ཚེ་སྲོག་ཅིག་འཇིག་རྟེན་དུ་སླེབས་པ་ནི།
སེམས་པ་ཞིག་འཇིག་རྟེན་དུ་ལུས་པ་དང་འདྲ་སྟེ།
སེམས་པ་ཞིག་གི་ངོ་བོར་འཐིམས་པའི་རྣམ་ཤེས་ཀྱི་འབོད་པ་དེ་དག
ངང་སྒུག་དང་རེ་ལྟོས། དྲན་གདུང་དང་ཞེན་ཆགས་ཀྱིས་གྲུབ་ཚུལ་ནི།
ད་ལྟ་ངའི་སེམས་པའི་རྩ་རྒྱུས་ཀྱི་ཕྲེང་བ་གཤགས་ཏེ་འོངས་ཤིང་།
དོན་ལྔ་སྣོད་དྲུག་གི་ལྒང་བུ་བསྐོར་ཏེ་བཞུར་བཞིན་པའི།
ཟུངས་ཁྲག་དྲོན་མོ་འདིས་བདེན་དཔང་བྱེད་ཐུབ།
ཚེ་སྲོག་གི་ཡང་རྩེར་འཛེགས་པ་ནས།
འཇགས་རྒྱུ་མེད་པའི་སེམས་ཀྱི་འཕར་ལྡིང་འདི།
སླ་ངའི་མཐིལ་གྱི་ནས་འབྲུ་དང་འདྲ་བར།
ལྟོངས་ལས་ཤོར་བའི་གཞུ་རྒྱུད་དང་མཚུངས་པར།
རི་ཆུ་ཁྲི་སྟོང་གི་ལམ་ཐག་ལྟར་གཡོས་འོངས།
ང་རྒྱང་ལ་ཕྱིན་པས། ཁོ་ཚོ་ཕ་ཡུལ་དུ་ལུས་སོང་།
འོན་ཀྱང་། མཚན་ནམ་རིང་མོའི་དུས་ཚོད་བསྐྱལ་དུས།
རྒྱང་རིང་གི རྒྱང་རིང་གི་འབོད་སྒྲ་རེ་རེ།
ངའི་སྙན་ལམ་དུ་བབས་པའི་ཁུ་བྱུག་ལྟར་གྲགས་ཡོང་།
ངའི་སེམས་ངོ་ན་འཚེར་བའི་ཟླ་བ་ལྟར་འཆར་ཡོང་།
དྲན་གདུང་གི་སྐར་ཕྲན་འཚེར་དུས། བཞུར་བཞིན་པའི་དུས་ཚོད་དེ་ནི།
རང་གི་སྐྱེས་སྐར་གྱི་ཉིན་མོ་ཡིན་པའང་དྲན་ཡོང་།
