མགུར་ནག་དགུ་བསྐོར་མ།
བདའ་ཚང་སྙེམས་གྲོལ། (ལྷ་ས)
རྗེ་བླ་མའི་ཞབས་ལ་ཕྱག་འཚལ་ལོ།།
ཕྱག་དོན་མེད་འཚལ་བ་མ་ལགས་ཤིང་།།
མགོ་བྱུང་རྒྱལ་བསྒུར་བ་ག་ལ་ཡིན།།
རྒྱུད་ཆུ་རྡོ་སྔོན་མོ་གྱོང་རེག་རེག །
རྗེ་ལྕགས་ནག་ཐོ་བས་ཨེ་གཅོག་ལགས།།
སེམས་ཉོན་མོངས་ནད་ཀྱིས་གཟེར་བྲེང་བྲེང་།།
སྨན་ཤི་སོས་བདུད་རྩིས་ཨེ་ཕན་ལགས།།
ཚེ་རླུང་ནང་མར་མེ་འདར་སིལ་སིལ།།
རྒས་འཆི་མེད་ཡོལ་བས་ཨེ་བསྐོར་ལགས།།
སེམས་རྣམ་རྟོག་གྲིབ་མ་ནག་རིབ་རིབ།།
ཆོས་མན་ངག་ཟླ་བ་ཨེ་གསལ་ལགས།།
སེམས་ཆོས་བརྒྱད་དགྲ་བོ་ངར་ཕད་ཕད།།
དགྲ་ཤ་བོའི་གདོང་ལ་ཨེ་འབུད་ལགས།།
ལུས་སྒྱུ་མའི་ཀ་བ་འདར་ཁྱོམ་ཁྱོམ།།
ལྕགས་གཟེར་མས་འཕལ་ཁ་ཨེ་སྡོམ་ལགས།།
ལས་བུ་ལོན་འདྲེ་རྒོད་འཇིགས་ཡེར་ཡེར།།
སྔགས་རྡོ་རྗེའི་སྲུང་འཁོར་ཨེ་སྒོམ་ལགས།།
བློ་མུན་པའི་ཁང་སྟོང་ནག་ཧང་ཧང་།།
ཆོས་མར་མེ་དཀར་ཆུང་ཨེ་སྒྲོན་ལགས།།
རྒྱུད་ངན་པའི་སྦྲང་ཐལ་ནག་རུབ་རུབ།།
ཆོས་འདུལ་བའི་སྡོམ་དྲ་ཨེ་འཁེལ་ལགས།།
ནང་སྲེད་པའི་རི་སྤྱང་ཕེ་དིར་དིར།།
བོའུ་ཁྲ་རིང་སྐག་སྒྲ་ཨེ་གྲག་ལགས།།
ངག་བྱིས་པའི་ཅལ་ཅོལ་འུ་རུ་རུ།།
ཕ་དམ་པའི་ཁ་ཏ་ཨེ་ཡོད་ལགས།།
རྒྱུད་རྟ་སྦངས་ནག་པོ་སྐམ་སང་སང་།།
ཆོས་དྭངས་གསལ་མེ་ཤེལ་ཨེ་གདའ་ལགས།།
ལས་ཉོན་མོངས་དུག་ཁུ་ནག་སོལ་སོལ།།
སྨན་དུག་རོ་གཏིང་འདོན་ཨེ་མངའ་ལགས།།
ཡིད་ཤེས་པའི་ཤེལ་སྒོང་ས་ཁལ་ཁལ།།
དར་འབྱིད་བྱེད་ཤལ་རིང་ཨེ་གདའ་ལགས།།
སྤྱིར་འཁོར་བའི་གངས་ལྟོངས་གྲང་ཅང་ཅང་།།
གོས་བེར་བ་དུག་པོ་ཨེ་དྲོ་ལགས།།
