ཚེ་པོ་ལགས་སླར་ཡང་ཚོགས་པ་འདིའི་ཚོགས་གཙོ་རུ་བདམས་ཐོན་བྱུང་།

        སྤྱི་ཟླ་4པའི་ཚེས་3ཉིན། སི་ཁྲོན་ཞིང་ཆེན་འཕྲོད་བསྟེན་བདེ་ཐང་ཨུ་ལྷན་དང་སི་ཁྲོན་ཞིང་ཆེན་དམངས་སྲིད་ཐིང་གི་འབྲེལ་ཡོད་ལས་ཁུངས་ཀྱི་མཛུབ་སྟོན་འོག །སི་ཁྲོན་ཞིང་ཆེན་མི་རིགས་འཕྲོད་བསྟེན་བདེ་ཐང་ཡར་སྐུལ་ཚོགས་པའི་འཐུས་མི་ཚོགས་ཆེན་སྐབས་བཞི་པའི་ཚོགས་འདུ་དང་པོ་དེ་ཁྲེང་ཏུའུ་རུ་འཚོགས།

        ཚོགས་མི་བརྗེ་ལེན་ཚོགས་འདུའི་ཐོག །སི་ཁྲོན་ཞིང་ཆེན་འཕྲོད་བསྟེན་བདེ་ཐང་ཨུ་ལྷན་གྱི་ཚན་སློབ་ཁང་དང་དྲིལ་བསྒྲགས་སློབ་གསོ་ལྟེ་གནས་སོགས་ལས་ཁུངས་ཀྱི་འཐུས་ཚབ་མི་སྣ་ཞུགས་ཡོད་པ་དང་། ཡར་སྐུལ་ཚོགས་པའི་འཐུས་མི་དང་ཆེད་ཞུས་འཐུས་མི་86ཚོགས་འདུ་ལ་ཞུགས་ཡོད། ཚོགས་མི་བརྗེ་ལེན་ཚོགས་འདུ་དེ་སྐབས་གསུམ་པའི་ལས་འཛིན་ལྷན་ཚོགས་ཀྱི་ཚོགས་གཙོ་གཞོན་པའམ་དྲུང་ཡིག་ཆེན་མོ་སྐལ་བཟང་ཚེ་རིང་དང་གྲ་སྒྲིག་ཚོ་ཆུང་གི་ཚོགས་གཙོ་གཞོན་པ་བློ་མཐུན་ཝུན་རུང་ཁང་གཉིས་ཀྱིས་སོ་སོར་གཙོ་སྐྱོང་གནང་བ་རེད། དེ་ནས་འཐུས་ཚབ་རྣམ་པས་བློ་མཐུན་ཚེ་པོས་སྐབས་གསུམ་པའི་ལས་འཛིན་ལྷན་ཚོགས་ཀྱི་ཚབ་བྱས་ནས་ཕུལ་བའི《ཐོག་མའི་ཕུགས་འདུན་མི་བརྗེད། སེམས་ཤུགས་གཅིག་ཏུ་སྒྲིལ། ཚང་མས་མཉམ་དུ་ཡར་སྐུལ་ཚོགས་པ་དེ་བས་ལེགས་པའི་ལེའུ་གསར་པ་རྩོམ》ཞེས་པའི་ལས་དོན་སྙན་ཞུ་ལ་ནན་ཏན་གྱིས་གསན་ནས་གྲོས་མོལ་བྱས།

