རི་ཀླུང་ལ་ལྗང་མདོག་བསྣན་ནས་སྐྱེ་ཁམས་ཐོན་ལས་འཕེལ་རྒྱས་ལ་ཤུགས་སྣོན་བྱ་ཆེད། ཉེ་ཆར་འཛམ་ཐང་རྫོང་བུག་རྗེ་ཡུལ་ཚོའི་སྲོང་སྡེ་སྡེ་བའི་སྦྱར་མྱུག་རྟེན་གཞིས་མྱུ་གུ་ཕྱིར་འཚོང་བྱེད་པའི་རྫོགས་ལྡན་གྱི་དུས་སྐབས་བསུས་ནས། དཔྱིད་ཀྱི་གསོན་ཤུགས་འབར་བའི་སྐྱེ་ཁམས་ཀྱི་ལྡེབས་རིས་མཐོ་སྒང་གི་དག་ཞིང་དུ་བཀྲམ།

        གསར་འགོད་པ་འཛམ་ཐང་རྫོང་བུག་རྗེ་ཡུལ་ཚོའི་སྲོང་སྡེ་སྡེ་བའི་སྦྱར་མྱུག་རྟེན་གཞི་བསྐྱོད་ནས་མཐོང་བར། ས་བརྐོ་འཕྲུལ་ཆས་ཀྱིས་ས་སློག་བཞིན་ཡོད་པ་དང་སྡེ་མི་རྣམས་ཀྱིས་མྱུ་གུ་འབལ་བ་དང་དང་ས་གྲུག་པ། གྲངས་ཀ་བརྩི་བ་དང་ཆགས་པོ་བསྡམས་པ་བཅས་ཀྱི་ལས་ལ་བྲེལ་བཞིན་ཡོད།

        སྲོང་སྡེ་སྡེ་བ་ནི་འཛམ་ཐང་རྫོང་གི་བུག་རྗེ་ཡུལ་ཚོར་གནས་ཤིང་ཆ་སྙོམས་མཚོ་འཕགས་ལ་སྨི་3100ཡས་མས་ཡོད་ཅིང་། སྡེ་བ་ཡོངས་ལ་ཁྱིམ་ཚང་169དང་སྡེ་མི765ཡོད། སྡེ་བ་འདི་ནི་ཞིང་མ་འབྲོག་གི་སྡེ་བ་ཞིག་ཡིན་པ་དང་སྔོན་ཆད་སྲོལ་རྒྱུན་གྱི་ཞིང་ལས་གཙོ་བོར་བྱས་པའི་ཐོན་སྐྱེད་རྣམ་པར་བརྟེན་པ་ཡིན། ཉེ་བའི་ལོ་ཤས་ཀྱི་རིང་། བུག་རྗེ་ཡུལ་ཚོའི་སྲོང་སྡེ་སྡེ་བས་ཐུན་མོང་དཔལ་འབྱོར་འཕེལ་རྒྱས་སུ་གཏོང་བ་དང་ཞིང་ལས་ཐོན་སྐྱེད་ཀྱི་རྣམ་པ་རིམ་སྤོར་བྱས་ཏེ་ས་ཞིང་འཁོར་རྒྱུགས་བྱེད་ཐབས་གལ་ཆེན་དུ་བཟུང་ནས། ཏང་ཨུ་དང་སྲིད་གཞུང་། སྡེ་བའི་ཨུ་ལྷན་གཉིས་ཀྱི་རྒྱབ་སྐྱོར་འོག་ཁུལ་ཡོངས་ཀྱི་ཆེས་ཆེ་བའི་སྦྱར་མྱུག་རྟེན་གཞི་ཚུགས་ནས་མཚོ་འཕགས་མཐོ་བའི་ས་གནས་སུ་འཚར་སྐྱེ་རན་པའི་མྱུ་གུ་འདེབས་སྐྱོང་བྱས།

