སྤྱི་ཟླ་4པའི་ཚེས་30ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་པེ་ཅིང་དུ་ཀྲུང་གོར་འཚམས་འདྲིར་ཡོང་བའི་འཇར་པན་གྱི་ཕྱི་འབྲེལ་བློན་ཆེན་ཨན་ཝིན་ཞུང་དང་མཇལ་འཕྲད་གནང་།
　　ལི་ཁེ་ཆང་གིས་ཀྲུང་གོ་དང་འཇར་པན་གྱི་འབྲེལ་བ་ཡུན་རིང་བརྟན་བརླིང་ངང་འཕེལ་རྒྱས་སུ་གཏོང་བ་ནི་རྒྱལ་ཁབ་གཉིས་དང་རྒྱལ་ཁབ་གཉིས་ཀྱི་མི་དམངས་ཀྱི་རྩ་བའི་ཁེ་ཕན་དང་མཐུན་པར་མ་ཟད། ས་ཁུལ་དང་འཛམ་གླིང་གི་བརྟན་འཇགས་དར་རྒྱས་ལ་ཕན་ནུས་ཆེན་པོ་ཐོན་ངེས། ཉེ་བའི་ལོ་འགའི་རིང་ལ་ཀྲུང་གོ་དང་འཇར་པན་གྱི་འབྲེལ་བ་ལམ་ཀྱོག་ཏུ་ཞུགས་པ་དང་། དེང་སྐབས་རྒྱལ་ཁབ་གཉིས་ཀྱི་འབྲེལ་བ་ཇེ་ལེགས་སུ་འགྱུར་བཞིན་འདུག་ནའང་། རྨང་གཞི་སྔར་བཞིན་ཞན་པས་ཕྱོགས་གཉིས་ཀྱི་འགན་ཁུར་ཡོད་པའི་སྒོ་ནས་ཀྲུང་གོ་དང་འཇར་པན་གྱི་འབྲེལ་བའི་ཡང་དག་ཁ་ཕྱོགས་ལ་ངོས་འཛིན་བྱ་དགོས། ཀྲུང་གོ་ཕྱོགས་ནས་ལོ་རྒྱུས་ལ་དཔེ་ལྟ་དང་མ་འོངས་པར་ཁ་ཕྱོགས་པའི་དགོངས་དོན་ལྟར་འཇར་པན་དང་མཉམ་དུ་འབད་པ་ཆེན་པོས་ཆབ་སྲིད་ཡིད་ཆས་གོང་འཕེལ་དུ་བཏང་ནས་རྒྱལ་ཁབ་གཉིས་ཀྱི་འབྲེལ་བ་ཡང་བསྐྱར་རྒྱུན་ལྡན་གྱི་ལམ་དུ་ཞུགས་པར་སྐུལ་འདེད་གཏང་འདོད་ཅེས་བསྟན།
　　ཨན་ཝིན་ཞུང་གིས་འཇར་པན་ཕྱོགས་ཀྱིས་འཇར་པན་དང་ཀྲུང་གོ་གཉིས་ཀྱི་ཆབ་སྲིད་ཡིག་ཆ་བཞིའི་དགོངས་དོན་ལྟར། ཕན་ཚུན་བར་མཉམ་ལས་ཀྱི་གྲོགས་པོར་བརྩི་བ་དང་། ཕན་ཚུན་བར་འཇིགས་སྣང་མི་སྐུལ་བའི་ཐུན་མོང་གི་ངོས་འཛིན་རྒྱུན་འཁྱོངས་བྱས་ནས། ཀྲུང་གོ་ཕྱོགས་དང་ཕན་ཚུན་བར་བརྩི་འཇོག་དང་ཡིད་ཆེས་བྱེད་པ། འགལ་བར་དོ་དམ་དང་ཚོད་འཛིན་བྱས་ཏེ་འབད་པ་ཆེན་པོས་རྒྱལ་ཁབ་གཉིས་ཀྱི་འགོ་ཁྲིད་རྒན་རབས་པ་རྣམས་ཀྱིས་གསར་དུ་གཏོད་པའི་འཇར་པན་དང་ཀྲུང་གོའི་འབྲེལ་བ་གོང་དུ་འཕེལ་བར་སྐུལ་འདེད་དང་མ་འོངས་པར་དམིགས་པའི་འཇར་པན་དང་ཀྲུང་གོའི་འབྲེལ་བ་འཛུགས་འདོད། དེ་མིན་འཇར་པན་ཕྱོགས་ནས་ཀྲུང་གོ་ཕྱོགས་ཀྱི་དཔལ་འབྱོར་སྒྲིག་གཞི་རང་བཞིན་གྱི་བཅོས་སྒྱུར་གྱི་ཐབས་ཇུས་ལ་བསྟོད་བསྔགས་བྱེད་བཞིན་ཡོད་པ་དང་། ཀྲུང་གོའི་ཁྱབ་ཁོངས་སོ་སོའི་མཉམ་ལས་ལ་ཤུགས་སྣོན་བྱས་ཏེ་འཇར་པན་དང་ཀྲུང་གོའི་འབྲེལ་བ་འཕེལ་རྒྱས་སུ་འགྲོ་བར་སྐུལ་འདེད་གཏང་འདོད་ཅེས་བསྟན།