གྲོལ་རྩོམ།
བཙན་ཞགས། (ཀན་ལྷོ)
མི་ནི་རྨོངས་པའི་གར་ལ་སོང་།།
འཁོར་བ་རྟོག་པས་ཁབ་ཏུ་བསུས།།
སྡུག་བསྔལ་དག་ནི་ཐོད་ལ་ལེན།།
སྣང་བ་དཀར་ལ་མུན་པ་ནག །
གནས་ལུགས་ཉིད་དོ་རྙེད་པ་ནི།།
གྲོལ་བའི་གཤོག་པ་རྐྱོང་བར་སྨྲ།།
ནམ་མཁའ་སྟོང་བ་ཚུགས་སུ་འགྲེང་།།
འཇའ་རིས་འཁྱུག་པའི་པ་ཏྲ་བསླས།།
སྣང་ཙམ་སྣང་ཙམ་ཡལ་བ་དེས།།
འགྲོ་བའི་སྐྱེ་འཆི་འགྲེལ་ལོ་སྐད།།
དེ་ཡི་ཚོར་བའི་ཤུན་པ་མཛེས།།
ཚུར་ཚུར་གཅར་ནས་མེ་རུ་འབར།།
རླུང་བུ་བསིལ་བསིལ་གང་ལ་གཡོ།།
ཕྱི་ནང་ཡོངས་སུ་ཉུལ་བའི་མཐར།།
རི་བོ་བཏེགས་ཤིང་ཆུ་བོ་ཁྲིད།།
སྲིད་པའི་མེ་ལོང་གོར་གོར་ནས།།
རྨི་ལམ་མུན་པའི་དབྱིངས་སུ་བོར།།
ཞེན་པའི་སྤར་ཁ་ལྷོད་ཅིང་ལྷོད།།
མཛུབ་མོས་གདོང་ལ་རི་མོ་བྲིས།།
རི་མོ་བསེད་ཅིང་མདུད་པ་དེས།།
སྨུག་བུན་ཀློང་དུ་ཕར་ཕར་འདས།།
དེ་ལྟར་བཞུད་པའི་ལམ་འཁྲིས་སུ།།
ལྷོད་ཅིང་ལྷོད་པའི་གོམ་འགྲོས་དེས།།
གང་ལ་ཁྲིད་ཅིང་གང་དུ་གསོད།།
གྲིབ་མ་ཁྲིད་དེ་གཡང་ལ་མཆོང་།།
ཟུག་ཚོར་འབར་བའི་འོབས་ལའོ།།
གཏད་མེད་ཟིན་མེད་ཁྲིར་འཛེགས་ཏེ།།
སྣ་ཚོགས་རོལ་བའི་གར་སྟབས་སུ།།
སྟོང་བའི་ཕྱག་རྒྱ་རབ་འཇིགས་པ།།
གཞི་མེད་སད་པའི་མཁའ་ལས་གྲོལ།།
འཁྲུལ་བའི་རྟ་ཕོར་བཅིབས་པ་ན།།
སྐད་ཅིག་གློག་གི་འགྱུར་བ་བསུས།།
ལོང་བས་བཟོས་པའི་མེ་ཏོག་གིས།།
མཛེས་དགུའི་འཇའ་རིས་ཕུབ་པ་ན།།
དེ་རུ་ཟགས་པའི་རྣམ་རྟོག་རྡུལ།།
ང་ཡི་ཕྱི་ནང་ཀུན་ནས་འབབ།།
2016.7.2ཉིན།