        ཐེངས་དེའི་མཐོ་སྒང་གི་སྦྱར་མྱུག་ནི་2020ལོ་དང་2021ལོར་ས་གནས་མང་ཚོགས་རྩ་འཛུགས་བྱས་ཏེ་འདེབས་འཛུགས་བྱས་པ་ཡིན་ཞིང་། ཤིང་རྒྱུ་མཚར་ལ་མྱུག་རྩ་རྒྱས་ནས་ཕྱིར་འཚོང་བྱས་ཆོག་པའི་ཚད་གཞི་ལོན་པས། ཟླ་4ཚེས་4ཉིན་ནས་བཟུང་རིམ་བཞིན་མཛོད་དགེ་དང་ཧུང་ཡོན་སོགས་རྫོང་ཁག་དུ་འགྲུལ་སྐྱེལ་བྱས་ནས་རྨ་ཆུའི་ཆུ་རྒྱུད་ཀྱི་སྐྱེ་ཁམས་བཅོས་སྐྱོང་དུ་འདེབས་དགོས་པ་ཡིན། སྤྱིའི་ཕྱིར་འཚོང་ཚད་ཕལ་ཆེར་མྱུ་གུ་ས་ཡ་2སུ་སླེབས་ཐུབ་པ་དང་ཕྱིར་འཚོང་ཡོང་འབབ་སྒོར་ས་ཡ1་དང་འབུམ་9མངོན་འགྱུར་ཡོང་ཐུབ། མྱུ་གུ་ཕྱིར་འཚོང་བྱེད་པའི་ལས་དོན་གྱིས་རྨ་ཆུའི་སྟོད་རྒྱུད་ཀྱི་མཚོ་འཕགས་མཐོ་བའི་ས་གནས་ཀྱི་མྱུ་གུའི་དགོས་མཁོ་བསྐོང་ཡོད་པར་མ་ཟད་འཛམ་ཐང་རྫོང་གི་མྱུ་གུ་ཕྱིར་འཚོང་བྱེད་པའི་དཀའ་གནད་ཀྱང་སེལ་ཡོད།

        སྦྱར་མྱུག་རྟེན་གཞི་བཙུགས་པས་སྡེ་བ་དེའི་ཞིང་ལས་གསོ་སྐྱོང་གི་རྣམ་པ་བརྗེ་བསྒྱུར་དང་ཐོན་ལས་རྟེན་གཞི་འཛུགས་སྐྲུན་གྱི་གོམ་སྟབས་ཇེ་མགྱོགས་སུ་བཏང་བ་དང་ཞིང་ལས་གཉེར་སྐྱོང་ལམ་སྲོལ་གསར་གཏོད་བྱེད་པར་སྐུལ་འདེད་བཏང་སྟེ་ཞིང་ལས་ཕན་འབྲས་ཇེ་ཆེ་དང་ཞིང་བའི་ཡོང་འབབ་ཇེ་མང་དུ་བཏང་ནས་ཞིང་ལས་ཕྱོགས་བསྡུས་ཐོན་སྐྱེད་ནུས་ཤུགས་དང་ཞིང་ལས་དེང་རབས་ཅན་གྱི་ཆུ་ཚད་མཐོར་འདེགས་བཏང་།

        རྒྱུས་ལོན་བྱས་པ་ལྟར་ན། 2022ལོའི་ལོ་མཇུག་བར་དུ་བུག་རྗེ་ཡུལ་ཚོའི་ཞིང་སྡེ་དར་རྒྱས་གཏོང་བའི་སྦྱར་མྱུག་རྟེན་གཞིས་ཞིང་ལས་རོགས་སྐྱོར་ཡོང་འབབ་སྒོར་ས་ཡ་2མངོན་འགྱུར་བྱུང་བ་དང་། སྡེ་དམངས་ཀྱིས་སྒོ་དྲུང་དུ་ལས་གཉེར་བྱས་ནས་ཡོང་འབབ་འཚོལ་བའི་དམིགས་འབེན་མངོན་འགྱུར་བྱུང་། སྦྱར་མྱུག་ཐོན་ལས་ཀྱིས་མང་ཚོགས་ལ་བདེ་སྐྱིད་ཀྱི་ནམ་མཁའ་ཡངས་མོ་ཞིག་བསྐྲུན་པ་དང་བུག་རྗེ་ཡུལ་ཚོའི་གྲོང་སྡེ་དར་རྒྱས་ལ་གྲུབ་འབྲས་གསར་བ་ཞིག་ཐོབ་ཡོད།