དྲི་བ། མི་རིགས་ས་ཁོངས་རང་སྐྱོང་བྱེད་པར་ཆ་རྐྱེན་གང་དག་ཚང་དགོས།
<<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས>>་ཀྱི་དོན་ཚན་བཞི་བ་དང་། <<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་ས་ཁོངས་རང་སྐྱོང་བཅའ་ཁྲིམས>>
་ཀྱི་དོན་ཚན་གཉིས་པ་ལས། གྲངས་ཉུང་མི་རིགས་སོ་སོ་འདུས་སྡོད་བྱེད་སའི་ས་གནས་ཁག་ཏུ་ས་ཁོངས་རང་སྐྱོང་དངོས་སུ་བྱ་རྒྱུ་ཞེས་གཏན་འབེབས་གསལ་བོ་བྱས་ཡོད་ལ། གཏན་འབེབས་འདི་ལ་གཤམ་གསལ་གྱི་ཆ་རྐྱེན་དག་ཚང་དགོས།
གཅིག མི་རིགས་ས་ཁོངས་རང་སྐྱོང་ནི་གྲངས་ཉུང་མི་རིགས་འདུས་སྡོད་བྱེད་པའི་ས་གནས་ཡིན་པ་སྔོན་འགྲོའི་ཆ་རྐྱེན་བྱེད་དགོས། འདུས་སྡོད་ཅེས་པ་གྲངས་ཉུང་བའི་མི་རིགས་ག་གེ་མོ་སྡོད་གནས་ཀྱི་ས་ཁོངས་ཅུང་གཅིག་འདུས་ཡིན་པ་མ་ཟད། སྡོད་གནས་དེའི་ས་ཁུལ་གྱི་སྤྱིའི་མི་གྲངས་ཀྱི་ཁྲོད་དུ་གྲངས་ཚད་དང་བསྡུར་ཚད་ངེས་ཅན་བཟུང་ཡོད་པ་ལ་བྱ།
གཉིས། འདུས་སྡོད་ས་ཁོངས་ཀྱི་གཞི་རྒྱ་ངེས་ཅན་ཞིག་ལ་ཐོན་ཐུབ་ཚེ། ད་གཟོད་རང་སྐྱོང་གི་སྡེ་ཚན་ཞིག་གྲུབ་ཆོག འདུས་སྡོད་ནི་ཁ་འཐོར་ཏུ་སྡོད་པ་ལ་ཆ་བཞག་ནས་བཤད་པ་ཡིན། གྲངས་ཉུང་མི་རིགས་ལ་ལ་གྲོང་སྡེའམ་ཡུལ་ཚོ་ཙམ་དུ་འདུས་སྡོད་བྱས་ཡོད་པ་དང་། ཡང་ལ་ལ་ནི་ཤང་དང་གྲོང་རྡལ་མངའ་ཁོངས་ཁྲོད་དུ་འདུས་སྡོད་བྱས་ཡོད་པ་ལས། ཉེ་འཁོར་གྱི་ས་ཁོངས་དག་མི་རིགས་དེ་ག་འདུས་སྡོད་བྱེད་པའི་ས་གནས་མིན་ཕྱིར་མི་རིགས་ཤང་མ་གཏོགས་མི་རིགས་རང་སྐྱོང་ས་གནས་འཛུགས་ཐབས་མེད་པ་རེད། དེ་བས། རང་སྐྱོང་ལྗོངས་དང་རང་སྐྱོང་ཁུལ། རང་སྐྱོང་རྫོང་འཛུགས་པར་གྲངས་ཉུང་མི་རིགས་འདུས་སྡོད་ཀྱི་ས་ཁོངས་ངེས་པར་དུ་གཞི་རྒྱ་ངེས་ཅན་ཞིག་ལ་ཐོན་དགོས་པ་རེད།
གསུམ། མི་རིགས་རང་སྐྱོང་ས་གནས་ནི་གྲངས་ཉུང་མི་རིགས་གཅིག་གམ་ཡང་ན་ཁ་ཤས་འདུས་སྡོད་བྱེད་ཁུལ་རྨང་གཞི་བྱས་ཏེ་རང་སྐྱོང་ས་གནས་བཙུགས་ཆོག མི་རིགས་ས་ཁོངས་རང་སྐྱོང་བཅའ་ཁྲིམས་ཀྱི་དོན་ཚན་བཅུ་གཉིས་པ་ལས། གྲངས་ཉུང་མི་རིགས་འདུས་སྡོད་ཀྱི་ས་གནས་སུ་ས་གནས་དེ་གའི་མི་རིགས་ཀྱི་འབྲེལ་བ་དང་། དཔལ་འབྱོར་འཕེལ་རྒྱས་འགྲོ་ཚུལ་སོགས་ཀྱི་ཆ་རྐྱེན་ལ་བལྟ་རྒྱུ་དང་འབྲེལ་ལོ་རྒྱུས་ཐོག་གི་གནས་ཚུལ་དང་ཡང་བསྟུན་ནས་གྲངས་ཉུང་མི་རིགས་གཅིག་གམ་ཁ་ཤས་འདུས་སྡོད་བྱེད་ཁུལ་རྨང་གཞིར་བྱས་པའི་རང་སྐྱོང་ས་གནས་བཙུགས་ཆོག་པ་གཏན་འབེབས་བྱས་ཡོད། དཔེར་ན། མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ལྟ་བུ། ཡང་ས་གནས་ཁ་ཤས་སུ་འདུས་སྡོད་བྱས་པའི་གྲངས་ཉུང་མི་རིགས་མང་པོ་ཡོད་ཕྱིར་རིགས་སོ་སོའི་རང་སྐྱོང་རྫོང་ཞེས་མིང་བཏགས་ཡོད། དཔེར་ན། ཀོང་ཞི་ཀྲོང་རིགས་རང་སྐྱོང་ལྗོངས་ལུང་ཧྲིན་རིགས་སོ་སོའི་རང་སྐྱོང་རྫོང་ལྟ་བུ།
བཞི། མི་རིགས་རང་སྐྱོང་ས་གནས་ཀྱི་ཁོངས་སུ་མི་རིགས་གཞན་དག་སྡོད་གནས་ཀྱི་ས་ཁོངས་གཏོགས་ཆོག མི་རིགས་རང་སྐྱོང་བཅའ་ཁྲིམས་ཀྱི་དོན་ཚན་བཅུ་གཉིས་པ་ལས། མི་རིགས་རང་སྐྱོང་ས་གནས་ཀྱི་ཁོངས་སུ་ས་གནས་དེ་གའི་གནས་ཚུལ་དངོས་ལ་གཞིགས་ཏེ་རྒྱ་རིགས་སམ་མི་རིགས་གཞན་དག་ཡོད་པའི་སྡོད་དམངས་ཁུལ་དང་། གྲོང་ཁྱེར་དང་གྲོང་རྡལ་ཁག་གཅིག་གཏོགས་པར་བྱས་ཆོག་པའི་གཏན་འབེབས་བྱས་ཡོད།
