ཧཱུཾ་ཀཱ་ལ་རཱུ་བ་རབ་བརྗིད་དྲག་པའི་སྐུ། །ཁ་ནས་ཁྲག་འཛག་མི་མགོའི་ཕྲེང་བ་ཡི། །ག་ཤལ་རབ་འཕྱང་མི་བཟད་བདུད་དཔུང་གི །ང་རྒྱལ་དྲེགས་པ་འཇོམས་པ་ཁྱོད་ལ་བསྟོད། །ཅ་ཅོ་ཆེ་ལྡན་རྡོ་རྗེའི་གླུ་དབྱངས་དང༌། །ཆ་ཤས་ཡོངས་སུ་རྫོགས་པའི་གཏོར་མ་ནི། །ཇ་ཆང་ཕུད་དང་དགྲ་བགེགས་བསྒྲལ་བའི་ཤ །ཉ་ཤ་ཁྲག་ཞག་རྒྱ་མཚོའི་བརྒྱན་པ་འབུལ། །ཏ་ཐཱ་ག་ཏའི་བསྟན་ལ་གནོད་བྱེད་པའི། །ཐ་ཆད་དགྲ་བགེགས་རྡུལ་དུ་རློག་པ་དང༌། །ད་ནས་བཟུང་སྟེ་རྣལ་འབྱོར་བདག་ཅག་གི །ན་རྒའི་འཆི་བའི་འཇིགས་པ་འཇོམས་ལ་བསྟོད། །པ་བ་སངས་ལྟར་རབ་དཀར་མཆེ་བ་གཙིགས། །ཕ་རོལ་འཇོམས་པའི་སྤྱན་རྩ་གློག་ལྟར་འཁྱུག །བ་སྤུ་དུས་མཐའི་མེ་ཆེན་འབར་བ་ཡིས། །མ་ལུས་བགེགས་དཔུང་བསྲེགས་པ་ཁྱོད་ལ་བསྟོད། །ཙ་མཎྚི་སོགས་མ་མོ་ཀུན་གྱི་བདག །ཚ་ཟེར་རབ་ཏུ་རྒྱས་པའི་གཟི་བརྗིད་ཅན། །ཛ་ཞེས་འཕྲིན་ལས་བསྒྲུབ་ལ་བོས་པའི་ཚེ། །ཝ་སྐྱེས་ལྟ་བུའི་བགེགས་འཇོམས་ཁྱོད་ལ་བསྟོད། །ཞྭ་ལྟར་འབྱུང་བོ་ཀུན་གྱིས་སྤྱི་བོས་བསྟེན། །ཟ་བྱེད་མ་ཧེ་ཁྲོས་པའི་ཞལ་གདངས་ཤིང༌། །འ་འུར་དར་དིར་སྒྲོག་པས་ས་ཆེན་གཡོ། །ཡ་ལས་སྐྱེས་པའི་ཐོད་དབྱུག་འཛིན་ལ་བསྟོད། །རྭ་དང་རྨིག་པ་རྣོན་བའི་མ་ཧེ་དང༌། །ལ་ལ་རླུང་ནག་ཚུབ་མ་ཞོན་པའི་འཁོར། །ཤ་ཀ་ལི་དང་གཤིན་རྗེ་འབེབས་མ་སོགས། །ས་གསུམ་འབྱུང་བོའི་འཁོར་གྱིས་བསྐོར་ལ་བསྟོད། །ཧ་ཧ་དྲག་ཏུ་བཞད་པའི་དཔལ་ཡོན་ཅན། །ཨརྒྷཾ་ལ་སོགས་མཆོད་པ་བཞེས་ནས་ཀྱང༌། །དཔལ་ལྡན་གཤིན་རྗེའི་གཤེད་ཀྱི་སྤྱན་སྔ་རུ། །ཞལ་བཞེས་དམ་བཅའ་གཡེལ་བ་མེད་པར་མཛོད། །
