དོན་ཚན་སོ་བདུན་པ། ཁྲིམས་ལྟར་ལྟ་སྐྱོང་བྱ་ཡུལ་གྱི་མིའི་གསོ་སྐྱོང་དང་། ཞབས་ཏོག །འཚོ་སྐྱོང་བཅས་ཀྱི་གྲོན་དངུལ་སྤྲོད་འགན་འཁུར་བའི་ཕ་མ་དང་། བུ་ཕྲུག །བཟའ་ཟླ་སོགས་ཀྱི་ལྟ་སྐྱོང་བའི་ཐོབ་ཐང་མི་དམངས་ཁྲིམས་ཁང་གིས་ཕྱིར་འཐེན་བྱས་རྗེས། འཁུར་པའི་འོས་འགན་གང་ཡོད་མུ་མཐུད་ནས་སྒྲུབ་དགོས།
དོན་ཚན་སོ་བརྒྱད་པ། ལྟ་སྐྱོང་བྱ་ཡུལ་གྱི་མིའི་ཕ་མའམ་བུ་ཕྲུག་གི་ལྟ་སྐྱོང་བའི་ཐོབ་ཐང་མི་དམངས་ཁྲིམས་ཁང་གིས་ཕྱིར་འཐེན་བྱས་རྗེས། ལྟ་སྐྱོང་བྱ་ཡུལ་གྱི་མིར་བསམ་བཞིན་དུ་ཉེས་སྤེལ་བ་ཕུད། དངོས་གནས་འགྱོད་བཤགས་བྱས་པ་ཡིན་ན། དེས་རེ་འདུན་ཞུས་པ་བརྒྱུད། མི་དམངས་ཁྲིམས་ཁང་གིས་ལྟ་སྐྱོང་བྱ་ཡུལ་གྱི་མིའི་འདོད་མོས་ངོ་མར་བརྩི་འཇོག་བྱས་པའི་སྔོན་འགྲོའི་ཆ་རྐྱེན་འོག་གནས་ཚུལ་ལ་གཞིགས་ནས་དེའི་ལྟ་སྐྱོང་བའི་ཐོབ་ཐང་སླར་གསོ་བྱས་ཆོག་པ་དང་། མི་དམངས་ཁྲིམས་ཁང་གིས་དམིགས་འཛུགས་བྱས་པའི་ལྟ་སྐྱོང་བ་དང་ལྟ་སྐྱོང་བྱ་ཡུལ་གྱི་ལྟ་སྐྱོང་འབྲེལ་བ་དུས་མཚུངས་སུ་མཇུག་བསྒྲིལ་བ་ཡིན།
དོན་ཚན་སོ་དགུ་པ། གཤམ་གསལ་གནས་ཚུལ་གང་རུང་ཞིག་བྱུང་ན་ལྟ་སྐྱོང་འབྲེལ་བ་མཇུག་སྒྲིལ་དགོས།
(གཅིག)ལྟ་སྐྱོང་བྱ་ཡུལ་གྱི་མིར་དམངས་དོན་བྱ་སྤྱོད་སྤེལ་ནུས་ཆ་ཚང་ཐོབ་པའམ་སླར་གསོ་བྱུང་བ།
(གཉིས།)ལྟ་སྐྱོང་བའི་ལྟ་སྐྱོང་བྱེད་ནུས་ཤོར་བ།
(གསུམ།)ལྟ་སྐྱོང་བྱ་ཡུལ་གྱི་མིའམ་ལྟ་སྐྱོང་བ་ཤི་བ།
(བཞི།)མི་དམངས་ཁྲིམས་ཁང་གིས་ལྟ་སྐྱོང་འབྲེལ་བ་མཇུག་བསྒྲིལ་བར་ངེས་གཟུང་བྱས་པའི་གནས་ཚུལ་གཞན་དག །
ལྟ་སྐྱོང་འབྲེལ་བ་མཇུག་བསྒྲིལ་རྗེས། ལྟ་སྐྱོང་བྱ་ཡུལ་གྱི་མིར་སྔར་བཞིན་ལྟ་སྐྱོང་བྱེད་པའི་དགོས་པ་ཡོད་ན། ཁྲིམས་ལྟར་ལྟ་སྐྱོང་བ་གཞན་པ་གཏན་འཁེལ་བྱེད་དགོས།
ས་བཅད་གསུམ་པ། གར་སོང་ཆ་མེད་ཁྱབ་བསྒྲགས་བྱེད་པ་དང་ཤི་བ་ཁྱབ་བསྒྲགས་བྱེད་པ།
