ཀླད་པའི་ཚན་རིག་དང་ཀླད་པའི་ཤེས་རྟོགས་ཀྱི་ཞིབ་འཇུག་ལས། ནམ་རྒྱུན་དབྱང་ལྡན་སྦྱོང་བརྡར་བྱས་ན་སྙིང་ཁམས་ཀྱིས་ཀླད་པ་དང་ལུས་པོར་སྔར་ལས་མང་བའི་ཁྲག་གཤེར་མཁོ་སྤྲོད་བྱེད་པར་ཕན་པ་དང་། ཁྲག་གཤེར་ཇི་ལྟར་མང་ན་དབྱང་རླུང་དེ་ལྟར་མང་བ་མཚོན་ཞིང་། དབྱང་རླུང་ཇི་ལྟར་མང་ན། སྔར་ལས་བདེ་ཐང་ཡིན་པའི་ཀླད་པའི་ཕྲ་ཕུང་ཡོད་པ་སྔ་མོ་ནས་ར་སྤྲོད་བྱུང་ཡོད། དེ་བས། བྱིས་པ་ཞིག་འཚར་ལོངས་བྱུང་བའི་གོ་རིམ་ཁྲོད། ཀླད་པར་ངོ་བོ་འགྱུར་ཐུབ་པའི་རང་བཞིན་ལྡན་པའི་དུས་རིམ་དུ་ལུས་ཕུང་སྦྱོང་བརྡར་བྱས་ན་དེའི་ཚོར་ཤེས་ཀྱི་ནུས་པ་དང་། དྲན་ཤེས་ཀྱི་ནུས་པ། འཆར་སྣང་གི་ནུས་པ། བསམ་གཞིག་གི་ནུས་པ་ལ་སོགས་པའི་ཕྱོགས་ཀྱི་འཕེལ་རྒྱས་ལ་ནུས་པ་གལ་ཆེན་ཐོན་ཐུབ། ཞིབ་འཇུག་གང་མང་བྱས་པ་ལས་འོས་འཚམས་ཀྱི་ལུས་རྩལ་གྱི་བྱེད་སྒོ་སྤེལ་ན་མི་གཤིས་ཀྱི་སྒྲོམ་གཞི་འཐུས་ཚང་དུ་གཏོང་བར་ཡང་ཡར་སྐུལ་གྱི་ནུས་པ་ཐོན་བཞིན་ཡོད་པ་གསལ་བོར་མཚོན། སྔོན་ཆད་ཚན་རིག་པས་ཨོ་རྩལ་འགྲན་ཚོགས་ལས་ཨང་དང་པོ་ཐོབ་པའི་ཚོགས་སྤྱི་ལ་ཞིབ་འཇུག་བྱས། ཞིབ་འཇུག་གི་འབྲས་བུ་ལྟར་ན། དེའི་མི་གཤིས། ཀླད་པའི་ཚད་འཛིན་ཤུགས་ཚང་མ་ལྟོས་བཅས་སུ་འཐུས་ཚང་རེད། དེ་བས། ཀླད་པའི་ཚན་རིག་ལྟར་ན། གལ་ཏེ་བྱིས་པ་འཚར་ལོངས་འབྱུང་བའི་དུས་རིམ་ནང་རྒྱུན་དུ་ལུས་རྩལ་བྱ་འགུལ་ལ་ཞུགས་ན། ཀླད་པའི་མི་མངོན་པའི་ནུས་པ་སྔར་ལས་ལྷག་པར་ཕྱིར་གཏོང་བྱེད་ཐུབ། ང་ཚོས་ཞིབ་འཇུག་བྱས་ཏེ་ར་སྤྲོད་བྱས་ཡོད་པ་ནི། ནམ་རྒྱུན་ལུས་རྩལ་བྱ་འགུལ་དུ་ཞུགས་ན་མི་ཞིག་གི་གཙོ་འདོམས་དབང་རྩའི་མ་ལག་གི་བྱེད་ནུས་ལ་ལེགས་བཅོས་བྱེད་ཐུབ་པ་མ་ཟད། ད་དུང་ཀླད་སྐྱིའི་སྤྲོ་སྣང་དང་ཚོད་འཛིན་གཉིས་བརྗེ་སྒྱུར་གྱི་གོ་རིམ་ལ་ཤུགས་སྣོན་ཐེབས་ཐུབ། ཀླད་པའི་དབང་རྩའི་མ་ལག་གི་ཆ་སྙོམས་རང་བཞིན་དང་གནད་འཕེལ་རང་བཞིན་ལ་ལེགས་བཅོས་བྱེད་ཐུབ་པ་དང་། མི་ལུས་ཀྱི་ཤེས་ཚོར་ནུས་པ་དང་ལྟ་ཞིབ་ནུས་པའི་འཕེལ་རྒྱས་ལ་ཡར་སྐུལ་ཐེབས་པ་དང་མཉམ་དུ། བསམ་གཞིག་གི་སྐྱེན་པའི་རང་བཞིན་དང་མཐུན་སྦྱོར་རང་བཞིན། ཚུར་སྣང་གི་མྱུར་ཚད་སོགས་ལ་ལེགས་བཅོས་དང་མཐོར་འདེགས་བྱུང་ནས། རིག་སྟོབས་འཕེལ་རྒྱས་སུ་གཏོང་ཐུབ།།
