མི་སེམས་རླུང་བལ་གཡོ་བའི་རིས།།

འཛིན་མེད་ཁ་ལོ་བྲལ་བ་གང་།།

དགའ་སྡུག་དྲང་ངེས་འཁྱོག་པོའི་གཞུར།།

མི་ཚེ་ཉག་ཕྲན་ལེགས་སྤྲད་པར།།

དུངས་སྣང་ལག་ཟུང་བཟེད་པའི་སྣོད།།

རིན་བྲལ་དགོས་འདོད་ནོར་གྱི་གྲངས།།

དལ་རྟེན་སྙིང་བོ་གཏན་དབེན་པར།།

ཉམ་ངའི་གཡང་སར་ཞེན་ཆགས་ཀྱིས།།

གདོང་ལ་འཛུམ་གྱིས་ཡོངས་བཏང་བས།།

རེ་བའི་ཐོབ་ནོར་བོར་ཟིན་པར།།

སེར་སྣས་བཟུང་བའི་སྤར་མོའི་ཁྱིམ།།

རྣག་ཁྲག་ཟས་ཀྱི་ཕྲ་རགས་རྡུལ།།

གྲུང་བོའི་རྣམ་འགྱུར་ལེགས་སྤེད་པར།།

ཤེས་མེད་བརྟུལ་ཞུགས་བསྒྱུར་བའི་རྩལ།།

མངོན་སུམ་ཚད་མའི་བརྡ་རེ་རེ།།

སྐྱེས་བུ་ཆེན་པོ་ལ་རངས་པ།།

ཟས་ཀྱི་དང་ག་འགགས་པའི་ཉེན།།

གསོ་བྱེད་མཁས་པ་ལ་བསྟེན་པ།།

ཐེ་ཚོམ་བ་སྤུ་འགུལ་བའི་གྲོང་།།

བདུད་རྩིའི་སྦྱོར་བ་འཁྲུལ་མེད་པས།།

ཚངས་ཐིག་བློ་གྲོས་ལ་གནོད་པ།།

རྫུན་གྱི་སོག་མ་སྤུན་པའི་ཕོན།།

མིག་ལ་སྣང་བའི་དྲི་ཟའི་གྲོང་།།

སྒྱུ་མའི་རྫས་ཀྱིས་ལེགས་བསླད་པས།།

རབ་རིབ་ཚོར་སྣང་བྲིན་པའི་ཁྲོམ།།

ཕྱག་རྒྱའི་འཕྲུལ་གྱིས་ཉེར་བཅིངས་པ།།

གཡོ་སྒྱུའི་གདུག་རྩུབ་ནག་པོ་ལ།།

རྨོངས་པ་བཀུར་སྟི་ལ་འབྱམས་སྐད།།

བརྒྱ་ཕྲག་ནད་ཀྱིས་ཟིན་པའི་ངོ་།།

རུས་རྐང་ལ་ཟུག་གདོན་གྱི་གྲངས།།

རྣམ་རྟོག་རྩ་རླུང་གང་རྒྱུ་བ།།

ཕལ་བའི་འཕྲུལ་སྣང་འགྲན་པའི་ཤུགས།།

སྙིང་ལ་བག་ཆགས་ཟབ་པའི་ཤུལ།།

ནོར་སྐྱོང་རྒན་པོ་ལས་རགས་པར།།

ལུས་ངག་འཆིང་བ་གཅོད་པའི་མཚོན།།

ཤེས་རབ་ཐབས་ཀྱི་མན་ངག་གིས།།

རབ་འབྱམས་གཞུང་ལུགས་གོམས་པའི་བློ།།

བླང་དོར་ལས་བསྟན་ཡང་དག་ལམ།།

ཚེ་གཅིག་ཉམས་ལེན་གནད་སྨིན་པར།།

རང་རྒྱུད་རྟོགས་པ་མཆོག་གང་ཞིག།