའི།

ངའི་ཨ་མའི་ཐོད་རུས་ཡོད།

ལྷ་ས་ན།

བྲག་ལ་ཟུག་མི་ཐུབ་པའི།

ངའི་ཨ་ཕའི་རྒྱབ་གཟུགས་ཡོད།

བདག་གི་ཨ་མ་མ་ཅིག་ལབ་སྒྲོན་ལགས།

དེ་རིང་། མི་ངོ་ལྷ་ངོ་འཕྲད་པས་དགའ་བ་ལ།

ལྷ་ས་ན། བདེ་བ་ཅན་ལ་འགྲོ་བའི་རྨུ་ཐག་ཡོད་དམ།

བདག་གི་ཕ་གཅིག་སངས་རྒྱས་ལགས།

དེ་རིང་། ལྷ་ངོ་མི་ངོ་མཇལ་བས་སྐྱོ་བ་ལ།

ལྷ་ས་ན། ཉེས་པ་ཅན་ལ་དཔྱངས་པའི་ལྕགས་ཐག་

ཡོད་དམ།

ཨ་མ། ང་རང་ཚེ་ཕྱི་མར་སྐྲག་གི་མེད།

ང་སྐྲག་ས་ནི་ཚེ་ཕྱི་མ་མེད་པ་དེ་ཡིན།

རེས་སུ་འཁོར་བའི་འཚོ་བའི་ཆོས་ཉིད་འདི་ལ་བརྟེན་ན།

ངེད་གཉིས་ཡང་བསྐྱར་མ་བུ་བྱ་ཆོག་ཨང་།

ཨ་ཕ། ངས་མི་རྟག་པའི་སྐྱེ་འཆི་འདི་དང་ལེན་བྱེད་ཀྱིན་ཡོད།

ང་རང་སྐྲག་ས་ནི་བར་དོ་ཟེར་བའི་མུན་པའི་གཅོང་རོང་དེ་ཡིན།

ལས་ཀྱི་འབྲས་བུ་སྨིན་ན།

ངེད་གཉིས་སླར་ཡང་ཕ་བུ་བྱ་ཆོག་ཨང་།

ཨ་མའི་ལྷ་ས་མ་ཅིག་ལབ་སྒྲོན་ཡིན།

ཨ་ཕའི་ལྷ་ས་ཕ་གཅིག་སངས་རྒྱས་ཡིན།

 ༢༠༡༩ལོའི་སྤྱི་ཟླ༨པའི་ཚེས ༥ཉིན་ལྷ་ས་ནས།