དོན་ཚན་བཞི་བཅུ་པ། རང་བྱུང་མི་གར་སོང་ཆ་མེད་དུ་གྱུར་ནས་ལོ་གཉིས་ལོངས་ཚེ། ཁེ་གྱོང་འབྲེལ་བ་ཡོད་མིས་མི་དམངས་ཁྲིམས་ཁང་ལ་རང་བྱུང་མི་དེར་གར་སོང་ཆ་མེད་ཀྱི་མི་ཡིན་པར་ཁྱབ་བསྒྲགས་བྱེད་དགོས་པའི་རེ་འདུན་ཞུས་ཆོག །
དོན་ཚན་ཞེ་གཅིག་པ། རང་བྱུང་མི་གར་སོང་ཆ་མེད་དུ་གྱུར་ཡུན་དེ་མི་དེ་གོ་ཐོས་མེད་པར་གྱུར་པའི་ཉིན་ནས་རྩི་དགོས། དམག་འཁྲུག་གི་རིང་དུ་གར་སོང་ཆ་མེད་དུ་གྱུར་ན། གར་སོང་ཆ་མེད་དུ་གྱུར་ཡུན་དེ་དམག་འཁྲུག་མཇུག་བསྒྲིལ་ཉིན་ནམ་ཡང་ན་འབྲེལ་ཡོད་ལས་ཁུངས་ཀྱིས་གར་སོང་ཆ་མེད་དུ་གྱུར་པར་གཏན་འཁེལ་བྱས་ཉིན་ནས་རྩི་དགོས།
དོན་ཚན་ཞེ་གཉིས་པ། གར་སོང་ཆ་མེད་ཀྱི་མིའི་རྒྱུ་ནོར་ནི་དེའི་བཟའ་ཟླ་དང་། ནར་སོན་པའི་བུ་ཕྲུག ཕ་མ་བཅས་དང་ཡང་ན་རྒྱུ་ནོར་ཚབ་བདག་པ་བྱེད་འདོད་ཡོད་པའི་མི་གཞན་དག་གིས་ཚབ་བདག་བྱེད་དགོས།
ཚབ་བདག་བྱེད་པའི་ཐད་དུ་རྩོད་གཞི་བྱུང་ཚེ། དོན་ཚན་གོང་མ་བཀོད་པའི་མི་མེད་པའམ། ཡང་ན་དོན་ཚན་གོང་མར་བཀོད་པའི་མིར་ཚབ་བདག་བྱེད་ནུས་མེད་པ་ཡིན་ན། མི་དམངས་ཁྲིམས་ཁང་གིས་དམིགས་འཛུགས་བྱས་པའི་མིས་ཚབ་བདག་བྱེད་དགོས།
དོན་ཚན་ཞེ་གསུམ་པ། རྒྱུ་ནོར་ཚབ་བདག་པས་གར་སོང་ཆ་མེད་ཀྱི་མིའི་རྒྱུ་ནོར་བདག་གཉེར་ཡག་པོ་བྱེད་དགོས་པ་དང་། དེའི་རྒྱུ་ནོར་གྱི་བདག་དབང་སྲུང་སྐྱོང་བྱེད་དགོས།
གར་སོང་ཆ་མེད་ཀྱི་མིས་འཇལ་མེད་པའི་ཁྲལ་དངུལ་དང་། བུ་ལོན། འཇལ་དགོས་པའི་གྲོན་དངུལ་གཞན་དག་བཅས་ནི་རྒྱུ་ནོར་ཚབ་བདག་པས་གར་སོང་ཆ་མེད་ཀྱི་མིའི་རྒྱུ་ནོར་གྱིས་སྤྲོད་དགོས།
གར་སོང་ཆ་མེད་ཀྱི་མིའི་རྒྱུ་ནོར་ལ་ཐེབས་པའི་གྱོང་གུན་དེ་རྒྱུ་ནོར་ཚབ་བདག་པས་བསམ་བཞིན་དུ་བཟོས་པའམ་ལས་འཛོལ་ཚབས་ཆེན་ཤོར་བའི་རྐྱེན་ལས་བྱུང་བ་ཡིན་ན།རྒྱུ་ནོར་ཚབ་བདག་པས་སྐྱིན་གསབ་འགན་འཁྲི་འཁུར་དགོས།
དོན་ཚན་ཞེ་བཞི་པ། རྒྱུ་ནོར་ཚབ་བདག་པས་ཚབ་བདག་འགན་འཁྲི་མི་སྒྲུབ་པ་དང་། གར་སོང་ཆ་མེད་ཀྱི་མིའི་རྒྱུ་ནོར་གྱི་ཁེ་ཕན་ལ་གནོད་འཚེ་བཏང་བའམ་ཚབ་བདག་བྱེད་ནུས་ཤོར་ན། གར་སོང་ཆ་མེད་ཀྱི་མི་དང་ཁེ་གྱོང་འབྲེལ་བ་ཡོད་མིས་མི་དམངས་ཁྲིམས་ཁང་ལ་རྒྱུ་ནོ་ཚབ་བདག་པ་བརྗེ་དགོས་པའི་རེ་འདུན་ཞུས་ཆོག །
