སྐབས་སྐབས་སུ། སེམས་པ་ལྷིང་འཇགས་སུ་གཏོང་མི་ཐུབ་པ།

དངོས་ཡོད་ཀྱི་གནས་ཚུལ་ལ་ཤིན་ཏུ་སུན་པས་རེད།

གད་སྙིགས་ལྟ་བུའི་མཁོ་མེད་ཀྱི་ཐ་སྙད་འགས་སེམས་པ་གཙེ་ཡོང་དུས།

ངས་རང་ཉིད་ཀྱི་དྲན་རྒྱུ་མང་བའི་སེམས་པ་འདི་ཡང་།

གཏོས་ཆེ་བའི་མཚན་མོའི་ཁྲོད་དུ་མེ་རུ་སྦར་ན་འདོད།

སེམས་ཀྱི་མེ་ལོང་ངོས་སུ་མི་གཙང་བའི་ས་རྡུལ་གྱིས་གཡོགས་ཀྱང་།

སྐྱོ་གདུང་གི་མིག་ཆུ་དག་ནི་སེམས་ནས་མི་བཞུར་དོན་ཅི་ཞིག་གི་སླད་དུའོ།

ཇི་ལྟར་བཀྲུས་ཀྱང་འདག་ཐབས་མེད་པའི།

སྐྱེ་བ་སྔོན་མའི་ལན་ཆགས་དང་ལས་འཕྲོ་ཡི་ཚིལ་རོ་དག་གི་སྐྱུར་དྲི།

སྐྱེ་བ་མང་པོ་ཞིག་བརྒྱུད་བརྒྱུད་མཐར།

ད་ལྟ་ད་དུང་ཡང་ངའི་སྣ་ལམ་དུ་དྲི་ངན་དེ་དག་འཐུལ་ཡོང་གིན་འདུག

དབུལ་ཕོངས་ཀྱི་དཀར་ཡོལ་ཆག་རོའི་ནང་གི་གསེར་དངུལ་དག་ནི།

མི་དགེ་བའི་སྡིག་སྒྲིབ་ཀྱིས་བཞེངས་པའི་རྣམ་སྨིན་གྱི་ལན་ཆགས་ཉག་གཅིག་གོ།

ངས་རང་ཉིད་ཀྱི་བྲང་གཞུང་གི་ནགས་ཚལ་དུ།

འདོད་ཆགས་དང་ཞེ་སྡང་གིས་བསླངས་བའི་རྔོན་པ་ཞིག་བཏང་།

ད་ལྟ་ང་རང་ཉིད་ཀྱང་དེ་དག་གི་རྗེས་སུ་བསྙེགས་ཏེ།

ང་རང་གི་བྲང་གཞུང་ནས་ང་རང་ཉིད་ཀྱང་བོར་འདུག

སྡིག་སྒྲིབ་ཀྱིས་བཞེངས་པའི་ལུས་སྟེང་གི་རྨ་ཁ་དག་གི་ན་ཟུག

ལན་ཆགས་ཀྱིས་དེད་ཡོང་བའི་མི་ཁོམ་པའི་བྲེལ་ཟིང་གི་སེམས་པ།

རྒྱུ་འབྲས་ཀྱི་ཡལ་གར་བཞད་པའི་ལས་ཉོན་གྱི་ས་བོན།

དེད་དེད་ཀྱང་ཟད་དུ་མེད་པའི་འཇིག་རྟེན་འཁོར་བའི་མུན་ནག

ཇི་ལྟར་ལྷན་པས་གཡོགས་ཀྱང་འཛིན་ཐབས་མེད་པའི་རྣམ་རྟོག་གི་འཆར་ཡན།

མི་དང་མིའི་བར་གྱི་འབྲེལ་བ་ནི་སྐད་ཆས་མཚོན་ཐབས་མེད་ཀྱང་།

སྐད་ཆ་བཤད་སྟངས་ཀྱིས་བར་གྱི་འབྲེལ་བ་ཆགས་འགྲོ་བ་ཞིག་རེད།

སྙིང་ཉེ་ཉེ་ཡིན་ཁུལ་གྱིས།

ཚུར་གམ་དུ་བཅར་མཁན་གྱི་མི་རྣམས་ཀྱི་བརྩེ་བ་ནི།

སྡོང་བོའི་རྩད་པ་ལྟ་བུའི་ཉོག་འཛིང་ཅན་ཞིག་རེད།

དེ་ལྟ་བས་ན། ང་རང་ཉིད་ནི་ནམ་ཡང་ཁེར་རྐྱང་ཁོ་ན་ལ་སྤྲོ་བའི་རི་དྭགས་ཤིག་གོ།

སྤྲོ་སྣང་གི་གླུ་གཞས་ཤིག་གཏོང་འདོད་ཀྱི་སེམས་པ་ལ།

གློ་བུར་དུ་སྡུག་བསྔལ་གྱི་ན་བུན་འཁྲིགས་ཏེ།

མིག་ཆུ་རྡོག་གཅིག་གིས་མིག་མཐར་བརླན་པའི་གཏམ་རྒྱུད་ཀྱི་བང་སོ།

ངོས་གཅིག་ནི་འོད་སྣང་དང་ངོས་གཅིག་ནི་གྲིབ་མས་གྲུབ་པའི་ཁྱིམ་གྱི་རྩིག་པ་དེས།

ངའི་འཇིག་རྟེན་དུ་མུན་པ་ཁོ་ན་བཏང་བའི་ག་ལ་ཚད།

ངའི་མིག་ཟུང་བརྒྱུད་ནས།

འཁྱག་གྲང་གི་དགུན་ཟླ་རིང་མོ་ཞིག་སེམས་སུ་བསྐྱིལ་ནས་བསྡད།

མི་ཁོམ་པའི་བྲེལ་འཚང་གི་བར་ནས།

ཐ་གུ་ཞིག་གི་སྣེ་གཉིས་སོ་སོའི་སེམས་ལ་བཅིངས་འདུག

སྣེ་གཅིག་ནི་གནས་སྐབས་ཀྱི་ཁ་ཟས་སློང་བྱེད་ཀྱི་འཛིན་བྱང་ཞིག

སྣེ་གཅིག་ནི་འཆི་བ་ཁོ་ན་ལ་གདོང་ཐུག་རྒྱག་སའི་སྨག་རུམ་མཐུག་པོ་ཞིག་གོ།