བདེན་པའི་སྒྲོན་མེ་འདེགས་པའི་བྱེད་པོ་སུ་ཡིན། 

                                   ནག་碾་བ་ཤ་བོ་ཚེ་རིང་། (རྨ་ལྷོ)
དྲང་བོ་རྫུན་པར་བཟོ་བའི་བར་སྟོང་ཞིག་ཏུ།།
སྲོག་གི་དྭངས་མ་དཀྲུགས་པའི་རྡུལ་འཚུབ་བསྐྱིལ་སོང་།།
གཡོ་ཟོལ་དགུང་དུ་ཁྲིད་པའི་དར་ཤིང་རྩེ་ལ།།
དེན་པའི་སྒྲོན་མེ་འདེགས་པའི་བྱེད་པོ་སུ་ཡིན།།
བདེ་སྡུག་སྤྲིན་ལྟར་འཐིབས་པའི་འཚོ་བའི་སྦུབས་སུ།།
མི་འདོད་ན་ཟུག་གློག་དམར་བཞིན་དུ་འཁྱུག་སོང་།།
བདེན་པའི་ངར་གླུ་གྱེར་བའི་བྱང་ཁོག་སྟོད་ལ།།
བརྩེ་བའི་རམ་འདེགས་མཛད་པའི་ལྷ་མོ་སུ་ཡིན།།
ཁ་བའི་མེ་ཏོག་གཏོར་བའི་བུ་ཡུག་རྒྱབ་ཏུ།།
འབྲོང་གི་རྭ་རྩེ་བརྡར་བའི་ཞེན་ཁོག་ལྷོད་འདུག །
རང་སེམས་རྡོ་ལྟར་འཁྱག་པའི་ཚོར་ཤེས་འདི་ལ།།
དྲོད་ཀྱི་ཁ་རླངས་འདེབས་པའི་བྱམས་པ་སུ་ཡིན།།
གདོད་ནས་ཕྲག་དོག་བརྩིགས་པའི་རྫ་རིའི་ངོས་སུ།།
གཞན་གྱི་ཕུན་ཚོགས་བརླགས་པའི་སྨུག་པས་ཁེབས་སོང་།།
དྲང་བོའི་མི་ཡིས་བདེན་པའི་ལ་རྒྱ་རྩོད་པར།།
དཔུང་གཉེན་གདུགས་དཀར་འཆང་བའི་མགོན་པོ་སུ་ཡིན།།
སེམས་ཀྱི་བཞུར་རྒྱུན་ཟད་པའི་བྱེ་མའི་ཐང་དུ།།
སང་གི་རྨི་ལམ་དཀྲོགས་པའི་རླུང་བུ་ལྡང་སོང་།།
རང་གི་འདུན་པ་འཆོལ་བའི་སྨིག་རྒྱུའི་གྲོང་ལ།།
མི་ནོར་དྲན་ཤེས་སྩོལ་བའི་དྲིལ་ཆུང་གང་ཡིན།།
ཉི་འོད་རྒྱང་དུ་གྱེར་བའི་མཚམས་སྤྲིན་འོག་ཏུ།།
མེས་པོའི་འཇུག་ངོགས་བོར་བའི་མིག་ཟུང་ལུས་འདུག །
རིགས་ཞེན་གཙང་མ་འཐོར་བའི་མུན་པའི་རྒྱབ་ལ།།
འོད་ཀྱི་བླ་སྲོག་འགུགས་པའི་ཨ་ཕོ་སུ་ཡིན།།
བྱ་རྒོད་གཟེབ་ཏུ་ལུས་པའི་ནགས་ཀླུང་དཀྱིལ་དུ།།
མི་འདོད་དགུན་ཟླ་ར་བའི་རླུང་འཚུབ་ལྷགས་ཡོད།།
རང་སྐད་སྙན་མོ་གྱེར་བའི་ཁུ་བྱུག་སྔོན་མོ།།
ལྕུག་མཉེན་ལྗོན་པའི་རྩེ་རུ་བསུ་མཁན་སུ་ཡིན།།
མགོ་བོ་སྔས་སུ་གཏད་པའི་མལ་ཁྲིའི་འགྲམ་ན།།
སྒྱུ་མས་རྨི་ལམ་འགེབས་པའི་ཚོར་ཤེས་ལྕི་ཡང་།།
དུངས་སེམས་རིས་སུ་འཚོ་བའི་སྙུག་གུའི་རྩེ་ནས།།
ཡིད་འགྱུ་གློག་ལྟར་རྩེན་པ་འགོག་མཁན་སུ་ཡིན།།

                       ༢༠༡༧ལོའི་ཟླ༡ཚེས༡༧ཉིན་གྱི་སྲོད་ལ་རེབ་གོང་ནས།