གངས་རིའི་མུ་ཁྱུད་ཆབ་རོམ་བརྩེགས་པའི་རྩེ་མོ་མཚོན་ཆའི་ཕྲེང་བ་བཤིགས། །ཁ་བའི་རྡུལ་འཚུབས་བུ་ཡུག་སྦྲེང་བའི་ཅོང་རོང་གཡང་སའི་རྫ་རྡོ་བསྙིལ། །དཔག་ཚད་སྟོང་གི་ཕ་མཐའ་མི་མངོན་རྒྱ་མཚོ་ཆེན་པོ་སྐད་ཅིག་རྒལ། །ཐོགས་བརྡུགས་མེད་པར་གློག་ལྟར་མྱུར་བའི་བོད་འབྲེལ་བཅིངས་འགྲོའི་ལམ་ཆེན་བསྐྲུན། །བཙན་པོའི་འགག་སྒོ་ཟླ་བ་ཁ་ཕྱེས་དགྲ་སྟ་རྣོན་པོའི་ཡངས་པོར་ཕྱེས། །ལྗིད་པའི་ཕ་བང་གནམ་ལྕགས་འབར་བའི་ཐོ་ཆེན་ཕྱར་བས་རྨེད་མེད་བཏུལ། །འུ་ལག་རི་བོ་གནམ་གྱི་ཀ་བ་སྐེད་པར་ཁུག་འདུད་སྟོང་གིས་བཅིངས། །བདེ་སྐྱིད་འདྲེན་པའི་ལྷ་ཡི་ལམ་ཆེན་རྣམ་ཐར་ཐོག་མར་འདི་ནས་བྲིས། །སྲ་འཁྲེགས་བྲག་རིའི་འདེམས་པའི་ཡོལ་བ་ཡངས་པོར་བྱས་པའི་སྙིང་སྟོབས་ཀྱིས། །རྦ་རླབས་སྦུ་ཕྲེང་གནམ་ལ་གཏོར་བའི་རི་ལུང་བར་ནས་ཤིང་ཟམ་བསྐྲུན།། དཔའ་ངར་སྟོང་གི་དཔུང་པ་གཤིག་པའི་སྐྱ་མོའི་ལམ་གྱི་སྐུད་པའི་སྣེས། །མཐོ་སྒང་དབེན་སའི་ར་བར་ཚུད་པའི་སྦས་སྡེའི་འགག་སྒོ་ཐོགས་མེད་ཕྱེས། །སྐུ་སྲོག་ཕུལ་བའི་དཔའ་བོའི་རེ་རེའི་སྙིང་སྟོབས་སྟོང་གིས་གཟི་འོད་འབར། །བདེ་སྐྱིད་འཚོ་བའི་ལམ་ཆེན་འདྲེན་པའི་རི་ལུང་འཁོར་རིགས་གྲངས་མེད་ཉུལ། །ཕྱི་མིག་འཁོར་བའི་འདས་དོན་རི་མོ་ཡིད་ལ་བྲིས་པའི་རྗེས་དྲན་གྱིས། །བརྗེད་ཐབས་མེད་པའི་ཏང་གི་བཀའ་དྲིན་སྙིང་ཁྲག་དྲོན་མོའི་དབུས་སུ་འདྲེས། །གསར་རྗེའི་དཔའ་བོའི་དཔུང་པ་བཏེགས་པའི་དམག་ཤོག་རེ་རེའི་སྤོབས་སེམས་དང་། །ཕྱིར་བཀྱེད་མེད་པར་དཔའ་ངར་སྟོང་གིས་གདོང་ལེན་བྱས་པའི་སྙིང་སྟོབས་ཀྱིས། །བདེ་ལེགས་ངང་དུ་འོད་སྟོང་འཕྲོ་ཞིང་གཞུང་ལམ་དྲངས་བའི་འཕེལ་རྒྱས་སུ། །རྒྱ་བོད་མཛའ་མཐུན་སྦྲེལ་བའི་ལམ་གཉིས་བདེ་བླགས་ངང་དུ་བསྐྲུན་ཞེས་གྲགས། །སྐྱིད་སྡུག་རེས་མོས་ལོ་རྒྱུས་རིང་མོ་དྲན་པའི་ཤ་དང་རུས་པའི་གསེང་། །ཡུན་རིང་ཐིམ་པའི་སྟོང་བསམ་འདི་ཡི་ཕ་ཡུལ་ལུང་པའི་འཚོ་བཅུད་དེ། །དེང་དུས་མི་མངོན་ན་བུན་བཞིན་དུ་རྗེས་མེད་མཁའ་ལ་ཐིམ་ན་ཡང་། །རྟོགས་པའི་ཕ་ས་འདི་ཡི་རུམ་དུ་ད་དུང་ཚོར་བའི་བཞིན་རས་གསལ། །སྐྱོ་ངལ་མེད་པའི་དུས་རབས་གསར་པའི་འཚོ་བཅུད་ཕུན་སུམ་ཚོགས་པ་ཡང་། །ལམ་གཉིས་གཞིས་མལ་བྱེད་པོའི་དྲིན་གྱིས་སེན་ཁྲག་བརྟོལ་བའི་རི་མོ་ལས། །ཡང་ཡང་འཇོ་བའི་འདོད་པའི་ཆར་རྒྱུན་འབད་མེད་དབྱིག་གི་ནོར་བུ་འདི། །གཞན་དུ་མ་དམིགས་མེས་པོའི་ཟོལ་མེད་ལྷག་བསམ་དྲོན་མོས་མཛད་རྗེས་ཡིན།།
