སྤྱི་ལོ་2020ལོའི་ཟླ་6པའི་ཚེས་23ཉིན། ཀྲུང་གོས་བྱང་སྐར་གསུམ་པའི་ཆེས་མཇུག་མཐའི་གོ་ལ་ཧྲིལ་པོའི་དྲ་འཛུགས་འཁོར་སྐར་འཕེན་གཏོང་བྱས་པ་དང་། སྐབས་འདིའི་བྱང་སྐར་གསུམ་པའི་གོ་ལ་ཧྲིལ་པོའི་སྐར་ཚོམ་བཀོད་སྒྲིག་དེ་དངོས་སུ་ལེགས་གྲུབ་བྱུང་། ལོ་ངོ་སུམ་ཅུའི་རིང་། བྱང་སྐར་ལས་སྒྲུབ་པས་ཅི་ཡོང་མེད་པ་ནས་ཁྱོན་ཡོངས་སུ་རང་གིས་ཚོད་འཛིན་བྱེད་ཆོག་པ་དང་ལག་རྩལ་ཨང་དང་པོ་ཡིན་པ། གོ་ལ་ཧྲིལ་པོ་ལ་ཞབས་ཞུ་སྒྲུབ་ཐུབ་པའི་འཁོར་སྐར་ཕྱོགས་སྟོན་མ་ལག་ཆ་ཚང་ཞིག་བསྐྲུན་པ་རེད། དང་ཐོག་ཇུས་འགོད་བྱེད་སྐབས། བྱང་སྐར་མ་ལག་ནས་ཕྱི་རྒྱལ་གྱི་ཕྱོགས་སྟོན་མ་ལག་གང་མང་དང་མི་འདྲ་བའི་གསར་གཏོད་རང་བཞིན་གྱི་ཇུས་འགོད་ལག་རྩལ་སྤྱད་པ་སྟེ། དཔེར་ན། འཁོར་སྐར་གྱི་འཁོར་ལམ་བཀོད་སྒྲིག་དང་ཆ་འཕྲིན་སྐྱེལ་འདྲེན་སོགས་སོ། །

ལག་རྩལ་ལམ་ཐིག་ནས་ཐོན་སྐྱེད་བྱེད་སྟངས་ཞིབ་འཇུག་གསར་སྤེལ་གྱི་བར། ཀྲུང་གོའི་ཁྱད་ཆོས་ལྡན་ཞིང་། རང་ཚུགས་རང་བདག་གི་འཁོར་སྐར་ཕྱོགས་སྟོན་མ་ལག་འཕེལ་རྒྱས་ཀྱི་ལམ་བུའི་ཐོག་བསྐྱོད།
མིག་སྔར་འཛམ་གླིང་ལ་འཁོར་སྐར་ཕྱོགས་སྟོན་གྱི་མ་ལག་ཆེན་པོ་བཞི་ཡོད་དེ། ཨ་རིའི་GPSདང་ཨུ་རུ་སུའི་“ཀེ་ལོ་ན་སི།” ཀྲུང་གོའི་བྱང་སྐར། ཡོབ་གླིང་གི་“ཀ་ལི་ལུའུ་”བཅས་ཡིན། བྱང་སྐར་ནི་འཁོར་སྐར་རྐྱང་ལམ་ལས་གྲུབ་པའི་མ་ལག་གཞན་པ་དང་མི་འདྲ་བར། དེ་ལ་དཀྱིལ་སྒོར་བརྒྱུད་ལམ་འཁོར་སྐར་ཏེ་MEOའཁོར་སྐར་ཡོད་པར་མ་ཟད། ད་དུང་མཐོ་ལམ་སའི་གོ་ལའི་ཞི་འཇགས་བརྒྱུད་ལམ་འཁོར་སྐར་ཏེ་GEOའཁོར་སྐར་དང་སའི་གོ་ལའི་གསེག་ལམ་འཁོར་སྐར་ཏེ་IGSOའཁོར་སྐར་ཡང་ཡོད།
