རུས་པ་དཀར་པོ་ཡིན་པའི་བོད་མི་ཞིག

                                  --ཕུན་ཚོགས་དབང་རྒྱལ་ལགས་ལ་ཕུལ་བ།

 

 

                                            ནགས་ཚལ་སྐྱབས།（དཀར་མཛེས）

མི་འདི་ནི་གྲུ་གཟིངས་ཆེན་མོ་ཞིག་ཡིན

གྲུ་གཟིངས་འདི་ལ་གཡུག་ཆོག་ཆོག་གི་བ་དན་ཆེན་མོ་བཅུ་བདུན་ཡོད

བ་དན་གྱི་རྩེ་ལ་ཉི་འོད་དང་ཟླ་འོད་ཀྱིས་རྟག་ཏུ་འོད་ཟེར་བྱིན་ཡོད

 

མི་འདི་ནི་རྒོད་པོ་ལྡིང་སའི་བྲག་ཐེམ་ཞིག་ཡིན

བྲག་ཐེམ་གྱི་སྟེང་དུ་བྱ་རྒོད་ཀྱིས་སྡེར་འབྲད་བརྐོས་ཡོད

ཆུ་དང་ཆར་བས་སེལ་མི་ཐུབ་པའི་སྡེར་འབྲད་བརྐོས་ཡོད

 

མངའ་རིས་ཕྱོགས་ཀྱི་འབྲོང་རྭ

གཙང་གི་ཕྱོགས་ཀྱི་བླ་མཚོ

ཁྱོད་ཀྱི་རུས་པའི་ནང་ལ་སྤྲིན་དཀར་གྱི་ལྡིང་ཁང་ཕུབ་ཡོད

ཁྱོད་ཀྱི་ཡ་ཆུང་ཁོག་པར་འཇའ་ཚོན་དང་གླུ་སྣས་ཁེངས་ཡོད

 

ཉ་མོར་རྩལ་ཆེ་བས་མ་ཡིན་པར

རྒྱ་མཚོ་ལ་ཞེ་ཁོག་ཆེ་བས་སྟངས་སྟབས་བསྩལ་བ་ཡིན

བྱེའུ་ཁྱུ་དེ་དག་གིས་མཁའ་ལམ་བགྲོད་ཐུབ་དོན

གཤོག་པ་བཟང་བས་མ་ཡིན་པར་བར་སྣང་གི་མཐོངས་ཡངས་པས་ཡིན

 

ཟབ་ཅིང་བརླིང་བའི་གངས་རི་ལགས

ཉི་ཟླས་རྟག་ཏུ་བགྲོད་ལམ་མི་འཁྱུག་པའི་ལམ་ཐིག་ཅིག་ཡིན

 

                                                   2017/1/3ཕ་ཡུལ་རྫ་ཆུ་ཁ་ནས།