        ཐེངས་འདིའི་ཚོགས་ཆེན་ཐོག་ལས་འཛིན་ཚོགས་པའི་ཁོངས་མི་89བདམ་རྒྱུར་གྲོས་འཆམ་བྱུང་ནས་བརྡས་ཐག་གཅད་པ་དང་། ལྷོ་ནུབ་མི་རིགས་སློབ་ཆེན་གྱི་གསོ་རིག་སློབ་གླིང་དང་ཁྲེང་ཏུའུ་ཀྲུང་ལུགས་གསོ་རིག་སློབ་ཆེན། དཀར་མཛེས་ཁུལ་བོད་སྨན་ཁང་། ཁྲེང་ཏུའུ་ཧི་མ་ཡའི་བོད་སྨན་ཁང་སོགས་རྒྱུན་ལས་ལས་འཛིན་ལས་ཁུངས་26དང་། ཚོགས་གཙོ་1དང་ཚོགས་གཙོ་གཞོན་པ་8བདམས་པ་རེད།

        ཐེངས་འདིའི་ཚོགས་ཆེན་གྱི《འདེམས་བསྐོ་བྱ་ཐབས》ལྟར་དུ། བློ་མཐུན་ཚེ་པོ་ཡང་བསྐྱར་ཚོགས་གཙོར་བདམས་པ་དང་བློ་མཐུན་སྐལ་བཟང་ཚེ་རིང་དང་ཝང་ཀང་། པདྨ་སྒྲོལ་དཀར། མ་ཧེ་མ་ཧུ། བསོད་ནམས་ཆོས་འཕེལ། ཝུན་རུང་ཁང་། ལིའུ་ཙུའོ་ལིན། ཀྲང་དབྱི་སོགས་མི་8ཚོགས་གཙོ་གཞོན་པར་བདམས་པ་མ་ཟད། ལས་འཛིན་ལྷན་ཚོགས་ཀྱི་ཚོགས་གཙོ་གཞོན་པ་བློ་མཐུན་པདྨ་སྒྲོལ་དཀར་དྲུང་ཡིག་ཆེན་མོ་ལ་བདམས་པ་རེད།

        གསར་དུ་བདམས་ཐོན་བྱུང་བའི་ཚོགས་གཙོ་བློ་མཐུན་ཚེ་པོས་སྤྲོ་སེམས་རབ་ཏུ་འཁོལ་བའི་ངང་ནས། འཐུས་ཚབ་རྣམ་པས་མཉམ་དུ་འབད་བརྩོན་བྱས་ནས་ཚོགས་ཆེན་གྱི་བྱ་རིམ་ཡོངས་རྫོགས་བདེ་བླག་ངང་གྲུབ་པ་རེད་ལ། ཚང་མས་ང་ལ་ཡིད་ཆེས་གནང་ནས་ང་རང་མུ་མཐུད་དུ་སྐབས་གསར་པའི་ཚོགས་གཙོ་ལ་བདམས་པར་བཀའ་དྲིན་ཆེ། ངས་ནུས་པ་ཡོད་རྒུ་བཏོན་ནས་འགན་འཁྲི་འདི་ཁུར་རྒྱུ་ཡིན་ལ། རང་ནུས་གང་ཡོད་ཀྱིས་ཡར་སྐུལ་ཚོགས་པའི་ལས་དོན་ཐད་གསོན་ཤུགས་གསར་པ་དང་ལེའུ་གསར་པ་འབྲི་རྒྱུ་ཡིན་ཞེས་གསུངས།

        སྤྱི་ཟླ་4པའི་ཚེས་12ཉིན། སི་ཁྲོན་ཞིང་ཆེན་མི་རིགས་འཕྲོད་བསྟེན་བདེ་ཐང་ཡར་སྐུལ་ཚོགས་པས་སྐབས་བཞི་པའི་རྒྱུན་ལས་ཨུ་ལྷན་གྱི་ཚོགས་འདུ་ཐེངས་དང་པོ་ཁྲེང་ཏུའུ་རུ་འཚོགས་པ་དང་། སྐབས་གསར་པའི་ལས་འཛིན་ཚོགས་པའི་ལོ་ལྔའི་དམིགས་འབེན་ལས་འགན་ལ་ཞིབ་འཇུག་དང་བཀོད་སྒྲིག་བྱས་པ་རེད། །