དོན་ཚན་དོན་གཅིག་པ། ཁྲིམས་མིའི་གཙང་རྩིས་ལས་རིམ་དང་གཙང་རྩིས་ཚོ་ཆུང་གི་འགན་དབང་ནི། འབྲེལ་ཡོད་བཅའ་ཁྲིམས་ཀྱི་གཏན་འབེབས་གཞིར་འཛིན་དགོས། གཏན་འབེབས་བྱས་མེད་ན། སྤྱི་གཉེར་ཁང་གི་སྐོར་གྱི་བཅའ་ཁྲིམས་ཀྱི་འབྲེལ་ཡོད་གཏན་འབེབས་སྤྱད་འཐུས།

དོན་ཚན་དོན་གཉིས་པ། གཙང་རྩིས་རྒྱག་རིམ་རིང་ཁྲིམས་མི་སོར་གནས་ཡིན། ཡིན་ནཡང་གཙང་རྩིས་དང་འབྲེལ་བ་མེད་པའི་བྱེད་སྒོ་སྤེལ་མི་ཆོག །

གཙང་རྩིས་བརྒྱབ་རྗེས་ཀྱི་ཁྲིམས་མིའི་རྒྱུ་ནོར་ལྷག་མ་དག་ནི། ཁྲིམས་མིའི་སྒྲིག་ཡིག་གི་གཏན་འབེབས་སམ་ཁྲིམས་མིའི་དབང་འཛིན་སྒྲིག་གཞིའི་ཆོད་དོན་ལྟར་ཐག་གཅོད་བྱེད་དགོས། བཅའ་ཁྲིམས་ཀྱི་ལོགས་སུ་གཏན་འབེབས་བྱས་ཡོད་པ་ཡིན་ན། དེའི་གཏན་འབེབས་གཞིར་འཛིན་དགོས།

གཙང་རྩིས་བརྒྱབ་ཟིན་ལ་ཁྲིམས་མི་ཐོ་བསུབ་ཀྱི་ཐོ་འགོད་བྱས་ཚར་དུས། ཁྲིམས་མི་མཇུག་བསྒྲིལ་བ་ཡིན། ཁྲིམས་ལྟར་ན་ཁྲིམས་མིའི་ཐོ་འགོད་བྱེད་མི་དགོས་པ་ཡིན་ན། གཙང་རྩིས་མཇུག་རྫོགས་དུས་ཁྲིམས་མི་མཇུག་བསྒྲིལ་བ་ཡིན།

དོན་ཚན་དོན་གསུམ་པ། ཁྲིམས་མི་ཞིག་ལ་མ་རྩ་སྟོངས་པར་ཁྱབ་བསྒྲགས་བྱས་ཚེ། ཁྲིམས་ལྟར་མ་རྩ་སྟོངས་པའི་གཙང་རྩིས་བརྒྱབ་ཅིང་ཁྲིམས་མི་ཐོ་བསུབ་ཐོ་འགོད་བྱས་ཚར་དུས། ཁྲིམས་མི་མཇུག་བསྒྲིལ་བ་ཡིན།

དོན་ཚན་དོན་བཞི་པ། ཁྲིམས་མིས་ཁྲིམས་ལྟར་ཡན་ལག་སྒྲིག་གཞི་བཙུགས་ཆོག །བཅའ་ཁྲིམས་དང་སྲིད་འཛིན་ཁྲིམས་སྲོལ་དུ་ཡན་ལག་སྒྲིག་གཞི་ཐོ་འགོད་བྱེད་དགོས་པར་གཏན་འབེབས་བྱས་ཡོད་པ་ཡིན་ན། དེའི་གཏན་འབེབས་གཞིར་འཛིན་དགོས།

ཡན་ལག་སྒྲིག་གཞིས་རང་ཉིད་ཀྱི་མིང་ཐོག་ནས་དམངས་དོན་བྱེད་སྒོ་སྤེལ་བ་ལས་བྱུང་པའི་དམངས་དོན་འགན་འཁྲི་ནི་ཁྲིམས་མིས་འགན་འཁུར་དགོས་ཤིང་། སྔོན་ལ་ཡན་ལག་སྒྲིག་གཞིས་བདག་གཉེར་བྱེད་པའི་རྒྱུ་ནོར་གྱིས་ཁུར་ནའང་ཆོག་ལ། འཁུར་ནུས་མི་འཛོམས་ཚེ། ཁྲིམས་མིས་འགན་འཁུར་དགོས།

