བླ་མ།（ཞར་བཀོད་གཉིས）
སེང་རྡོར།（མཚོ་བྱང）
སྤྱན་གྱི་ཉི་ཟླ་ཁྲ་ཆིལ་ཆིལ་དུ་གདའ།།
ང་ནི་སྨྲ་བ་མེད་པར་བསྒུར་ནས་བསྡད།།
སྤྱན་གྱི་ཉི་ཟླ་ཁྲ་ཆིལ་ཆིལ་དུ་གདའ།།
ང་ནི་འབྲོ་རྩིས་བྱས་ཀྱང་སྒྱིད་པ་སྦྲིད།།
སྨིན་མའི་སེང་གེ་དེ་ཡིས་བདག་འཛིན་བརྟོལ།།
གཉེར་མའི་མེ་ཏོག་རེ་རེས་ཡིད་དབང་འཕྲོགས།།
རྗེ་བཙུན་དཔའ་བོ་ཁྱོད་དང་གཡུལ་བཀྱེས་མཐར།།
དར་ཆ་ཕབ་ནས་འབྱོལ་མཁན་ང་རང་ཆགས།།
པཎ་ཆེན་སྐུ་ཕྲེང་བཅུ་པ།
ཁྱེད་ཀྱིས་གོས་ཆེན་སེར་པོའི་ཕུ་དུང་ལས།།
ང་ཚོར་འཛམ་གླིང་ཉི་མ་སྟོན་ཙམ་བྱས།།
ཁྱེད་ཀྱི་ཕྱུ་པ་ནག་པོའི་རུམ་ཁུགས་ལ།།
ངེད་ཅག་སྐྱབས་མེད་མགོན་མེད་བཙངས་ནས་ཡོང་།།
བཀའ་སློབ་གནངས་ཡུན་རིང་དྲགས་གསུང་སྐད་འགག །
ཀྱེ་ཀྱེ་གླང་ཆེན་ཐལ་དཀར་ཁྱེད་ལ་འདུད།།
རྟག་ཏུ་ཐུགས་རྒྱལ་བཞེངས་དྲགས་ཁུ་ཚུར་གཡུགས།།
དེང་ཡང་རིག་ལྡན་དྲག་པོ་ཁྱེད་ལ་འདུད།།
གུང་ཐང་བསྟན་པའི་དབང་ཕྱུག
ལུག་རྫིར་མངགས་ནས་མགུར་མ་བསྐོལ་དུས་ན།།
རྒྱ་ལྭ་སྔོན་པོ་ཞིག་མནབས་ལྟོགས་སྐོམ་མྱངས།།
ཤིང་གི་སྒྲ་སྙན་ཆག་པོ་དཀྲོལ་བཞིན་དུ།།
སྙན་པའི་མཐར་ཐུག་མང་པོ་བཤུམ་བཞིན་ལེན།།
ཁྲུང་ཁྲུང་བྱས་ཀྱང་གཤོག་གུར་ཕུབ་སྟེ་མཉན།།
གསེར་ཁྲིར་མངའ་གསོལ་རབ་གནས་མཛད་དུས་ན།།
རི་བྲག་མགོ་བོ་བཏུད་དེ་གུས་ལན་བྱས།།
ཕོ་ཡང་རྒོད་ལ་སྐད་ཀྱང་སྙན་པ་དང་།།
བློ་ཡང་སྒམ་ལ་ཚིག་ཀྱང་བཙུན་པས་ན།།
སྐྱེ་བོ་གཉའ་རེངས་ངས་ཀྱང་མཚམས་མཚམས་སུ།།
མཚན་མོའི་ཉལ་སའི་ནང་ཡང་དབང་མེད་དུ།།
གངས་ཁྲོད་རྡོ་རིང་ལྟ་བུའི་ཁྱེད་རང་དྲན།།
