ཚ་ཚ་འུར་འུར་དུ་འབར་བའི་མེ་ལྕེ་ཞིག
གཞི་ནས་མཇུག་རྫོགས་རན་སོང
འུར་འུར་ཆོམ་ཆོམ་གྱིས་ཁེངས་པའི་གོམ་སྒྲ་ཞིག
ངང་གིས་མཚམས་འཇོག་རན་སོང
རྡུལ་འཚུབ་ལང་ལོང་དུ་འཁྲིགས་པའི་ལམ་ཕྲན་ཞིག
རིམ་གྱིས་མཇུག་བསྡུ་རན་སོང
ཁྲག་རྩ་ལྷོག་ལྷོག་ཏུ་འཁོལ་བའི་ཚ་དྲོད་མཐོན་པོ་ཞིག
ད་གཟོད་འཁྱག་པ་རྡོ་ལ་འབྱར་དགོས་སོང
ནམ་ཉི་མ་ཞིག་ལ
ང་ཡང་ཕ་ཡུལ་དུ་ཕྱིར་ལོག་དགོས
ཁང་ཁྱིམ་གྲུ་བཞིའི་ཆེས་ཕུགས་ལོགས་སམ
མལ་ཁྲི་ནར་མོ་ཞིག་གི་གྲུ་ཟུར་ནས
ཁོག་སྟོད་དགྱེ་ཙམ་དང་མིག་གཉིས་ཟམ་ཟིམ་དུ
བློས་ཐོངས་དཀའ་བ་ཐམས་ཅད
ཡོངས་སུ་བློས་བཏང
ཡིད་ལ་དྲན་དཀའ་བ་ཚང་མ
ཡོངས་སུ་དང་ལེན་བྱས
. . . . . .
སྨྲ་བ་ཤུབ་ཅིང་ཉུང་བ་དང
གོམ་པ་ཟོར་ཡང་ཞིང་མྱུར་བ
མི་ཚེ་གཅིག་ལ་འབྲེལ་ཐག་ཆེས་ཟབ་པའི་སྙིང་ཉེ་བ་དག་གིས
ཁྱོད་རང་ཐག་རིང་དུ་མགྲོན་བསྐྱལ་བྱེད་པའི་གྲབས་ཡོངས་སུ་རྒྱག་དུས
ད་ནི་འགྲོ་དགོས་པའི་ལམ་ལ་ཆས་ཚར
འཇིག་རྟེན་འདིའི་ཆོས་ཉིད་ཀྱི་སྡོམ་རྒྱ་དང
བར་སྣང་གི་ཕ་མཐའ་ལ་ཁ་གཏོད་ཡོད་པ་ཚོར་དུས
གཞི་ནས་ལུས་སེམས་གཉིས་ཐང་ཆད་དེ་ངལ་གསོ་བའམ
ངལ་གསོ་བའི་དུས་ལ་བབས་ཡོད་བཞག
ནམ་ཉི་མ་ཞིག་ལ
ཁྱོད་ཀྱང་གཞན་ཡུལ་དུ་གནས་ལ་འགྲོ་དགོས
ཁ་སང་གི་དེ་དག་ཚང་མ
ད་དུང་བརྗེད་ཚར་མེད་ཀྱང
ད་ནི་ཡོད་ཚད་ཐང་ལ་འཇོག་འདོད
དེ་རིང་གི་འདི་དག་ཚང་མ
ད་དུང་སྒྲུབ་ཚར་མེད་ཀྱང
ད་ནི་ཚང་མ་མཚམས་ནས་འཇོག་འདོད
སང་ཉིན་གྱི་འཆར་གཞི་མང་པོ
ད་དུང་འགྲུབ་ཚར་མེད་ཀྱང
ད་ནི་ཐམས་ཅད་དེ་ལྟ་དེ་ལྟར་བྱེད་འདོད
སྐྱེ་བ་འདི་ཡོངས་སུ་བློས་བཏང་རྗེས
ཡང་བསྐྱར་འཇིག་རྟེན་ལ་མིག་གཉིས་ཕྱེས་ཚེ
ཐག་རིང་གི་གནམ་སའི་མཚམས་ན་འོད་ལམ་ལམ་འཚེར་བཞིན་འདུག
གནས་དེ་ནི་འཆི་བའི་ལོག་མལ་ཡིན་པས
གནས་དེར་སོང་ནས ད་དུང
རི་བོའི་ཕ་རོལ་གྱི་རི་བོ་གཞན་ཞིག་འགྲིམ་དགོས
སྐབས་འདིར
མི་ཚེ་གཅིག་ཡོངས་སུ་མཇུག་སྡུད་བཞིན་འདུག་པས
ཆེས་ཐོག་མ་ཡིན་ལ་ཆེས་མཐའ་མའང་ཡིན་པའི་འཆི་ཁ་མར
ལུས་སེམས་གཉིས་ལ་དུས་མཉམ་དུ
ཆེས་དབེན་སིམ་གྱི་དབུགས་དབྱུང་ཐེངས་གཅིག་ཐོབ
ནམ་ཉི་མ་ཞིག་ལ
ཁོ་ཡང་ཚེ་ཕྱི་མའི་དབུས་ལ་འགྲོ་དགོས
2017.06.03ཉིན་ཆུ་མིག་དཀར་པོའི་གམ་དུ།