རྒྱུ་ནོར་ཚབ་བདག་པར་འོས་མཐུན་གྱི་རྒྱུ་མཚན་ཡོད་ན་མི་དམངས་ཁྲིམས་ཁང་ལ་རྒྱུ་ནོར་ཚབ་བདག་པ་བརྗེ་དགོས་པའི་རེ་འདུན་ཞུས་ཆོག །
མི་དམངས་ཁྲིམས་ཁང་གིས་རྒྱུ་ནོར་ཚབ་བདག་པ་བརྗེས་ཡོད་ན། བརྗེས་པའི་རྗེས་ཀྱི་རྒྱུ་ནོར་ཚབ་བདག་པར་དེ་སྔའི་རྒྱུ་ནོར་ཚབ་བདག་པས་འབྲེལ་ཡོད་རྒྱུ་ནོར་དུས་ཐོག་ཏུ་བརྒྱུད་སྤྲོད་བྱེད་པ་དང་སྦྲགས་རྒྱུ་ནོར་ཚབ་བདག་སྐོར་གྱི་གནས་ཚུལ་སྙན་ཞུ་བྱེད་དགོས་པའི་རེ་འདུན་ཞུ་དབང་ཡོད།
དོན་ཚན་ཞེ་ལྔ་པ། གར་སོང་ཆ་མེད་ཀྱི་མི་བསྐྱར་དུ་ཐོན་པ་ཡིན་ན། ཁོ་རང་དང་ཡང་ན་ཁོ་དང་ཁེ་གྱོང་འབྲེལ་བ་ཡོད་མིས་རེ་འདུན་ཞུས་པ་བརྒྱུད། མི་དམངས་ཁྲིམས་ཁང་གིས་གར་སོང་ཆ་མེད་ཀྱི་ཁྱབ་བསྒྲགས་ཕྱིར་འཐེན་བྱེད་དགོས།
གར་སོང་ཆ་མེད་ཀྱི་མི་བསྐྱར་དུ་ཐོན་པ་ཡིན་ན། རྒྱུ་ནོར་ཚབ་བདག་པར་འབྲེལ་ཡོད་རྒྱུ་ནོར་དུས་ཐོག་ཏུ་བརྒྱུད་སྤྲོད་བྱེད་པ་དང་སྦྲགས་རྒྱུ་ནོར་ཚབ་བདག་སྐོར་གྱི་གནས་ཚུལ་སྙན་ཞུ་བྱེད་དགོས་པའི་རེ་འདུན་འདོན་དབང་ཡོད།
དོན་ཚན་ཞེ་དྲུག་པ། རང་བྱུང་མིར་གཤམ་གསལ་གནས་ཚུལ་གང་རུང་ཞིག་བྱུང་ན་ཝ། ཁེ་གྱོང་འབྲེལ་བ་ཡོད་མིས་མི་དམངས་ཁྲིམས་ཁང་ལ་རང་བྱུང་མི་དེ་ཤི་བར་ཁྱབ་བསྒྲགས་བྱེད་དགོས་པའི་རེ་འདུན་ཞུས་ཆོག
(གཅིག)གར་སོང་ཆ་མེད་དུ་གྱུར་ནས་ལོ་བཞི་ལོངས་པ།
(གཉིས།)བསམ་ཡུལ་ལས་འདས་པའི་དོན་རྐྱེན་གྱི་དབང་གིས་གར་སོང་ཆ་མེད་དུ་གྱུར་ནས་ལོ་ངོ་གཉིས་ལོངས་པ།
བསམ་ཡུལ་ལས་འདས་པའི་དོན་རྐྱེན་གྱི་དབང་གིས་གར་སོང་ཆ་མེད་དུ་གྱུར་ཚེ། འབྲེལ་ཡོད་ལས་ཁུངས་ཀྱིས་རང་བྱུང་མི་དེ་ཚོ་འཚོ་གནས་མི་སྲིད་པར་ར་སྤྲོད་བྱས་པ་ཡིན་ན། ཤི་བར་ཁྱབ་བསྒྲགས་བྱེད་པའི་རེ་འདུན་ཞུ་བའི་ཐད་དུ་དུས་ཡུན་ལོ་གཉིས་ཀྱི་ཚོད་འཛིན་མི་ཐེབས་པ་ཡིན། ༼ མུ་འགོད། ༽ 