དོན་ཚན་དོན་ལྔ་པ། འཛུགས་མིས་ཁྲིམས་མི་འཛུགས་པའི་དོན་དུ་དམངས་དོན་བྱེད་སྒོ་སྤེལ་བ་ལས་བྱུང་བའི་བཅའ་ཁྲིམས་མཇུག་འབྲས་ནི་ཁྲིམས་མིས་འཁུར་དགོས་ཤིང་། ཁྲིམས་མི་བཙུགས་མེད་པ་ཡིན་ན་བཅའ་ཁྲིམས་མཇུག་འབྲས་ནི་འཛུགས་མིས་འཁུར་དགོས། འཛུགས་མི་ལ་མི་གཉིས་ཡན་ཡོད་པ་ཡིན་ན་ཞོར་འདྲུད་བུན་དབང་སྤྱོད་རྒྱུ་ཡོད་ལ། ཞོར་འདྲུད་བུན་འགན་ཡང་འཁུར་དགོས།

འཛུགས་མིས་ཁྲིམས་མི་འཛུགས་པའི་དོན་དུ་རང་ཉིད་ཀྱི་མིང་ཐོག་ནས་དམངས་དོན་བྱེད་སྒོ་སྤེལ་བ་ལས་བྱུང་པའི་དམངས་དོན་འགན་འཁྲི་ཡིན་ན། ཕུང་གསུམ་པར་གདམ་གསེས་བྱས་ནས་ཁྲིམས་མིའམ་འཛུགས་མིས་འཁུར་དགོས་པའི་རེ་བ་འདོན་དབང་ཡོད།

ས་བཅད་གཉིས་པ། ཁེ་གཉེར་ཁྲིམས་མི།

དོན་ཚན་དོན་དྲུག་པ། ཁེ་སྤོགས་རག་རྒྱུ་དང་ཁེ་སྤོགས་དེ་རྐང་བདག་སོགས་མ་རྩ་གཏོང་མི་ལ་བགོ་བཤའ་རྒྱག་རྒྱུ་དམིགས་ཡུལ་དུ་བཟུང་ནས་བཙུགས་པའི་ཁྲིམས་མི་ནི་ཁེ་གཉེར་ཁྲིམས་མི་ཡིན།

ཁེ་གཉེར་ཁྲིམས་མིའི་ཁོངས་སུ་ཚད་ཡོད་འགན་འཁྲི་སྤྱི་གཉེར་ཁང་དང་། མ་རྐང་ཚད་ཡོད་སྤྱི་གཉེར་ཁང་། ཁེ་ལས་ཀྱི་ཁྲིམས་མི་གཞན་དག་སོགས་ཚུད་ཡོད།

དོན་ཚན་དོན་བདུན་པ། ཁེ་གཉེར་ཁྲིམས་མི་ནི་ཁྲིམས་ལྟར་ཐོ་འགོད་བྱས་པ་བརྒྱུད་ནས་འཛུགས་དགོས།

དོན་ཚན་དོན་བརྒྱད་པ། ཁྲིམས་ལྟར་བཙུགས་པའི་ཁེ་གཉེར་ཁྲིམས་མིར་ཐོ་འགོད་ལས་ཁུངས་ཀྱིས་ཁེ་གཉེར་ཁྲིམས་མིའི་ལས་གཉེར་ལ་ཁྱེར་སྤྲོད་དགོས། ལས་གཉེར་ལག་ཁྱེར་སྤྲོད་པའི་དུས་ཚོད་ནི་ཁེ་གཉེར་ཁྲིམས་མི་བཙུགས་པའི་དུས་ཚོད་ཡིན།

དོན་ཚན་དོན་དགུ་པ། ཁེ་གཉེར་ཁྲིམས་མི་འཛུགས་པའི་ཚེ་ཁྲིམས་ལྟར་ཁྲིམས་མིའི་སྒྲིག་ཡིག་གཏན་འབེབས་བྱེད་དགོས།

