སྤྱི་ཟླ་10པའི་ཚེས་1ཉིན་ནས་ཚེས་7ཉིན་བར་རྒྱལ་སྟོན་དུས་ཆེན་གྱི་ཡུལ་སྐོར་ངལ་གསོའི་ཉིན་བདུན་རིང་དཀར་མཛེས་ཁུལ་གྱིས་ཁྱོན་ཡུལ་སྐོར་བ་ཁྲི་312.72ལ་སྣེ་ལེན་བྱས་པ་དང་ཡུལ་སྐོར་ཕྱོགས་བསྡུས་ཡོང་འབབ་སྒོར་དུང་ཕྱུར་34.44ཟིན་ཡོད་ལ། ན་ནིང་ལོ་ལས་བརྒྱ་ཆ་13.85དང་བརྒྱ་ཆ་14སོ་སོར་འཕར་ནས་རྒྱལ་སྟོན་ཡུལ་སྐོར་སྣེ་ལེན་གྱི་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད་པ་རེད།

སྤྱི་ཟླ་10པའི་ཚེས་1ཉིན་ཧྥུང་ཧྥ་ཀུའེ་ཡིས་དར་མདོ་གྲོང་ཁྱེར་དུ་རྒྱལ་སྟོན་གུང་གསེང་རིང་གི་ཡུལ་སྐོར་ཞབས་ཞུ་དང་། འགྲིམ་འགྲུལ་ཤར་བགྲོད་འགན་ལེན། ཁྲོམ་རའི་མཁོ་སྤྲོད། བདེ་འཇགས་ཐོན་སྐྱེད་སོགས་གཙོ་གནད་ལས་དོན་ལ་ལྟ་སྐུལ་ཞིབ་བཤེར་དང་དུས་ཆེན་རིང་གི་ལས་རེས་མི་སྣར་གཟིགས་སྐོར་དང་འཚམས་འདྲི་གནང་བ་རེད།

ཉེ་ཆར། 《མཛེས་ལྡན་དཀར་མཛེས་ཀྱི་འཛུགས་སྐྲུན་འཆར་འགོད（2024ལོ་ནས2035ལོ）》ལ་དཀར་མཛེས་ཁུལ་ཨུ་དང་ཁུལ་མི་དམངས་སྲིད་གཞུང་གིས་ཆོག་མཆན་གནང་བ་དང་འབྲེལ་དངོས་སུ་ཁྱབ་བསྒྲགས་བྱས་པ་རེད། འཆར་འགོད་དེའི་ནང་མཛེས་ལྡན་དཀར་མཛེས་འཛུགས་སྐྱོང་གི་འཐབ་ཇུས་ངེས་གནས་དང་། དམིགས་ཚད་ཀྱི་རེ་འདུན། ལས་འགན་གཙོ་བོ། འགན་ལེན་བྱེད་ཐབས་བཅས་བཏོན་པ་དེ་མིག་སྔ་དང་སླད་ཕྱིན་དུས་སྐབས་རིང་པོ་ཞིག་ནང་མཛེས་ལྡན་དཀར་མཛེས་འཛུགས་སྐྱོང་ལ་མཛུབ་ཁྲིད་བྱེད་པའི་གཞི་འཛིན་ས་ཞིག་ཏུ་འགྱུར་རྒྱུ་རེད།

ཤེས་རྟོགས་བྱུང་བར་གཞིགས་ན། 2025ལོའི་ལོ་མཇུག་གོང་དཀར་མཛེས་ཁུལ་གྱིས་གསར་སྐྲུན་དང་འཛུགས་སྐྲུན་མཐོར་གཏོང་བཅས་ཟུང་འབྲེལ་གྱིས་བྱེད་ཐབས་སྤྱད་དེ་རིགས་མི་འདྲ་བའི་དངོས་མང་བཤམས་སྟོན་ཁང་119བསྐྲུན་རྒྱུ་ཡིན་ལ། དེའི་ཁྲོད་དངོས་མང་བཤམས་སྟོན་ཁང་ཆུང་གྲས་55དང་། ཕྱི་ཕྱོགས་སྒོ་དབྱེའི་གཞུང་ཁོངས་དངོས་མང་བཤམས་སྟོན་ཁང་10། གསར་དུ་འཛུགས་རྩིས་ཡོད་པའི་དངོས་མང་བཤམས་སྟོན་ཁང་54བཅས་ཡོད་པ་རེད། །