ཀྲུང་གོའི་ཞིང་པའི་ལོ་ལེགས་དུས་ཆེན་ཐེངས་བདུན་པའི་སྐབས་གནས་མཆོག་དཀར་མཛེས་ཀྱི་སིལ་ཏོག་གི་དྲི་ཞིམ་གང་སར་འཐུལ་པ་དང་། བང་མཛོད་འབྲུ་རིགས་ཀྱིས་གང་བ་རེད། ཞིང་པ་ཚོས་སྟོན་བསྡུའི་དུས་ཚོད་དམ་འཛིན་བྱས་ནས་ཞིང་དང་མུ་ཁ་ཚང་མར་སོ་ནམ་གྱི་ལས་ལ་བྲེལ་བའི་རྣམ་པས་ཡོངས་སུ་ཁེངས་ཤིང་། ཁོ་ཚོའི་གདོང་ལ་ལོ་ལེགས་ཀྱི་འཛུམ་མདངས་རབ་ཏུ་རྒྱས། 

དཀར་མཛེས་ཁུལ་ནི་སི་ཁྲོན་ཞིང་ཆེན་གྱི་ནས་ཐོན་སྐྱེད་རྟེན་གཞི་ཆེ་ཤོས་ཡིན་པ་དང་ནས་འདེབས་ཁྱོན་མུའུ་ཁྲི་50ཟིན་པ་དང་སྤྱིའི་ཐོན་འབབ་ཏུན་ཁྲི་10ལྷག་ཟིན་པས་ཞིང་ཆེན་ཡོངས་ཀྱི་བརྒྱ་ཆ་70ཡན་བཟུང་ཡོད། 

ད་ལོ་ནས་བཟུང་ཀྲུང་དབྱང་དང་ཞིང་ཆེན་ཏང་ཨུའི་ཡིག་ཆ་ཨང་དང་པོའི་སྙིང་དོན་ལག་བསྟར་དོན་འཁྱོལ་མཐའ་གཅིག་ཏུ་བྱས་ཏེ་དུས་རབས་གསར་པ་དང་ཆུ་ཚད་དེ་བས་མཐོ་བའི“མཐོ་སྒང་འབྲུ་མཛོད”འཛུགས་སྐྲུན་སྤྱི་འདོམས་སུ་བྱེད་པ་དང་། རྒྱ་ཁྱོན་བརྟན་པོ་དང་མུའུ་རེ་རེའི་ཐོན་ཚད་གཉིས་ཀར་ཤུགས་བསྣན་རྒྱུ་མཐའ་འཁྱོངས་བྱས་ནས་ཁུལ་ཡོངས་ཀྱི་འབྲུ་རིགས་སླར་ཡང་ལོ་ལེགས་ཡོང་རྒྱུར་སྐུལ་འདེད་བཏང་བ་རེད།

རྒྱལ་ཁབ་བསྡོམས་རྩིས་ཅུས་སི་ཁྲོན་བརྟག་ཞིབ་སྤྱི་ཁྱབ་རུ་ཁག་གིས་ཞིབ་བཤེར་གཏན་འཁེལ་བྱས་པ་བརྒྱུད། 2024ལོར་དཀར་མཛེས་ཁུལ་གྱི་དབྱར་བསྡུའི་འབྲུ་རིགས་ཀྱི་སྤྱིའི་ཐོན་ཚད་རྒྱ་མ་ཁྲི་2974.8ཟིན་པ་དེ་ལོ་གོང་མ་ལས་བརྒྱ་ཆ་1.1འཕར་ཡོད་པ་རེད། དེའི་ནང་དུ་ནས་དང་ཞོག་ཁོག་ཐོན་ཚད་ན་ནིང་ལོ་ལས་བརྒྱ་ཆ་7.2དང་བརྒྱ་ཆ་18.7འཕར་ཡོད།

ཉེ་བའི་ལོ་ཤས་རིང་རོང་བྲག་རྫོང་གིས“སྤྱི་གཉེར་ཁང་དང་མཉམ་ལས་ཁང་། ཞིང་དུད”བཅས་ཟུང་དུ་འབྲེལ་བའི་འདེབས་འཛུགས་བྱེད་སྟངས་སྤྱད་དེ་ས་ཞིང་བརྒྱུད་བཤུག་དང་། སྐྱེ་ཁམས་སླར་གསོ། ཕྱིར་ཚོང་སོགས་ཀྱི་ཐབས་ལམ་བརྒྱུད་ནས་ཐོན་སྐྱེད་དང་ཚན་ཞིབ། ལས་རྣམ་གསར་པ་བཅས་གཞི་གཅིག་ཏུ་འདུས་པའི་ཀུ་ཤུའི་ཐོན་ལས་མ་ལག་ཅིག་བཏོད་ཡོད། མིག་སྔའི་བར་འདེབས་འཛུགས་རྒྱ་ཁྱོན་མུའུ་8215ཟིན་ནས་ཡུལ་ཤོག（གྲོང་རྡལ）10ཡི་གྲོང་ཚོ་40ལ་ཁྱབ་ཡོད། སྔོན་དཔག་བྱས་ན་2024ལོར་ཐོན་འབབ་རྒྱ་མ་ཁྲི་160ཟིན་ངེས་དང་ཐོན་རྫས་རིན་ཐང་སྒོར་ཁྲི་900ལྷག་ཙམ་ཐུབ་རྒྱུ་རེད། 

2023ལོར་དཀར་མཛེས་ཁུལ་གྱི་ཤིང་ཏོག་ལྡུམ་རའི་རྒྱ་ཁྱོན་མུའུ་ཁྲི་59.21ཟིན་པ་དང་ཐོན་ཚད་ཏུན་ཁྲི་9.37ཡིན་པ་རེད། །