དོན་ཚན་བརྒྱད་ཅུ་པ། ཁེ་གཉེར་ཁྲིམས་མིར་དབང་འཛིན་སྒྲིག་གཞི་འཛུགས་དགོས།

དབང་འཛིན་སྒྲིག་གཞིས་ཁྲིམས་མིའི་སྒྲིག་ཡིག་དག་བཅོས་དང་། ལག་བསྟར་སྒྲིག་གཞི་དང་ལྟ་སྐུལ་སྒྲིག་གཞིའི་ཁོངས་མི་འདེམས་པའམ་བརྗེ་བ། དེ་བཞིན་ཁྲིམས་མིའི་སྒྲིག་ཡིག་ཏུ་གཏན་འབེབས་བྱས་པའི་འགན་དབང་གཞན་དག་བཅས་སྤྱོད་དགོས།

དོན་ཚན་གྱ་གཅིག་པ། ཁེ་གཉེར་ཁྲིམས་མིར་ལག་བསྟར་སྒྲིག་གཞི་འཛུགས་དགོས།

ལག་བསྟར་སྒྲིག་གཞིས་དབང་འཛིན་སྒྲིག་གཞིའི་གྲོས་ཚོགས་སྐོར་འཚོག་དང་། ཁྲིམས་མིའི་གཉེར་སྐྱོང་འཆར་གཞི་དང་མ་འཇོག་འཆར་གཞི་ཐག་གཅོད། ཁྲིམས་མིའི་ནང་ཁུལ་གྱི་དོ་དམ་སྒྲིག་གཞི་འཛུགས་རྒྱུ་ཐག་གཅོད། དེ་བཞིན་ཁྲིམས་མིའི་སྒྲིག་ཡིག་ལ་བཀོད་པའི་འགན་དབང་གཞན་དག་བཅས་སྤྱོད་དགོས།

ལག་བསྟར་སྒྲིག་གཞི་ནི་ཏུང་ཧྲི་ལྷན་ཚོགས་སམ་ལག་བསྟར་ཏུང་ཧྲི་ཡིན་ལ། ཏུང་ཧྲི་འགོ་གཙོ་དང་། ལག་བསྟར་ཏུང་ཧྲིའམ་སྤྱི་གཉེར་པས་ཁྲིམས་མིའི་སྒྲིག་ཡིག་གི་གཏན་འབེབས་ལྟར་ཁྲིམས་བཀོད་འཐུས་ཚབ་པ་འཁུར་དགོས་པ་དང་། ཏུང་ཧྲི་ལྷན་ཚོགས་སམ་ལག་བསྟར་ཏུང་ཧྲི་བཙུགས་མེད་ན། ཁྲིམས་མིའི་སྒྲིག་ཡིག་ཏུ་གཏན་འབེབས་བྱས་པའི་འགན་འཁུར་པ་གཙོ་བོས་དེའི་ལག་བསྟར་སྒྲིག་གཞིི་དང་ཁྲིམས་བཀོད་འཐུས་ཚབ་པ་བྱེད་དགོས། །

དོན་ཚན་གྱ་གཉིས་པ། ཁེ་གཉེར་ཁྲིམས་མིར་ལྟ་ཞིབ་པའི་ལྷན་ཚོགས་སམ་ལྟ་ཞིབ་པ་སོགས་ལྟ་སྐུལ་སྒྲིག་གཞི་བཙུགས་ཡོད་ན། ལྟ་སྐུལ་སྒྲིག་གཞིས་ཁྲིམས་ལྟར་ཁྲིམས་མིའི་ནོར་དོན་ལ་ཞིབ་བཤེར་བྱེད་དགོས་པ་དང་། ལག་བསྟར་སྒྲིག་གཞིའི་ཁོངས་མི་དང་། མཐོ་རིམ་དོ་དམ་མི་སྣས་ཁྲིམས་མིའི་ལས་གནས་ལག་བསྟར་བྱེད་པའི་བྱ་སྤྱོད་དང་། དེ་བཞིན་ཁྲིམས་མིའི་སྒྲིག་ཡིག་ཏུ་གཏན་འབེབས་བྱས་པའི་འགན་འཁྲི་གཞན་དག་བཅས་ལ་ལྟ་སྐུལ་བྱེད་དགོས། ། ༼ མུ་འགོད། ༽