ཚྭ།
ཁྱོད་ཀྱིས་སྐད་ཆའི་ནང་དུག་འདྲེན་ཞོར
ངའི་ལག་ལ་མེ་ཏོག་འཇོག་དོན་ཅི་ཡིན
ཁྱོད་རང་འབྲེལ་བའི་བཙོན་ཁང་ནང་རྒྱལ་པོའི་ཚུལ་ཏུ་བཞུགས་ཏེ
ཟླ་བ་སྐར་ཁུང་ཁ་ནས་འཛིན་དོན་ཅི་ཡིན
དཀའ་སྡུག་གི་སྐྱེད་མོས་ཚལ་ན
གློག་དམར་འཁྱུག་ཅིང་ཙག་ལོག་བྱེད
ཁྱོད་ཀྱི་ཕྲག་པ་གཡས་པ་བར་སྣང་དུ་གནས
གཡོན་པས་སྟོང་ལབ་འཐེན
དེ་གཉིས་བར་གྱི་མུན་པའི་ནང་ན་ག་ཞ་ནི་ལྕགས་སྒྲོག་བཞིན་འཁྱགས
ཐོས་པ་ཐུང་ཡང་དེས་དཔག་ཚད་མང་པོ་དབང་དུ་བསྡུ་བར་ནུས
སྐད་ཆ་གཉིས་པ་ནད་བཞིན་ཁྱོད་ཀྱི་ལུས་སེམས་ཧྲིལ་པོར་ཁྱབ
ཁྱོད་ཀྱི་ལུས་སྟེང་ནས་དུས་ཚོད་སྐར་ཆ་རེ་རེ་བཞིན་སྨིན་ན་ཡང
རྣམ་ཤེས་ནི་སྔར་ནས་དེ་དག་དང་གྱེས
ཁྱོད་ཀྱིས་རང་ཉིད་རྨོངས་པའི་ཐོག་ཁང་ནང་ཁྲིད་དེ
བར་སྣང་གི་ཚན་རིག་གླེང
ཡང་། སྲང་གི་མི་ཚོགས་རྫུན་མ་དག་ལ
སྟོང་བའི་ཁྲོ་ཉམས་ཀྱི་གླང་སྨྱོན་ཞོན་ཏུ་བཅུག
ཁྱོད་ཀྱི་ནུས་མཐུའི་གྲོང་ཁྱེར་ན
སྐྱེ་བོ་ཚོས་རང་ཉིད་བཙོངས་ཏེ
གཞན་གྱི་ཚིག་གི་རྟ་ལྕག་འོག་ནས་དགོད་སྒྲ་སྒྲོག
ཁྱོད་ཀྱིས་རག་ཤུབས་སྟོང་བ་ཞིག་གི་ནང
རང་ཉིད་བསྡུས་ཏེ་གཞན་ལ་པི་ཝང་བརྡུངས་དོན་ཅི་ཡིན