ཀྲུང་གོའི་མཁའ་གྲུ་ཚན་རྩལ་ཚོགས་པའི་གླིང་ལྔ་པའི་བྱང་སྐར་གསུམ་པའི་སྤྱི་ཁྱབ་ཇུས་འགོད་པ་ཝང་ཕིང་གིས། བརྒྱུད་ལམ་རིགས་གསུམ་ལས་གྲུབ་པའི་མཉམ་འདྲེས་སྐར་ཚོམ་གྱིས་ང་ཚོའི་རྒྱལ་ཁབ་ཀྱི་ཕྱོགས་སྟོན་ཞབས་ཞུའི་ཁྱབ་ཁོངས་དེ་གོ་ལ་ཧྲིལ་པོ་ལ་རྒྱ་སྐྱེད་ཐུབ་པ་མ་ཟད། དེ་དང་དུས་མཚུངས་སུ་GEOདང་IGSOབརྒྱུད་ནས་རང་རྒྱལ་དང་ཉེ་འཁོར་ས་ཁུལ་དུ་སྔར་ལས་ལེགས་ཤིང་། སྤུས་ཚད་དེ་བས་བཟང་བའི་ཕྱོགས་སྟོན་གནས་ཐིག་གཏན་འཁེལ་ཞབས་ཞུ་མཁོ་འདོན་བྱས་པ་མ་ཟད། ད་དུང་སྣ་མང་ཅན་གྱི་ཁྱད་ལྡན་ཞབས་ཞུ་ཁག་ཅིག་མཁོ་འདོན་བྱས་ཡོད་ཅེས་བཤད།
ཐུན་མོང་མ་ཡིན་པའི་སྐར་ཚོམ་གྲུབ་ཚུལ་དེས། ཀྲུང་གོའི་བྱང་སྐར་ལ་གསར་གཏོད་རང་བཞིན་གྱིས་ཕྱོགས་སྟོན་དང་འཕྲིན་སྐྱེལ་མཉམ་འདྲེས་བྱས་ཡོད་པ་མ་ཟད། དེ་དང་དུས་མཚུངས་སུ། གཞི་རྩའི་ཕྱོགས་སྟོན་དང་འཕྲིན་ཡིག་ཐུང་ངུ་གཏོང་བ། འཁོར་སྐར་རྨང་གཞི་ཇེ་བརྟན། རྒྱལ་སྤྱིའི་འཚོལ་སྐྱོབ། ཞིབ་ཚགས་ཚེག་གནས་གཏན་འཁེལ་སོགས་ཞབས་ཞུའི་རིགས་སྣ་མང་མཁོ་འདོན་བྱས་ཡོད།
ཀྲུང་གོའི་མཁའ་གྲུ་ཚན་རྩལ་ཚོགས་པའི་གླིང་ལྔ་པའི་བྱང་སྐར་གསུམ་པའི་སྤྱི་ཁྱབ་ཇུས་འགོད་པ་ཝང་ཕིང་གིས། དཔེར་ན། ཆེས་མངོན་གསལ་དོད་པ་ནི་ང་ཚོའི་རྒྱལ་ཁབ་ཀྱི་འཁོར་སྐར་ཕྱོགས་སྟོན་འཁོར་སྐར་གྱིས་འཕྲིན་ཡིག་ཐུང་ངུ་གཏོང་བའི་ཞབས་ཞུ་མཁོ་འདོན་བྱེད་ཐུབ་ལ། རང་གིས་རང་གི་གནས་ཡུལ་གང་ཡིན་ཤེས་ཐུབ་པ་མ་ཟད། རང་གིས་གནས་ཡུལ་སྤྱོད་མཁན་གཞན་པ་ལའང་སྤེལ་ཆོག་ཅིང་། དེ་བས་གཞན་པས་ངའི་གནས་ཡུལ་གང་ཡིན་ཤེས་ཐུབ་པ་རེད་ཅེས་བཤད།
ད་དུང་བྱང་སྐར་གསུམ་པ་ལ་འཁོར་སྐར་བར་གྱི་སྦྲེལ་ལམ་བཙུགས་ནས། འཁོར་སྐར་བར་གྱི་གཞི་གྲངས་སྐྱེལ་འདྲེན་དང་ཞིབ་ཚགས་ཚད་འཇལ་མངོན་འགྱུར་བྱུང་ཡོད་པས། གོ་ལ་ཧྲིལ་པོའི་ས་ངོས་སྒྲིག་ཚུགས་ལ་བརྟེན་ཚད་ཇེ་ཆུང་དང་མ་ལག་གི་འཁོར་སྐྱོད་དོ་དམ་མ་གནས་ཇེ་ཆུང་ནུས་ལྡན་གཏོང་ཐུབ།
ཀྲུང་གོའི་མཁའ་གྲུ་ཚན་རྩལ་ཚོགས་པའི་གླིང་ལྔ་པའི་བྱང་སྐར་གསུམ་པའི་སྤྱི་ཁྱབ་ཇུས་འགོད་པ་ཝང་ཕིང་གིས། རང་རྒྱལ་གྱི་ས་ངོས་ས་ཚུགས་གཅིག་པུ་ལ་བརྟེན་ནས། གོ་ལ་ཧྲིལ་པོའི་དྲ་འཛུགས་འཁོར་སྐར་ལ་ཞིབ་ཚགས་ཆེ་བའི་བརྒྱུད་ལམ་གཏན་འཁེལ་དང་དུས་ཚོད་གོམ་མཚུངས་བྱ་ཐུབ་ཅེས་བཤད།
གསར་གཏོད་རང་བཞིན་ལྡན་པའི་ཇུས་འགོད་འདི་དག་ནི་ཀྲུང་གོའི་བྱང་སྐར་གྱི་རྒྱལ་སྤྱིའི་འགྲན་རྩོད་ནུས་ཤུགས་གྱུར་ཡོད་ལ། འཁོར་སྐར་གྲངས་འབོར་མང་བས། འཁོར་སྐར་ཞིབ་འཇུག་གསར་བཟོ་ཚོགས་པ་ལ་གནོན་ཤུགས་སྤྲོད་བཞིན་ཡོད། ལྷག་པར་དུ་བྱང་སྐར་གསུམ་པའི་གོ་ལ་ཧྲིལ་པོའི་དྲ་འཛུགས་ལ་ལོ་ངོ་གཉིས་ལྷག་གི་དུས་ཡུན་ནང་འཁོར་སྐར་30ལེགས་འགྲུབ་དགོས་པའི་ཐོན་སྐྱེད་འབོར་ཆེན་གྱི་བླང་བྱ་བཏོན།
སྤྱི་ལོ་2020ལོའི་ཟླ་7ཚེས་31ཉིན་གྱི་སྔ་དྲོར། བྱང་སྐར་གསུམ་པའི་གོ་ལ་ཧྲིལ་པོའི་འཁོར་སྐར་ཕྱོགས་སྟོན་མ་ལག་བསྐྲུན་ཟིན་པ་དང་ཤར་གཏོང་གི་མཛད་སྒོ་དེ་པེ་ཅིན་མི་དམངས་ཚོགས་ཁང་ཆེན་མོ་རུ་འཚོགས་ཤིང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་མཛད་སྒོར་ཕེབས་ནས་བྱང་སྐར་གསུམ་པའི་གོ་ལ་ཧྲིལ་པོའི་འཁོར་སྐར་ཕྱོགས་སྟོན་མ་ལག་དངོས་སུ་ཤར་གཏོང་ཐུབ་པ་ཁྱབ་བསྒྲགས་གནང་བ་རེད།
སྤྱི་ལོ་2021ལོའི་ཟླ་3པའི་ཚེས་4ཉིན། གསར་འགོད་པས་ཀྲུང་གོའི་འཁོར་སྐར་ཕྱོགས་སྟོན་མ་ལག་དོ་དམ་གཞུང་ལས་ཁང་ནས་ཤེས་རྟོགས་བྱུང་བ་ལྟར་ན། བྱང་སྐར་གསུམ་པ་གོ་ལ་ཧྲིལ་པོའི་འཁོར་སྐར་ཕྱོགས་སྟོན་མ་ལག་ཤར་གཏོང་བྱས་ཚུན། མ་ལག་འཁོར་སྐྱོད་བརྟན་ཞིང་བརླིང་ལ། མུ་མཐུད་དུ་གོ་ལ་ཧྲིལ་པོའི་བེད་སྤྱོད་གཏོང་མཁན་རྣམས་ལ་ཞབས་ཞུ་ཡག་པོ་སྒྲུབ་བཞིན་ཡོད་པ་དང་། གོ་ལ་ཧྲིལ་པོ་ཅན་དང་ཐོན་ལས་ཅན་གྱི་རྒྱང་སྐྱོད་ཀྱི་ལམ་བུ་གསར་པ་ཕྱེས་ཡོད།
སྤྱི་ལོ་2035ལོར། ཀྲུང་གོས་སྔར་ལས་རྒྱ་ཁྱབ་དང་མཉམ་འདྲེས། རིག་ནུས་ཅན་གྱི་ཕྱོགས་བསྡུས་བར་སྟོང་མ་ལག་བསྐྲུན་རྒྱུ་དང་། བར་སྟོང་ཆ་འཕྲིན་ཞབས་ཞུའི་ནུས་པ་སྔར་ལས་ཇེ་མཐོར་བཏང་ནས། མིའི་རིགས་དེ་བས་འཕེལ་རྒྱས་ཡོང་བའི་ཐད་ཀྲུང་གོའི་བྱས་རྗེས་འཇོག་རྒྱུ་རེད། །